Xôpha Doi Mangai Dù Ùh Jah 'Blêq
1Èh Xôpha mangai Na-a-ma tèo:
2“Taiq nen hèm manhài ta manoh au,
wa taiq bàu aih, manoh au tadroq ta chac au.
3Au khoi tàng bàu trech broq ca au camaih;
wa manoh loq tàng da au parông au tèo hlài.
4“Ìh i loq enh 'nhòng calah nèh,
enh jò baxèm broq loh con mangai ta crŏng taneh,
5èh bìac jah ta'blêq da mangai ngang dù ùh dùnh,
wa bìac lem bùi da mangai ùh lùi Boc Plình mòiq rahyàc raq hêq.
6'Nhac ca bìac haq catèh tŏc trùh ta plình,
wa 'nhac ca gàu haq achùq 'mòi yùc,
7Haq cachìt hnhung hloi hloi tìah ca ìch tèm đac;
'bài mangai khoi lah hnoq haq jah bòch: Haq ŏi ta leq?
8Haq jah pan hnhung đac tìah ca bìac apô hnoq,
ùh i cabô chaq hnoq haq; haq hnhung đac 'màng ca bìac cùi apô hnoq damang.
9Mat ma khoi lah hnoq haq, èh pi jah hnoq hòm haq;
nòi haq ŏi hadai pi blèch ngan haq.
10Èh mangai pa jah baxa padit con caiq haq,
wa con caiq haq ep đèn hlài cùng hang ma haq khoi yŏc.
11Caxènh haq 'nhac ca bình padren jò ŏi thì;
mahaq jah ca'nùng pajùm ti haq ta blo taneh.
12“ 'Nhac ca bìac dù broq ca hacùng haq nhim;
wa 'nhac ca bìac aih hlèp enh 'neq ca rapet haq,
13Haq ùh cachôh đac,
mahaq bàm hlài ta hacùng haq;
14Jò mùt ta cliac, dahwèq caq jah wìa nŏc đùc da bìh tùa ta cliac haq.
15Haq lŏn cùng hang, khoi èh hac hlài;
Boc Plình 'noh đac bìac aih loh khoi enh cliac haq.
16Haq trôt nŏc bìh tùa;
mahaq rapet bìh plŏng jêh đac haq.
17Haq ùh jò leq jah nhàn yŏc diac xùt
sùa wa ramaq hìu loh tìah ca cròng diac.
18Haq ep am hlài dahwèq da bìac haq ma broq, ùh jah lŏn bìac aih;
ep đèn hlài tiaq jaq haq khoi broq, ùh jah hùang cùng hang aih.
19Taiq haq khoi padit padiang wa cađac hèt mangai pa,
tablah yŏc hnem haq ùh broq.
20“Taiq cliac haq ùh loq panàc,
'màng aih ùh i ca cah cleq haq enh waq ma jah claih khoi ca tì haq.
21Ùh i ca cleq ŏi atìq ca haq yŏc;
taiq 'màng aih bìac padrŏng da haq ùh jah cajap dùnh.
22'Nang jò tàu tìa dìq jaq, haq loh ca nan no; bìac nan xa càn jah ta-ùc ti haq.
23Jò haq caq panàc,
Boc Plình ùc 'noh can nòih ta haq jò haq 'nang caq.
24'Nhac ca haq mot claih ca ranac xam mem,
panenh xam đùng jah penh hlùh haq.
25Haq dŏt rang panenh loh khoi enh crŏng haq;
mùh rang chah dŏt khoi enh clèm haq; i bìac ramòt loh ca haq.
26Dìq ca cùng hang canaq 'bac da haq jah 'bìq tèm đac ta clam clôiq khoi padon đòiq;
ùnh ma ùh ep hlôi jah bùh haq; mangai ma ŏi xrong ta traiq haq jah 'bìq bùh đac dìq dŏng.
27'Bài lòp plình jah pa'noh da haq bìac dù;
taneh jah yòng tajraq hlài ca haq.
28Dahwèq ta hnem haq 'bìq 'nong lam hnhung dìq dŏng,
cùng hang haq jah bahìu đac ta hì loh nòih da Chuaq.
29Aih bìac Boc Plình ma padon đòiq ca mangai ngang dù, phàn aih cùng hang Boc Plình pajaq am ca haq.”