1Nare nə̂ gə ꞌogəgə Parise me nə̂ yab ɗang woni gələ̂ bii gə ꞌwoo gənə̂ Moyis duwa, cendi swa managə ciri də geche dəJursalem-mə̂, hara gəra dam Jesu tuləwə̂. 2Me cendi yə̂r woni gərsə̂ gwale gənə̂ Jesu duwa nə̂ yab wom mani gə əsəragə nə̂ acn̰e. Əsəragə nə̂ acn̰e, gəndəw də biyə̂ da i: cendi wom mani dəban wiya gə əsəragə bam ladə ya hada dənə̂ nare nə̂ Juwib ba də ərəm nəm de. 3Ɓag da, nare nə̂ Parise di me nare nə̂ ɗang pad nə̂ Juwib di me da, lan̰də i hada dənə̂ mwagragə nə̂ pii di le, i dara yande me cendi wi əsəragə bam ladəle do me wom gə mani sən̰. 4Managə cendi swanay sug-lə̂ kaw, cendi sabə sədə̂gə bam ya te hada day-ə̂ de do me wom mani sən̰. Cendi lan̰gə mani nan̰ nə̂ ɗang nə̂ ala nə̂ hada day-ə̂ di le, ya wiya day gə mani woni wama mani me woni chaa mani me ta de. 5I yande di me, nare nə̂ Parise me woni gələ̂ bii gə ꞌwoo di me ur gə Jesu ba da: «I dara na me woni gərsə̂ gwale dəma di al mani nə̂ wundə̂r gə hada dənə̂ mwagərandə bə̂də̂ yande mo? Cendi wom mani gə əsəragə nə̂ acn̰e bər̰in̰, dana mo?» 6Ər̰ə Jesu cogə lə̂ diyə̂ ba da: «ꞌYeni nare nə̂ gwale ꞌyol bədə̂ngə̂, me dusərə̂ng də korgin̰ i jiga nə̂ ga! Esayi tanga jangə gwale gə Mãr̰ĩ wayəw dara darang pii di da, i sədə ꞌyang. An̰ji way ba da:

8Jesu waygə bi ba da: «ꞌYeni da, anə̂ kala bii gə ꞌwoo gənə̂ Mãr̰ĩ duwa bam, me anə̂ dam managə hada dənə̂ nare day-ə̂. 9Ə̂w, anə̂ ꞌyo bərmə̂ gaba gən̰ə̂ gə bii gə ꞌwoo gənə̂ Mãr̰ĩ duwa bam bər̰in̰ dara gama gə hada dan! 10Ərmənə̂ ladəle! Moyis way managə bii gə ꞌwoo-lə̂ ba da: ‹Algə nə̂ abam day gə im horəmbə̂›†, an̰ji way ɗang bi ba da: ‹Gun gə cadəbəna abə̂w labaa iw da, ur i ꞌyaa bam.›‡ 11Me ꞌyeni, anə̂ gəlgə dan nare ba neyamna gaba wayagə abragə labaa idə̂gə ba da: ‹Mani nə̂ əsə̂nə̂ nə̂ dee nə̂ ꞌyang dara ba nə̂ wanangə̂ di, nə̂ u bən ꞌyaw i Mãr̰ĩ korban ɗəm, gəndəw də biyə̂ i sarga.› 12Yande da, anə̂ kalgə nare bərmə̂ gaba ala dwani gə abragə bə̂də̂ me gə idə̂gə bə̂də̂ me. 13Yande bi kaw, anə̂ yə hada dan ladə me anə̂ meyendə gə gwale gənə̂ Mãr̰ĩ duwa bam. Me anə̂ al mani nan̰ ɗang nə̂ acn̰e nə̂ wun yande bi.»

14Ər̰ə, Jesu di ꞌwaga nare nə̂ gər̰e di səwə̂ bi me waygə ba da: «ꞌYeni nə̂ pad ka diya, kalna sumdə̂ng ladə me ꞌwacn̰ana gwale ni gə nə̂ ilə̂ wayang gandəw lə̂ ka di gəndəw! 15Mani mən tenene nə̂ swa iche me gandə ha gun səwə̂ me cow gə acn̰e Mãr̰ĩ dərə̂wə̂ da, ilə̂ bə̂də̂ bər̰in̰. Me i mani nə̂ swa gun dusəw də korgin̰-yə̂ me i woni cwaw gə acn̰e Mãr̰ĩ dərə̂wə̂ cendi. [ 16Kal gun gə sumdə̂w woni dwaya gwale inalə̂ da, kaləw a dwayna!]»

