1O shuna oḳol, duniat bout bonḍo nobi baroisoin. Erlagi ḳeu zudi aia ḳoe, ami ruhur bole matiram, te tumra zoldi bishash ḳorio na, borong zasai ḳoria deḳo, i ruh Allar ges taki aise ki na. 2Allai ruhre sinar niom oilo, ze ruhe shikar ḳore manush surote Isa al-Mosie duniat toshrif anchoin, ou ruh Allar ges taki aise. 3Oile ze ruhe ou Isare shikar ḳore na, i ruh Allar ges taki aise na. Ita oilo Ḳane-Dorjalor ruh, ou Dorjalor ruh aibar ḳota tumra age huncho, ar oḳono he ou zogoto ase.

4Oile O sabal oḳol, tumra to Allar manush, hou bonḍo oḳolor ufre tumra zitiso. Tumrar dilo ze ruh asoin, ein to i zogotor ruh taki bout mohan. 5Ashole ou bonḍo oḳol to ou zogotor, erlagi tara ḳali zogotor buli bule, ar zogoteo tarar buli mane. 6Ar amra oilam Allar manush. Allare zera sine, tara amrar buli mane. Oile zera Allar nae, tara amrar ḳota hune na. Ou nomunae amra dukabaz ruhu ar Allai hok ruhure sini.

7O shuna oḳol, Allar deoa dan oilo mohobbot, erlagi amra zanu eḳe-oinne mohobbot ḳori. Ze bondar dilo mohobbot ase, tar zonom oise Allar nur taki, he Alla Pakre sine. 8Ar zegur bitre mohobbot nai, he to Alla Pakre sine na, ḳaron Alla nizeu to mohobbot. 9Alla Pakor mohobbot amrar maze ou nomunae zair oise, tain tan ḳas maear zon Ibnullare ou duniat bezisoin, zate en usillae amra aḳeri zindegi hasil ḳortam fari. 10Ar amra zen Alla Pakre mohobbot ḳorslam ila kunta nae, borong tain nizeu amrare mohobbot ḳoria, amrar gunar kofora oibar lagi, tan ḳas maear zon Ibnullare zogoto faṭai dila, oḳṭareu ḳoe mohobbot.

11O shuna oḳol, Alla Pake zebla amrare ola mohobbot ḳorla, te amrar lagio zorur oilo eḳe-oinnore mohobbot ḳora. 12Allare to ḳeu kunudin deḳse na. Oḳon amra zudi eḳe-oinnore mohobbot ḳori, te buza zaibo, tain amrar dilo boshot ḳoroin, tan mohobbote amrar dilo furafur fol dorse. 13Amrare tan ruhu mubarok dan ḳorsoin, erlagi buzram, amra tan maze boshot ḳori, ar taino amrar maze boshot ḳoroin. 14Amra nize deḳsi, dekia hari ou shakki diram, zogotor toraneala ḳanḍari hishabe, gaibi bafe tan ḳas maear zon Ibnullare bezisoin. 15Erlagi ze zone shikar ḳore, Hozrot Isau oila Allar ḳas maear zon Ibnulla, tar dilo shoeong Alla Pak boshot ḳoroin, ar he-o Allar maze boshot ḳore. 16Amrar loge Allar ze mohobbot ase, ikan amra zani, zania ekino ḳori.

Ashole Alla nizeu mohobbot. Mohobbotor maze ze bonda boshot ḳore, he Allar mazeu boshot ḳore, ar Alla Pako tar maze boshot ḳoroin. 17Ou nomunae mohobbot amrar dilor maze furafur folala oe. Teu kiamotor din amra shaoshi boni, ḳaron ou zogoto amra tan ronge rongi gesi. 18Mohobbotor maze kunu ḍor-boe nai, shullo-ana mohobbote borong ḍor-boere ḳedai dey. Ḍor-boer maze to shaza faoar bab-shab ase, erlagi ḍor-boe zar bitre, he mohobbotor shullo-ana fol dorse na.

19Te amra Alla Pakre mohobbot ḳori, ḳaron tain amrare foela mohobbot ḳorsoin. 20Ar ze manshe ḳoe, he Alla Pakre mohobbot ḳore, ḳoia tar mumin baire ginnae, he to misa matra. Ḳaron nizor souke deḳa baire zegie mohobbot ḳore na, a-deḳa Allare kila mohobbot ḳorbo? 21Amra to tan ges taki ou hukum faisi, ze bondae Alla Pakre mohobbot ḳore, he zanu tar baireo mohobbot ḳore.