Hì Chuaq Hadrah Padon Trùh
1Hlôi ken ta Siôn beq;
hlôi ken dêh jàp ta wang hadròih Au beq!
Dìq ca jàn ta gùng cô tarìt tariang beq,
ma jah 'màng aih hì da Chuaq padon trùh,
hì aih khoi haten.
2Aih hì clam clôiq,
hì da yùc gam habàu!
Taiq mòiq jàn bàc
wa dêh glàm trùh jàp roc bôi wang tìah ca mat mahì xreo daxroq;
bìac 'màng aih 'nhòq lah i enh calah nèh trùh manàiq,
wa rìm 'nhòng atìq èh ùh jò leq i hòm.
3Enh ngìa wì haq,
i ùnh dêh, enh cloh wì haq i ùnh cheo loh loc.
Adroi ca wì haq trùh, taneh cô tìah ca wia Êđen;
atìq ca wì haq lam cwa, taneh cô loh ca wang wê raliang piang enh cloh wì haq;
ùh i ca cleq claih ca wì haq.
4Dua dang wì haq tìah ca calùh axêh,
wì haq cadàu trùh tìah ca mangai còi axêh.
5Wì haq plôh tŏc ta bôi wang tàng
tìah ca atêh calùh xê axêh,
tìah ca atêh ùnh cheo hri,
tìah ca atêh lình cràm nòi tajêh poh.
6Jò hnoq wì haq, 'bài jàn dìq crè crep jang ngìa wì haq,
rìm hadrò pàt dìq bah boi.
7Wì haq glàm trùh tìah ca 'bài lình tajêh;
heo 'bài panàt phôq tìah ca 'bài lình dêh;
rìm ngai cadiang lam
ùh talìch dèh ca brong cla.
8Wì haq ùh dahnen dabau,
ma leq lam dèh trong;
jò wì glàm cwa đôn hanình,
wì ùh cađac dèh trong.
9Wì haq mùt ta phôq,
cadàu ta panàt phôq,
heo ta 'bài hnem,
mùt ti 'bài 'mŏc tìah troi mangai atùng.
10Taneh tadroq
ŏi jang ngìa wì haq;
'bài lòp plình tadai, mat mahì, mat khê loh ca clam,
'bài halŏng yôp hlài dèh can 'ngah.
11Chuaq 'noh bàu jang
ngìa lù lình da Haq;
lình Haq dìq jaq bàc wa 'bài mangai broq
tiaq bàu thê Haq dìq jaq dêh.
Hì da Chuaq càn
wa đang ca crè;
cabô jah nui chìuq?
Phai Canao Loq Dèh Ca Tôiq Lôi
12Chuaq doi: “Manàiq pì dìq ca manoh wìh hlài ta Au beq,
rôn ca acaq, hmoi wa mango beq.”
13Hich manoh pì beq,
paq hich eo.
Wìh hlài ta Chuaq Boc Plình pì beq;
taiq Haq loq waq loq xa-ŏch,
xòi nòih bàc can loq waq;
Haq dùi hlài dèh manoh ùh hìaq ùc 'noh ca pì bìac ranàc.
14Cabô jah loq broq braiq Haq broq hlài dèh manoh èh
đòiq hlài xôq ramŏt ca pì,
èh pì jah dèch am ca Haq ngè tadreo xam 'mau mì,
lè pùc alac nho ca Chuaq Boc Plình pì hòm?
15Hlôi ken ta Siôn beq,
anoi 'noh bìac rôn ca acaq beq,
patìn ca tagop rìm gùng.
16Tagop 'bài jàn,
ràih crài wì haq loh hadròih;
creo ca 'bài gu craq tagop;
tagop 'bài con 'yoh wa 'bài con nga ŏi ùq beq!
Ŏng mai neo hadai loh khoi dèh
enh nòi adùq hnem beq!