17Ɓam mwom da, Jesu so kal nare nə̂ gər̰e di ɗəm me ha ulay. Me woni gərsə̂ gwale duwa cor urəw gwale gə diri gə an̰ji dee wayaw caga ka di gəndəw. 18Me an̰ji waygə ba da: «ꞌYeni kaw, anə̂ i woni ꞌwacn̰a mani gəndə̂gə bə̂də̂ yande me mo? Mani nə̂ swa iche me gandə ha gun səwə̂ da, neyem cwa gun gə ta di gə acn̰e Mãr̰ĩ dərə̂wə̂ bə̂də̂. Anə̂ ꞌocn̰ yande bə̂də̂ ɓa? 19Mani nə̂ ta di gandə ha i managə gun dusəwə̂ bə̂də̂, me cendi gandə ha i nudə̂wə̂, me ɗang bi da, cendi gandə ha i bam mana gaba ꞌwada-lə̂.» Yande da, Jesu way daa ba mani mən tenene nə̂ wama nə̂ co gun gədəw gə acn̰e Mãr̰ĩ dərə̂wə̂ da, ilə̂ bə̂də̂. 20Me an̰ji waygə ɗang bi ba da: «I mani nə̂ swa gun dusəw də korgin̰-yə̂ me i woni cwaw gə acn̰e Mãr̰ĩ dərə̂wə̂. 21I managə gun dusəw də korgin̰-yə̂ me ərmə̂ pad gə acn̰e gə i ka di swa-lə̂: delme də idə kan̰ja abje labaa namde, miini, ꞌyaa gə gun gə urə̂ dəma, 22ꞌya gə gun diyamo, labaa jam tərə̂w, urə̂ gə mani nan̰, dusi də acn̰e, kojəgə̂ də idə lama mana, ala gə mani nə̂ al jawe, haarni, widəru, ꞌwaga gə sii, ala gə mani dəban ərmə̂ gə gəndə̂gə. 23Acn̰a pad gə ta di swa i gun dusəw də korgin̰-yə̂ me cow nəm gun gə acn̰e managə Mãr̰ĩ dərə̂wə̂ di.»

24Ɗang da, Jesu swa daa kala mana gə pii di bam me hara yala i managə wama gə Tiir-ə̂. An̰ji gandə ha kərə̂ managə ciri də mən-lə̂ me ur dara nare ba ꞌwacn̰ana hara duwa gə kərə̂ di bə̂də̂. Me nare di ꞌocn̰ com dara an̰ju ba yaalə̂ kərə̂. 25Yande da, deme mən də durmə̂də dundi də acn̰e gəldə dərə̂də dwaya gwale duwa me tandi swa kalang hara əndər dodə̂ Jesu dərə̂wə̂. 26Deme də ta di i Juwib bə̂də̂, gə yə̂də i managə Siri də i managə wama gə Penisi-yə̂. Tandi amsə Jesu dara ba ꞌywarnadə durmə̂də dundi də acn̰e bam sədə̂. 27Jesu codə lə̂ diyə̂ gə gwale gə diri waydə ba da: «Kal dine woni ciri gə wom mapa day ə̂bdə ladəle, dara laya gə mapa gənə̂ dine day ꞌyagə grade bam da, ladə bə̂də̂.» 28Ər̰ə deme di wayəw ba da: «Aba ciri ni, ɓag da, grade di wom i mapa gə ɓolbə̂r dine əsəragələ̂ bor dodə̂ tabəl gəndədələ̂.» 29An̰ji waydə bi ba da: «Dara gwale diya gə ta di da, dundi də acn̰e di gandə bam durmə̂y di sədə̂ ɗəm. Hale ulay diya-lə̂ ɗəm!» 30Deme di so ha ulay me gəra ha ꞌywa durmə̂də di ilə̂ dodə̂ solbə̂-lə̂ me, dundi də acn̰e di kaw gandə bam sədə̂ ɗəm me ca.

31Ɗang kaw, Jesu so daa kal wama gə Tiir bam. An̰ji ha gandə gə Sidõ dədə̂ me cilangə̂ gə wama gə gə ꞌogəw «Ciri də mwaj» dəwə̂. Me an̰ji ha nəm əjə kuray gə ɓəle gə Galile-yə̂ sən̰. 32Mana gə ta-lə̂ da, nare ꞌwow Jesu abe mən gə ɗugəre gə way gwale ladə bə̂də̂ hara nəm. Me nare di amsə Jesu ba da: «Asə əsə̂m dəwə̂!» 33Jesu wol abe di ha nəm bam hin̰e nare nə̂ gər̰e di tulə̂gələ̂. An̰ji hurə̂ dunəw ka me kam managə sumdə̂wə̂, ɗang da ɓəsə lade dunəwə̂ me ɓəl gə abe di dilesəw gə dunəw də lade ilə̂ di. 34Mwom da, an̰ji u dərə̂w yə̂r gə siyaya gə daa, me bii goche me wayəw abe di ba da: «Epata!»; gəndəw də biyə̂ ba da: «Tən̰ə̂r bam!» 35Mana gə ta-lə̂ dog da, abe di sumdə̂w tin̰ə̂r bam, dilesəw kaw awrar daa, me an̰ji cor way gwale ladə pərang me ca. 36Mana gə ta-lə̂ da, Jesu yə̂gədə nare pad nə̂ ilə̂ di sumdə̂gə ba hana cəmnə̂w gun daa bə̂də̂ paa paa. Me managə an̰ji wajəgə yande kaw, cendi ha cəmə̂gə kwandagə daa pii pii com, 37dara mani nə̂ an̰ji algə ka di da, ꞌyagə ərmə̂ gə geche nan̰e bər̰in̰. Yande da, cendi way ba da: «Mani duwa pad nə̂ an̰ji algə da, i nə̂ lade nan̰e. An̰ji tin̰gə nare nə̂ ɗugəre sumdə̂gə bam me, nare nə̂ məm bədə̂gə daa me ca!»