1No nsabndoꞌ yakbeꞌena lu leꞌa gal be wizh lult leꞌa be men uzhebpa juert itid. 2Leꞌa gal zha wa yoo bexa ikweaꞌ ladna leꞌatsa xa, no isaꞌab ladna bexa gap xa sian med, no izhinnona bexa be ta ndáktsa xa, no gunbeꞌe bexa leꞌa xa mas nsak ndoꞌ itea men, no inisi bexa be men, no lá uxobgek bexa ndoꞌ xus xa, no nunk bexa lá iten ladna dub taꞌa, no lá gun bexa lak nlad Dios. 3No lá ikweaꞌ ladna bexa be ltsaꞌa xa, no ni lá gungeꞌ ladna bexa ndoꞌ be men, no gudiꞌizh bexa cuent gix, no gun bexa sbeꞌen be ta nladtsa xa, no xela gunno bexa be men, no ixee ladna bexa ndoꞌ be ta wen nak. 4No yun bexa cuent leꞌaka ltsaꞌa xa, no ni lid ned gunbeꞌe bexa gun bexa dub taꞌa, no gunbeꞌe bexa leꞌa xa uzhebpa dub xa wen, no mas ukwaꞌan bexa ta nladtsa bexa, cha ni lá ukwaꞌan bexa Dios. 5No gunta bexa ndankea Dios bexa, no lá ulaꞌa bexa gun juers ten Dios tiꞌin len ladoꞌo bexa. Naꞌanpa uchealtsaꞌa lu bexa li nak wa.

6Leꞌa ncho bexa wa ndaꞌ ta lid be men, cha nkwiꞌinno xa be xagots ndidotsa ndák. Leꞌa be xagots wa bexa ndap ke, ndun bexa guniꞌi xtaꞌan be ta ugap ndoꞌón bexa. 7Nsakyoꞌón bexa be ta ndadiꞌizh be men, parea lá gun bexa gan igondoꞌ bexa gealngea. 8Lak lá nsak ladna Janes no Jambres ta mbin Moisés, no liga leꞌa be xabgiꞌi ugap wa lá nsak ladna gealngea. Leꞌa bexa wa sbeꞌen ta ugap ndanbeꞌe, no naꞌanpa ndangea ladna bexa Dios. 9Parea leꞌa bexa wa naꞌanpa kwen ukwiꞌinno be men, leꞌa itea be men sniꞌí leꞌa ta ndun bexa wa lid leꞌa nak, lak ngwasea Janes nsea Jambres.

10Parea leꞌa lu uniꞌíka xteꞌe nluu naꞌ be men, no xteꞌe nak naꞌ, no xteꞌe ndun naꞌ juers gun naꞌ dub tiꞌin, no xteꞌe ngeꞌ lad naꞌ Cristo, no xteꞌe nxik naꞌ ndoꞌ be men, no xteꞌe nkweaꞌ lad naꞌ be men, no xteꞌe ndun naꞌ tiꞌin ten Dios maska bid‑a. 11No uniꞌíka lu xteꞌe xela mbinno bexa naꞌ, no xteꞌe sian gealkweaꞌ utiꞌid naꞌ gezh Antioquía no gezh Iconio no gezh Listra. Uzhebpa xela mbinno bexa naꞌ, parea leꞌa Dios Xa Nibeꞌe uloꞌo naꞌ ndoꞌ ta wa. 12No liga xela gunno be men itea bexa na nlad gun ta wen, bexa ngeꞌ ladna Cristo Jesús. 13Parea leꞌa bexa ugap wa no bexa ukwiꞌin wa ndi mas ugap yakbe. Leꞌa bexa wa ukwiꞌinno be men, no liga ukwiꞌinno be men bexa.

14Parea lá ulaꞌa lu be ta mtsid lu, be ta mbingea ladna lu, leꞌa lu nchandoꞌka besa na mluu ta wa ndoꞌ lu. 15Leꞌa zha tuzhta lu mtsid lu lak nkeaniꞌi diꞌizh ten Dios. Leꞌa diꞌizh wa sun gan mas gák lu, ndontsa gap lu gealnaban ndoꞌ Dios, no mas igeꞌ ladna lu Cristo Jesús. 16Leꞌa itea be taꞌa nkeaniꞌi diꞌizh ten Dios wa, leꞌa Dios msaꞌa‑yá ndoꞌ bexa na mkeꞌa‑yá. Leꞌa ta wa suꞌu uluu beuna, no ndab‑a xteꞌe nsabndoꞌ gun beuna, no xteꞌe yoo beuna nes ten Dios, no xteꞌe wen gak beuna, 17ndontsa gak be xmen Dios idub lak nlad Dios, no isuꞌu beuna gun beuna itea be ta wen.