1Aboluganda, sinenda hulanduluhana mu hubalomera hu biŋamba hu biro nʼebiseera ebyo aŋa biryolera, 2olwohuba mwabeene mwesi muhimanyire bulaŋi muuti oludaalo lwʼohugobola hwa Musengwa luliba hyʼomwibi olu gaaja owiire nʼatalagire.* 3Olu abaatu baliba ni baloma baati, “Ha-a! Huli bulaŋi, ŋaŋuma hituluma.” Hu olwo ndolu ohusihiiriha hulibagwaho bugwe ni batetegehire ngʼolu ebise biija hu muhasi nʼalumwa ohusaala, era ŋalibula buŋonere. 4Aye enywe, aboluganda, simuli mu hiirema oludaalo olwo ko lubagweho bugwe hyʼomwibi olu gaaja ohwiba. 5Mwesimwesi muli baatu ba mumwi, era muli hyʼeswa esiisi ejija omuusi etangalwe, muli bamu muusi. Olwohuba efe abafugiirira sihuli bamugenda wiire, wayire abaholera mu hiirema.

6Olwʼehyo hutaŋenyuha hyʼabandi olu bali huŋenyuha aye hubeŋo moni, era ni muli balangaasa. 7Abaŋenyuha, baŋenyuha wiire; nʼabameera bameera wiire. 8Aye efe ngʼolu huli bamumwi, hutameera aye husigale ni huli balangaasa. Husaanira hwehinge ohuhola ebibi, ohufugiirira nʼohwendana ni biri njʼengabo yeefe, nʼesuubi lyʼobunoŋosi obuŋwa eyiri Yesu libe eyi huli hyʼekofiira eyʼehyoma eyiri omusirikale.* 9Olwohuba Hatonda sigatutegehera hutugudya mu hiruŋi hihye, ohutusaho ohutunoŋola nʼabita mu Musengwa weefe Yesu Kurisito, 10owatufiririra ko husobole ohuba balamu ŋalala ni naye, sisonga oba hufuuye oba huli balamu. 11Kale hiisi mulala hu nywe agumyenga owahye, era ni muyeedana ngʼolu muhola hatyane.

12Aboluganda, hubegayirira mumanye era muŋe eŋono abaatu ababaholamo omulimo, aba Hatonda gatobola ohubatangirira nʼohubegirisa ebi musaanira ohuhola. 13Mubatengamo eŋono bugali, era mubendenga olwʼomulimo ogu babaholamo. Mwihale bulaŋi ni mweŋalama nionionio ŋagati wenywe. 14Aboluganda, hubegayirira mulabulenga abahyenywe abaŋuuna ohulera engalo, mugumyenga abatali bagumu, muyeedenga abanafu, mugumiikirizenga bosibosi. 15Mubone muuti mu nywe simubangamo omuutu owʼoluboole. Ohutusaho habuhyabuhya mwegumyenga hiisi muutu ohuholera owahye ebiraŋi, ŋalala nʼabaatu bosibosi ohuŋirira ŋalala. 16Mubenga basangaafu habuhyabuhya. 17Mujumiryenga Hatonda hiisi hiseera. 18Mu byosibyosi, mweyaasenga olwohuba enywe ngʼabaatu ba Yesu Kurisito, ehyo Hatonda cʼehi genda muhole.

19Mumanya mutahayisanga Omwoyo Omutukuvu. 20Mutanyoomanga bunaabbi. 21Mwetegeresenga byosibyosi era mugumirenga hu hiraŋi, 22ni mwebaayanga hiisi hibi.

23Hatonda yeŋene atuŋa emiyaaya, abafuule abagwalaafu. Era muhuume emyoyo jenywe, obulamu wenywe nʼemibiri jenywe ni biri bulaŋi, Musengwa weefe Yesu nʼaliija mube ni mubulaho hyʼohubanenya. 24Owabalanga mwesigwa, era ehi gasuubisa alihyoheresa.

25Aboluganda, muteebirira hutusabirangaho. 26Muheese aboluganda bosibosi mu keesa eyʼabaatu abagwalaafu.

27Mbalagira, mu siina lya Musengwa weefe, ebbaluŋa yino muyisomere aboluganda bosibosi.

28Musengwa weefe Yesu Kurisito abaŋambire ehisasabirisi.