A Bun Nyunsu soleki fa
Mateus
skrifi en
Wan wortu na fesi
Efu wi leisi a buku Mateus bun, dan wi e si tak' a skrifi nanga a Owru Testamenti na ini prakseri. Furu leisi a e sori go na a Owru Testamenti. Tapu sowan fasi a skrifiman wani tak' den Dyusma mus ferstan a boskopu wan krin fasi. A wani sori den tak' sani san Gado ben pramisi ini a Owru Testamenti, kon psa di Masra Yesus kon na grontapu. Mateus e si Yesus leki wan leriman di kon fu leri wi fa Gado wani tiri libisma leki kownu. Dati wi kan si na den bigi preiki fu Yesus, di Mateus e tyari kon na fesi (Mat 5–7).
San de ini a buku disi:
Fa Yesus gebore èn fa A bigin En wroko (1:1 – 4:25)
A wroko fu Yesus ini Galilea (5:1 – 18:35)
Yesus e go na Yerusalem (19:1 – 20:34)
A laste wiki (21:1 – 27:66)
Yesus opo baka na dede (28:1-20)
Den afo fu Yesus Kristus
Lukas 3:23-38
1Disi na den afo fu Yesus Kristus. Yesus ben de wan bakapikin fu David, nanga fu Abraham.
2Abraham ben de a p'pa fu Isak,
Isak ben de a p'pa fu Yakob,
èn Yakob ben de a p'pa fu Yuda
nanga den brada fu en.
3Nanga Tamar Yuda kisi Peres
nanga Sera.
Peres ben de a p'pa fu Hesron,
èn Hesron ben de a p'pa fu Aram.
4Aram ben de a p'pa fu Aminadab,
Aminadab ben de a p'pa
fu Nakson,
èn Nakson ben de a p'pa
fu Salmon.
5Nanga Rakab Salmon kisi Boas.
Nanga Ruth Boas kisi Obed,
èn Obed ben de a p'pa fu Isai.
6Isai ben de a p'pa
fu kownu David.
David kisi Salomo
nanga a frow fu Uria.
7Salomo ben de a p'pa
fu Rekabeam,
Rekabeam ben de a p'pa fu Abia,
èn Abia ben de a p'pa fu Asa.
8Asa ben de a p'pa fu Yosafat,
Yosafat ben de a p'pa fu Yoram,
èn Yoram ben de a p'pa fu Usia.
9Usia ben de a p'pa fu Yotam,
Yotam ben de a p'pa fu Akas,
èn Akas ben de a p'pa fu Hiskia.
10Hiskia ben de a p'pa fu Manasa,
Manasa ben de a p'pa fu Amon,
èn Amon ben de a p'pa fu Yosia.
11Yosia ben de a p'pa fu Yekonya
nanga den brada fu en.
Ini a ten dati srudati fu Babiloniakondre ben teki a kondre fu den Dyusma abra, dan den tyari den Dyu gwe na Babiloniakondre.
12Baka di den tyari den gwe,
Yekonya kisi Sealtiyel,
èn Sealtiyel ben kisi Serubabel.
13Serubabel ben de a p'pa
fu Abihud,
Abihud ben de a p'pa fu Elyakim,
èn Elyakim ben de a p'pa fu Asor.
14Asor ben de a p'pa fu Sadok,
Sadok ben de a p'pa fu Akim,
èn Akim ben de a p'pa fu Elihud.
15Elihud ben de a p'pa fu Eleasar,
Eleasar ben de a p'pa fu Matan,
èn Matan ben de a p'pa fu Yakob.
16Yakob ben de a p'pa fu Yosef,
èn Yosef ben de a masra fu Maria.
Maria ben de a m'ma fu Yesus,
di den sma e kari Kristus.
17So wi e teri tin-na-fo afo fu Abraham kon miti David, nanga tin-na-fo afo fu David kon miti a ten di den feyanti fu den Dyusma ben tyari den gwe na Babiloniakondre. Dan fu a ten di den Dyusma ben de ini Babiloniakondre, kon miti a ten di a Mesias gebore, wi e teri tin-na-fo afo tu.
Fa Yesus kon gebore
Lukas 2:1-7
18Na so Yesus Kristus kon gebore. Maria, a m'ma fu Yesus, ben de fu trow nanga Yosef. Ma fosi den go libi makandra, Maria ben hori bere. Ma na a Santa Yeye ben meki dati psa. 19Dan fu di Yosef ben de wan bun sma, a ben wani kibri Maria fu a syen di a bo kisi te sma bo yere a sani disi. Fu dat'ede a ben wani prati nanga en na wan safri fasi. 20Ma di Yosef prakseri a sani dati, ne wan engel fu Masra sori ensrefi na en ini wan dren. A engel taigi en taki: “Yosef, bakapikin fu David, yu no abi fu frede fu teki Maria leki yu wefi. Bika na a Santa Yeye meki tak' a de nanga bere. 21A sa kisi wan manpikin, di yu mus kari Yesus. Bika na En sa ferlusu En pipel fu den sondu.” 22Ala den sani disi psa, fu meki a sani san Masra ben meki a profeiti taki kon tru. A ben taki: 23“Luku, wan yongu uma di noiti no sribi nanga wan man ete, sa kisi bere. A sa kisi wan manpikin, di den sa kari Emanuel.” (Emanuel wani taki: Gado de nanga wi.)
24Di Yosef wiki, a du san a engel fu Masra taigi en, a trow nanga Maria. 25Ma a no sribi nanga en leki man nanga frow te leki Maria kisi a boi. Di A gebore Yosef kari En Yesus.