1Wakufunidwa, lekani kubvuma mzimu uli wentse. Pakuyamba tomani mwawona kuti mzimuyo nja Mulungu, thangwe apfundzisi azinji wakunama ali kupfundzisa kale wanthu bzakunama mudziko. 2Na tenepo zindikirani kuti Mzimu wa Mulungu nguponi: ngule omwe umbabvuma kuti Jezu Krixtu akhali munthu. 3Tsono mzimu wentse omwe umbalamba Jezu iwo ngwa Mulungu lini, iwo ngwa muwengi wa Krixtu, ninga momwe muli kubvera kuti iye ali kubwera, ndipo tsapano lino ali pantsi pano kale. 4Tuwanamwe, imwepo ndimwe wana wa Mulungu ndipo mwakunda kale apfundzisi wa kunama thangwe mzimu omwe una imwepoyo ngukulu kuposa wa ule omwe ali pantsiyo. 5Iwo umbacita ucipfundzisa pomwe bzinthu bza mudziko, na tenepo wanthu wa mudzikomo ambawutetekera. 6Ife ndife wa Mulungu, ule omwe ambadziwa Mulungu ambatibvera. Ndipo ule omwe ngwa Mulungu lini ambatibvera lini. Na tenepo timbazindikira mzimu wa cadidi na wakunama.

7Wakufunidwa, mbaticitire lufoi andzathu thangwe lufoi limbacokera kuna Mulungu, na tenepo munthu wenste omwe ana lufoi ni mwana wa Mulungu ndipo iye animudziwa Mulunguyo. 8Ule omwe alibe lufoi animudziwa lini Mulungu, thangwe Mulungu ngwa lufoi. 9Ndipo Mulungu adatilatiza lufoi lace tenepa: adatumiza Mwana wace m'bodzi yekha padziko la pantsi kuti adzatipase moyo. 10Ndipo lufoiro ndiri: Sikuti ife-pano ndife tidafuna Mulungu tsono kuti iye ndiye adatifuna. Iye adatumiza Mwanace omwe adabzicita ntsembe pankhankha ya bzakuipa bzathu. 11Wakufunidwa, nakuti Mulungu adaticitira lufoi, na tenepoyo ife-pano mbaticitiranembo lufoi. 12Palibe munthu omwe adawona kale Mulungu, tikacitirana lufoi Mulungu an'khala ife, ndipo lufoi lacero linilatizika na ife. 13Na tenepo ife-pano tidziwa kuti tina iye, na iyembo ana ife thangwe iye adatipasa mzimu wace. 14Ndipo ife-pano tidawona ticikhala mboni kuti Baba adatumiza Mwana wace kuti akhale mpulumusi wa dziko la pantsi. 15Munthu omwe an'tsimikiza kulewa kuti Jezu Krixtu ni Mwana wa Mulungu, Mulungu an'khala na iye, na iyembo an'khala na Mulunguyo. 16Ndipo ife tin'dziwa lufoi lomwe Mulungu analo na ife ndipo timbakhulupira lufoi limwero. 17Na tenepo, uku ndiko kucita kwathu na lufoi kuti pantsiku yomwe Mulungu an'dzatonga wanthu wentse tidzakhale na cikhulupiro, thangwe pantsi pano, ife tidalinganira Iye. 18Ule omwe ana lufoi alibe mantha, thangwe lufoi la cadidi limbacosa mantha, thangwe manthayo yambasuza nyathwa. Nakuti munthu omwe anibva mantha alibe lufoi la cadidi. 19Ife timbacita lufoi thangwe Mulungu ndiye adayamba. 20Penu munthu anilewa kuti: “Ndina lufoi na Mulungu” ndipo iye aciwenga m'bale wace, iye n'nyakunama. Nakuti ule omwe an'saya kucitira lufoi m'bale wace omwe ambamuwona, angacitire tani lufoi Mulungu omwe iye ambamuona lini? 21Nakuti iye adatipasa mtemo uyu: kuti ule omwe ana lufoi na Mulungu, mbacitirembo lufoi m'bale wace.