17'Bài pajàu Chuaq, 'bài mangai patìh bìac Chuaq,
khòh hmoi nòi 'mang ngo hnem cùh waiq,
wa ti nòi ca'bŏng tadreo, doi: “Ô Chuaq, xìn xa-ŏch ca con jàn Ìh,
xìn paq đòiq con jàn Ìh ep camaih,
'bìq 'bài Diac 'noiq wèq cwìang!
Gleq ma đòiq 'bài Diac 'noiq doi:
‘Boc Plình wì haq ŏi ta leq?’ ”
Boc Plình Rùp Bàu Dèch Jàn Haq
18Èh Chuaq jah tèo bàu;
Haq jah xa-ŏch dèh ca jàn Haq.
19Chuaq khoi padreo bàu, wa khoi doi dèh ca jàn Haq:
“Cô, Au am ca pì 'mau, alac nho neo, dàu,
pì jah panàc ca 'bài dahwèq aih.
Au pi đòiq pì ep camaih ta 'bài jàn 'noiq hòm.
20“Au drùh đac lù lình trùh enh pah 'ngeo ca mat mahì loh wia hangai ca pì,
hnan 'mùt wì haq mùt ta gùng taneh croh crenh wang wê;
lù lình lam adroi da wì haq clìh ta diac raxìq pah mat mahì loh.
Lình lam atìq wì haq clìh ta diac raxìq pah mat mahì mùt.
Hòi xua om
wa can xua khech wì haq pan tŏc.”
Taiq wì haq khoi broq bìac loq catèh.
21Ô taneh, paq crè;
dahlìa manoh lem bùi beq;
taiq Chuaq khoi broq bìac càn caiq.
22Ô 'bài ngè rôm, paq crè;
ma jah 'màng aih đam nhat đùng wang wê khoi loh ramŏt,
long khoi loh plì lem, long pŏc wa long nho dìq loh hla loh plì.
23Ô con caiq Siôn,
pì dahlìa manoh wa lem bùi ta Chuaq Boc Plình pì beq!
Ma jah 'màng aih Haq am mè
pajang prang ta'mroq ca pì,
24'Bài xàn len 'mau jah bình 'mau,
'bài thùng halùih ca alac nho neo wa dàu.
25“Au am patem hlài ca hanam ma 'bìq lìp tùc,
hadrùng, can hàng, wa lìp tùc cap raliang,
aih lình cràm Au ma thê trùh ta pì.
26Pì jah caq panàc tàu tìa.
Pì jah padèch hiniq Chuaq Boc Plình,
Haq khoi am ca pì bìac halac.
'Màng aih jàn Au pi hìaq 'bìq camaih hòm.
27Pì jah loq Au ŏi ta'ne jàn Is-ra-ên,
wa loq Au Chuaq Boc Plình pì,
ùh i ca Boc Plình 'noiq,
wa jàn Au ùh jò leq 'bìq camaih hòm.
Rùp Bàu 'Noh Am Yiang Hadròih
28“Atìq ca aih,
Au ùc Yiang Au ta dìq dŏng ca rìm ngai;
con calô wa con cadrì pì jah capoch bàu thai Boc Plình;
'bài mangai craq jah apô hnoq,
'bài gu radam jah ngan hnoq bìac mahno 'noh aih.
29Ta 'bài hì aih, Au hadai ùc Yiang Au ta 'bài hapŏng calô,
hapŏng cadrì da pì.
Hì Da Chuaq
30Au pa'noh bìac halac ta 'bài lòp plình
wa ta crŏng taneh:
aih mahem, ùnh, wa 'bài cato nhòi.
31Mahì loh ca clam,
khê gòh tìah ca mahem,
adroi ca hì càn wa ramòt da Chuaq trùh.
32Jò aih mangai leq waiq dang
hiniq Chuaq dìq jah dèch;
ma jah 'màng aih tiaq bàu Chuaq doi,
ta bôi wang Siôn wa Jê-ru-sa-lem
jah i 'bài mangai jah dèch claih,
ta 'bài mangai ma ŏi xrong aih,
Chuaq jah creo ca wì haq.”