Cɛngɛlɛ ke ni fuun ke yaa ka kari wa Zheruzalɛmu
1Kagala ŋgele koro Yɛnŋɛlɛ làa naga Amɔzi pinambyɔ Ezayi wi na Zhuda tara naa Zheruzalɛmu ca ki wogo na.
2Wagati wa yɛn wa na paan, Yawe Yɛnŋɛlɛ li shɛrigo gbɔgɔ ki yɛn ma kan yanwiga ŋga na,
ko ki yaa ka pye yanwira ti ni fuun ti go na;
ki yaa ka yagara tinndiye pe ni fuun pe na.
Cɛngɛlɛ ke ni fuun ke yaa kaa gbinri mbaa paan wa ki na.
3Tara lɛgɛrɛ woolo yaa kaa paan wa, mbaa yuun fɔ:
«Ye pan we lugu we kari wa Yawe Yɛnŋɛlɛ li yanwiga ki na,
wa lo na Zhakɔbu Yɛnŋɛlɛ li shɛrigo gbɔgɔ ki ni,
jaŋgo li we naga li koŋgolo ke ni,
waa tanri li koŋgolo ke na.
Katugu pa lasiri sɛnrɛ ti yaa ka yiri wa Siyɔn ca ki ni,
pa Yawe Yɛnŋɛlɛ li sɛnrɛ ti yaa ka yiri wa ko ŋga Zheruzalɛmu ca ki ni.»
4Yɛnŋɛlɛ li yaa kaa kiti wi kɔɔn cɛngɛlɛ ke sɔgɔwɔ,
li yaa kaa cɛngɛlɛ lɛgɛrɛ woolo kagala yɛgɛ woo.
Kona pe yaa ka pe tokobiye pe gbɔn mbe pe pye falinɛrɛ capire,
mbe pe njaanra ti gbɔn mberi pye mali kɔngbeŋgele.
Cɛnlɛ la se ka yiri cɛnlɛ la yɛgɛ kɔrɔgɔ malaga ni naa,
pe se kaa malaga gbɔngɔ ki fɔrɔgi naa.
5Yoro Zhakɔbu setirige piile,
ye pan waa tanri wa Yawe Yɛnŋɛlɛ li yanwa pi ni.
Yɛnŋɛlɛ li kiti kɔnpilige ki yɛn na paan
6Kaselege ko na, Yawe Yɛnŋɛlɛ, mà je ma woolo, Zhakɔbu setirige piile pe na,
katugu pe tara ti yɛn ma yin yɔnlɔ yirisaga kɛɛ woolo pe kalɛgɛlɛ ke ni;
pe maa jɛɛrɛ kapyere piin paa Filisiti tara fɛnnɛ pe yɛn;
pè pye tara ta yɛgɛ woolo pinlɛyɛɛnlɛ.
7Pe tara ti yɛn ma yin warifuwe naa tɛ wi ni,
yɔn woro pe yarijɛndɛ tɛgɛsara yarijɛndɛ ti na.
Pe tara ti yɛn ma yin shɔnye pe ni,
yɔn woro pe malaga gbɔn wotoroye pe na.
8Pe tara ti yɛn ma yin yarisunndo ti ni.
Pe maa fɔli yaara nda poro yɛrɛ jate pè gbegele ti yɛgɛ sɔgɔwɔ nari gbogo;
pe maa fɔli pe yɛɛra kɛɛ tunndo ti yɛgɛ sɔgɔwɔ nari gbogo.
9Ki kala na, sɛnwee piile pe yaa ka go sogo,
sɛnweele pe yaa ka fɛrɛ shɔ.
Ɛɛn fɔ Yawe Yɛnŋɛlɛ, maga ka pe kala yaga!
10Ye sa ye wa waliwere ti ni,
ye lara wa tara ti nɔgɔ,
Yawe Yɛnŋɛlɛ li yɛn na sunndo kɔngɔ ŋga waa, ye lali ki ni,
konaa li gbɔgɔwɔ yanwa pi ni.
11Lere ŋa wi maa yɛgɛ tungu leele na, wi yaa ka go sogo,
lere ŋa wi maa wi yɛɛ mbɔnrɔgi leele na, wi yaa ka fɛrɛ shɔ;
Yawe Yɛnŋɛlɛ lo nuŋgba pe lo li yaa ka gbɔgɔwɔ ta ko pilige ko ni.
12Kaselege ko na, Yawe Yɛnŋɛlɛ na yawa pi ni fuun fɔ, lì pilige ka kɔn ma tɛgɛ,
mbe yiri mbele fuun pe maa yɛgɛ tungu leele na konaa mbele pe maa pe yɛɛ gbogo pe kɔrɔgɔ;
jaŋgo mbe pe tirige.
13Li yaa ka yiri Liban tara sɛdiri tire nda tì tɔnlɔndɔnlɔ ma yagara ti ni fuun ti kɔrɔgɔ,
naa Bazan tara tigbɔrɔ ti ni fuun ti kɔrɔgɔ.
14Li yaa ka yiri yanwira titɔɔnrɔ ti ni fuun ti kɔrɔgɔ,
konaa tinndiye mbele fuun pè yagara pe kɔrɔgɔ;
15mbe yiri malaga sigesanŋgazoye titɔnlɔmbɔlɔ pe kɔrɔgɔ,
konaa malaga sigemboro nda tì liri ti ni fuun ti kɔrɔgɔ;
16mbe yiri Tarisisi tɔnmɔkɔɔrɔ tugbɔɔrɔ ti ni fuun ti kɔrɔgɔ,
konaa tɔnmɔkɔɔrɔ tiyɔnrɔ sɔnŋgbanga woro ti ni fuun ti kɔrɔgɔ.
17Sɛnwee pyɔ ŋa wi maa yɛgɛ tungu leele na, wi yaa ka go sogo,
lere ŋa wi maa wi yɛɛ mbɔnrɔgi leele na, wi yaa ka fɛrɛ shɔ.
Yawe Yɛnŋɛlɛ lo nuŋgba pe lo li yaa ka gbɔgɔwɔ ta ko pilige ko ni.
18Yarisunndo ti ni fuun ti yaa ka kɔ mbe wɔ wa.
19Leele pe yaa ka ye wa waliwere ti ni,
mbe ye fɔ wa tara ti nɔgɔ,
mbe lara Yawe Yɛnŋɛlɛ li yɛn na sunndo kɔngɔ ŋga waa ki yɛgɛ,
konaa li gbɔgɔwɔ yanwa pi yɛgɛ,
na liga ka yiri mbe fyɛrɛ wa tara woolo pe na sanga ŋa ni we.
20Ko pilige ko ni, warifuwe yarisunndo konaa tɛ yarisunndo nda sɛnwee piile pè gbegele,
na foli ti yɛgɛ sɔgɔwɔ nari gbogo,
pe yaa kari wa ndagasɛnɛ naa ndiire ti kan.
21Leele pe yaa ka ye wa waliwere ti ni,
mbe ye fɔ wa yanwira were ti ni,
mbe lara Yawe Yɛnŋɛlɛ li yɛn na sunndo kɔngɔ ŋga waa ki yɛgɛ,
konaa li gbɔgɔwɔ yanwa pi yɛgɛ,
na liga ka yiri mbe fyɛrɛ wa tara woolo pe na sanga ŋa ni we.
22Yaga ka ye jigi wi taga sɛnwee pyɔ na,
katugu na wi yinwege wɔnwɔn po ka ya yere, wi wogo ki ma kɔ.
Yiŋgi wi mbe ya yɔn naa?