2Ye nuŋgbolo jan, yanla sɛnrɛ ti logo jɛŋgɛ,

yege yaga ye ko kala nuŋgba lo pye yanla kotogo ki sogo na na!

3Yanla kala li kun ye yɛɛ ni, jaŋgo mbe para,

na mi ka para mbe kɔ, yaa ki lakoo na na.

4Naga yɛn ma, na kayaŋga ki yɛn sɛnwee wo ni wi le?

Yiŋgi na mi se si kɔnrɔ ta?

5Ye kanŋga yanla kala li wele, ki yaa to ye yɔn na,

fɔ ye yaa kɛɛ taga yɔn na mbe pyeri.

6Na mi kaa sɔnri na yɛɛ kala li na, na sunndo wi maa kɔɔn na na,

fɔ na wire ti maa seri na na fɔ jɛŋgɛ.

7Yiŋgi na lepeele pe si yɛn yinwege na?

Yiŋgi na pe mɛɛ lɛ fɔ ma fanŋga ta?

8Pe setirige piile pe ma yiri ma fanŋga ta pe yɛgɛ na, ma pye le pe ni;

pe pishyɛnwoolo pe ma yiri ma lɛ pe yɛgɛ na.

9Yɛyinŋge ki yɛn wa pe yinrɛ ti ni, fyɛrɛ kpɛ woro pe na;

Yɛnŋɛlɛ li leele gbɔngbɛgɛ kila gbɔn pe na.

10Pe napɛnɛ pe ma pye fanŋga ni, na siin nanɛɛlɛ pe na;

pe nanɛɛlɛ pe maa siin, wa kugbɔ na jɔgɔ.

11Pe ma pe piile tumɔmbɔlɔ pe yaga pe maa fee na mari paa simbaŋgbelege yɛn;

pe piile pe maa jinrigi na yeni na kanni.

12Pe maa yuuro koo na pimbigile naa juruye gbɔɔn,

na yɔgɔri wegele winmɛ ni.

13Pe ma pe yinwege ki pye wa fɛrɛwɛ pi ni,

ko puŋgo na, pe ma tigi ma kari yɛw wa kuulo tara.

14Ma sigi ta, poro pàa pye naga yuun Yɛnŋɛlɛ li kan fɔ: «Ma yɛɛ laga lali we ni,

we woro na jaa mbɔɔn koŋgolo ke jɛn.

15Ambɔ wi yɛn yawa pi ni fuun fɔ wo, we sila wi gbogo?

Na we kaa li yɛnri, yiŋgi we yaa ta wa ki ni?»

16Mbe sigi ta, ki leele pe fɛrɛwɛ pi woro poro jate kɛɛ.

Yɛnŋɛlɛ sanla shɔ mbe taga ki lepeele pe kagala ŋgele pè kɔn mbe pye ke na!

17Naga yɛn ma, ki yɛn kaselege fɔ lepeele pe yinwege fitanla wi ma figi fyaw le?

Naga yɛn ma, jɔgɔwɔ maa tuun pe na wi le?

Naga yɛn ma, Yɛnŋɛlɛ li naŋgbanwa kala li yaa to pe na wi le?

18Leele pe maa ki yuun ma yo fɔ ki daga pe pye paa yan waga yɛn, ŋga tifɛlɛgɛ ki maga lɛ,

nakoma paa yan sigire yɛn, nda tisaga tifɛliŋgbɔgɔ ki mari lɛ mbe kari ti ni.

19Ye maa ki yuun ma yo fɔ Yɛnŋɛlɛ li yaa ka lepee wi kapere ti fɔgɔ tɔn wi piile pe na;

ɛɛn fɔ ki ja daga Yɛnŋɛlɛ ligi fɔgɔ tɔn wo yɛrɛ jate wi na, jaŋgo wigi jɛn ki yɛn yɛgɛ ŋga na.

20Ki ja daga lepee wuu yɛɛra jɔlɔgɔ kagala ke yan yɛnlɛ ni,

Yawa pi ni fuun fɔ wi naŋgbanwa kala li daga mbe to wo na.

21Na wi yinwege kiga ka kɔ mbe wɔ wa,

wi kala la na pye wi go woolo pe ni naa wi puŋgo na.

22Lere se ya mbe jɛnmɛ naga Yɛnŋɛlɛ li na,

lo na li maa mɛrɛgɛye pe kiti wi kɔɔn we.

23Lere wa ma ku mboo ta wi witige fanŋga ki ni bere,

wi ma ku yɛyinŋge na konaa jatere wi ni wi yɛn ma cɛn wi na.

24Wi ma gbɔgɔ ma liri wi kanŋgaya yi na,

wi kajeere ti ma pye ma yinyin sɔmbɛ ni.

25Lere wa yɛgɛ ma ku wi nawa pi ni pì tanga wi na,

wila fɛrɛwɛ kpɛ ta.

26Ɛɛn fɔ ki leele shyɛn pe ni fuun pe ma ye wa fanga ki ni,

fyɛnrɛ ma ye pe ni fuun shyɛn pe ni.

27Ye wele, mì ye nawa jatere wi jɛn,

ye yɛn na tipege ŋga sɔnri na ni, mìgi jɛn.

28Ye maa ki yuun ma yo fɔ: «Ki naŋa fanŋga fɔ wi go ki yɛn se yeri yiŋgɔ?

Ki lepee wìla pye ma cɛn paraga go ŋga ni, ki yɛn se yeri?»

29Naga yɛn ma, ye sila kondorowolo pe yewe wi le?

Ŋga pàa yan ma yo ye kan, ye woro na jaa mbe yɛnlɛ ki na wi le?

30Jɔlɔgɔ ki panmbilige, lepee wi ma shɔ ki kɛɛ,

Yɛnŋɛlɛ li naŋgbanwa pilige ki na, yaraga ka na pye wi na.

31Ambɔ wi mbe ya yere wi yɛgɛ sɔgɔwɔ mboo jɛrɛgi?

Ambɔ wi yaa ta mboo kapege ki fɔgɔ tɔn wi na?

32Na wi ka ku, pe maa gboo wi lɛ ma kari wi ni wa fanra ti ni,

pe maa wele wi fanga ki na.

33Leele pe ni fuun pe ma taga wi gboo wi puŋgo na,

janwa gbɔlɔ ma keli wa gboo wi yɛgɛ na tanri,

fanga ki kanimboro ti ma tifaga wi na.

34Naga yɛn ma, ye mbe ya mbanla kotogo ki sogo mɛlɛ ye sɛnwara ti ni?

Sɛnrɛ nda fuun yè yo mala yɔn sogo, ti yɛn leele fanlasɛnrɛ.