1Nau noch dee sacha is es zu kumma es da Jesreeliddah Naboth en vei-goahra katt hott in Jesreel nayvich em kaynich-haus fumm kaynich Ahab funn Samaria.

2Da Ahab hott no ksawt zumm Naboth, “Loss mich dei vei-goahra havva fa en graut-goahra raus macha veil dei goahra nayksht an mei kaynich-haus is. Ich gebb diah en bessahrah vei-goahra an demm sei blatz. Adda vann du's havva vitt, betzawl ich dich vass eah veaht is in geld.”

3Avvah da Naboth hott ksawt, “Loss da Hah mich shtobba, eb ich di eahbshaft funn mei foah-feddah zu diah gebb.”

4Da Ahab is haym ganga, zannich un am brutza veil da Naboth funn Jesreel ksawt hott, “Ich gebb diah nett di eahbshaft funn mei foah-feddah.” Eah hott sich uf sei bett glaykt, hott sei ksicht vekk gedrayt un hott nix gessa.

5Avvah sei fraw di Jesebel is rei kumma un hott een kfrohkt, “Favass bisht du am brutza? Favass esht du nett?”

6Eah hott ksawt, “Veil ich kshvetzt habb zumm Naboth, da Jesreeliddah, un ksawt habb, ‘Fakawf miah dei vei-goahra, adda ich gebb diah en anra vei-goahra difoah, vann du vitt.’ Avvah eah hott ksawt, ‘Ich gebb diah mei vei-goahra nett.’ ”

7Sei fraw di Jesebel hott ksawt, “Is dess vi du dich ohshikka setsht es da kaynich funn Israel? Shtay uf, ess un sei fraylich. Ich grikk diah da vei-goahra fumm Naboth, da Jesreeliddah.”

8See hott no breefa kshrivva im Ahab sei nohma, hott sei seal druff gedu un hott si zu di eldishti un evvahshti kshikt im Naboth sei shtatt.

9See hott dess kshrivva in di breefa:

11So henn di eldishti un di evvahshti es im Naboth sei shtatt gvoond henn gedu vi di Jesebel ksawt hott in di breefa es see eena kshrivva katt hott.

12Si henn en fasht ausgevva un henn da Naboth ovvich di leit kokt.

13No henn si zvay nix-nutzichi mennah uf di annah seit funn eem kokt. Si henn da Naboth faglawkt fannich di leit un henn ksawt, “Da Naboth hott Gott un da kaynich faflucht.” No henn si een aus di shtatt gnumma un henn een doht kshtaynicht.

14No henn si vatt zu di Jesebel kshikt un henn ksawt, “Da Naboth voah kshtaynicht un is doht.”

15Yusht so kshvind es di Jesebel keaht hott es da Naboth doht kshtaynicht voah, hott see ksawt zumm Ahab, “Shtay uf un nemm em Naboth funn Jesreel sei vei-goahra es eah's nett gedu hott fa diah fakawfa. Eah laybt nimmi, avvah is doht.”

16Vo da Ahab keaht hott es da Naboth doht voah, is eah ufkshtanna, is nunnah ganga un hott em Naboth sei vei-goahra ivvah-gnumma.

17No is es vatt fumm Hah zumm Elia da Thisbiddah kumma, un hott ksawt,

18“Gay nunnah zumm Kaynich Ahab funn Israel. Eah is in Samaria, un is im Naboth sei vei-goahra. Eah is datt anna ganga fa da vei-goahra ivvah-nemma fa sich selvaht.

19Sawk zu eem, ‘Dess is vass da Hah sawkt: Hosht du en mann doht gmacht so es du sei land nemma kansht?’ No sawk zu eem, ‘Dess is vass da Hah sawkt: Im blatz vo di hund em Naboth sei bloot ufkshlekt henn, zayla di hund aw dei bloot ufshlekka.’ ”

20No hott da Ahab ksawt zumm Elia, “So du hosht mich kfunna, mei feind.” “Ich habb dich kfunna,” hott da Elia ksawt, “veil du dich fakawft hosht fa evil du im Hah sei awwa.

21So da Hah sawkt, ‘Ich zayl evil uf dich bringa un dich folshtendich vekk keahra. Ich zayl lohs vadda funn alli letshtah mann im Ahab sei family in Israel, eb eah en bunds-gnecht is adda frei is.

22Ich zayl dei family macha vi di family fumm Jerobeam, em Nebat sei boo, un vi di family fumm Baesa, em Ahia sei boo. Ich zayl dess du veil du mei zann ufkshtatt hosht un Israel gmacht hosht sindicha.’

23Un veyyich di Jesebel sawkt da Hah, ‘Di hund zayla di Jesebel fressa an di vand funn Jesreel.’

24Ennich's fumm Ahab sei freindshaft es shtaubt in di shtatt zayld kfressa sei bei di hund, un selli es shtauva aus di shtatt zayla di fekkel fressa.”

25(Es voah nee nimmand es sich fakawft hott fa evil du im Hah sei awwa vi da Ahab—un dess bei sich fashtifta lossa bei di Jesebel, sei fraw.

26Eah hott grausami sacha gedu bei abgettah nohch gay, vi di Amoriddah gedu henn, dee es da Hah aus em land gedrivva hott fannich di Kinnah-Israel.)

27Vo da Ahab dee vadda keaht hott, hott eah sei glaydah farissa, hott sekk-glaydah ohgedu un hott kfasht. Eah hott kshlohfa in sekk-glaydah un is bedreebt rumm heah ganga.

28No is es vatt fumm Hah zumm Elia da Thisbiddah kumma un hott ksawt,

29“Hosht du ksenna vi da Ahab sich gedaymeedicht hott fannich miah? Veil eah sich gedaymeedicht hott fannich miah, zayl ich dess evil nett kumma lossa in sei dawwa, avvah ich bring's uf sei family in di dawwa funn seim boo.”