1Weꞌe leꞌa angel wa cha mluu dub yowbeꞌe umbiꞌi ncho nits nsaꞌa gealnaban, nits waꞌán cuent naꞌ vidr naꞌ. Leꞌa yowbeꞌe wa ntoꞌo sa nsob Dios nsea sa nsob Borreg Ben. 2No ntid‑a tlaw nes ten gezh wa. Nsea itop toꞌo yowbeꞌe wa ndiꞌib be ya nsaꞌa gealnaban. Leꞌa kadga dub mbeꞌe nsaꞌa‑yá xaꞌaga ngus. Leꞌa la ten ya wa leꞌa nyunyakna be men. 3Leꞌa sa wa lá yoota be taꞌa lá nsak ladna Dios. Leꞌa len gezh wa kwe sa isob Dios nsea Borreg wa. No be men ndun tiꞌin ndoꞌ Dios yankea bexa xa. 4No iniꞌíndoꞌ bexa Dios, nsea leaꞌ Dios ikea xtuzh bexa. 5Yá naꞌantapa yoo teꞌal sa wa, ni lá ikiꞌin bexa xeꞌa ni xeꞌa wizh. Leꞌa Dios Xa Nibeꞌe wa leꞌa nak xeꞌa sa wa, nsea inibeꞌe bexa sa wa idub tiemp.

6Cha ndab angel wa ndoꞌ naꞌ:

—Leꞌa be diꞌizh ndee uzhebpa dub diꞌizh nsak no gealngea‑yá. Leꞌa Dios Xa Nibeꞌe wa, xa na nsaꞌa Espíritu ten na ndoꞌ bexa ndadiꞌizh sakndoꞌ xa wa, leꞌa xa wa mtuꞌub dub angel ten xa ndontsa uluu xa be ta sken yoo wa ndoꞌ bexa ndun tiꞌin ndoꞌ xa.

7Leꞌa Jesús cha ndab:

—¡Blaꞌach bego, leꞌa naꞌ sken ilen! Uzhebpa wen yoo ladna bexa na nsakyoꞌón be diꞌizh ten Dios ta nsoꞌ ndoꞌ libr ndee.

8Leꞌa naꞌ ndee Juan mbín naꞌ no uní naꞌ be ta ndee wa. Leꞌa tsoꞌo na mbín naꞌ be ta ndee no uní naꞌ‑yá, cha usaxib naꞌ gast ndoꞌ yo ngol xtuzh naꞌ, ndiꞌizh gankeꞌa naꞌ angel, xa li mluu be ta ndee ndoꞌ naꞌ wa. 9Parea leꞌa angel wa ndab ndoꞌ naꞌ:

—¡Naꞌanpa lbaꞌa gun lu! Leꞌa naꞌ ndee ndun tiꞌin ndoꞌ Dios lak ndunga lu tiꞌin ndoꞌ Dios nsea bexa ltsaꞌa lu, bexa ndadiꞌizh sakndoꞌ Dios, no bexa na nxobgek ndoꞌ ta nkea ndoꞌ libr ndee. Ndi wankea Dios.

10Cha ndab xa ndoꞌ naꞌ:

—Naꞌanpa ukachko lu be diꞌizh mbidiꞌizh Dios nkea ndoꞌ libr baꞌ, leꞌa tiemp yoo be ta nkea ndoꞌ libr baꞌ yá nsaso gax. 11Leꞌa bexa ndun be ta ugap no bexa ndun be ta bzhiꞌik, lbaꞌatsa gunta bexa be ta wa. Leꞌa bexa ndun be ta utsin nak, lbaꞌatsa utsin gunta bexa. No liga leꞌa bexa umbiꞌi nak ndoꞌ Dios, lbaꞌatsa umbiꞌi gakta bexa.

12Cha ndab Jesús:

—Blaꞌach bego leꞌa naꞌ sken ilen, cha usa naꞌ ta ikaꞌa kadga dub men lak nak be ta mbin bexa. 13Leꞌa naꞌ ndee nak Alfa nsea Omega, leꞌa naꞌ mtexan iteanak be taꞌa no leꞌaka naꞌ unitndoꞌ‑yá. No nak naꞌ xa ned no xa tsoꞌo li ndoꞌ itea be taꞌa.

14Uzhebpa wen yoo ladna bexa umbiꞌi nak ladoꞌo na ndoꞌ Dios. Leꞌa bexa wa nsabndoꞌ gaw ngus ten ya nsaꞌa gealnaban, no yate bexa toꞌo puert ten gezh wa. 15Parea leꞌa bexa ugap nak yaꞌanbe tsoꞌo juer. Leꞌa ta wa bexa ndun be ta bruj, no bexa ngal dub xa naꞌanpa xa ten xa, no bexa ndut men, no bexa ndankea be dios gizhliyo, nsea itea bexa ndal ladna ndun be gealkwiꞌin.

16Cha ndab Jesús:

—Leꞌa naꞌ ndee Jesús mtuꞌub angel ten naꞌ gudiꞌizh be ta ndee ndoꞌ bexa nak xmen naꞌ. Leꞌa naꞌ ndee nak bi leꞌaka ras ten David. No nak naꞌ mbeal siꞌil nsu xeꞌa gor tempran.

17Cha ukaꞌab Espíritu ten Dios nsea xagots nak cheꞌal Borreg Ben wa, bexa nak be xmen Jesús, ndab bexa:

—Utsea go, Jesús.

Leꞌa bego na ndoꞌón ta ndee gud bega:

—Utsea go, Jesús.

Tal ncho bega ndak ladna, nlad bega goo bega nits nsaꞌa gealnaban, utseayoo bega‑yá, leꞌa xa ga nsaꞌa‑yá.

18Leꞌa naꞌ gáp ndoꞌ itea bexa na ndoꞌón diꞌizh mbidiꞌizh Dios nkea ndoꞌ libr ndee: Tal ton dub xa kota diꞌizh ndoꞌ be diꞌizh ten Dios ndee, leꞌa Dios utsaksi xa no iteanak be gealkweaꞌ nkeaniꞌi ndoꞌ libr ndee. 19No tal ton koꞌo diꞌizh mbidiꞌizh Dios nkea ndoꞌ libr ndee, leꞌa Dios koꞌoga leaꞌ xa ndoꞌ libr ten gealnaban, no lá ulaꞌa Dios yate xa gezh nsak ten Dios, lak nkeaniꞌi ndoꞌ libr ndee.

20Leꞌa xa ndadiꞌizh be ta ndee wa ndab:

—Leꞌa naꞌ skenka ilen.

Lika gak‑a. ¡Utsea go Jesús Xa Nibeꞌe besa!

21Nat naꞌab naꞌ ndoꞌ Jesucristo Xa Nibeꞌe, uzheꞌeb utsin gunno xa iteanak bego baꞌ. Lika nak‑a.