Yesu njʼebaale eryʼebbeeyi
1Olwʼehyo mwefihuleho ebibi byosibyosi, ohuhotogerera abaatu, obudulingi, obunafuusi, ekirihindi nʼohuloma ebibi hu bahyenywe. 2Ngʼolu baana abaŋere benda amabeere amatomwa ko bahule bulaŋi, mwesi muŋembenga hu hibono hya Hatonda mwahaŋangala mu bunoŋosi wenywe. 3Hyaŋandiihiwa hiiti, “Mwalega hu Musengwa weefe era mumanyire ngʼolu ali mulaŋi.”
4Mutiine eyiri Yesu Musengwa, ebaale eryʼebbeeyi eri baatu baagaana baati siryamugaso aye Hatonda galitobola lyaba lyʼebbeeyi eyi ali. 5Mwesi muli mabaale agʼebbeeyi aga Hatonda ali hutambisa ohutongola enyumba yiye. Mwesi muli basengi ba Hatonda abamuŋa eŋongo eyi musangaasa ohubita mu Yesu Kurisito. 6Hyaŋandiihiwa hiiti,
“Bona taaye ebaale mu Sayuuni,
erinatobola era eryʼebbeeyi,
era hiisi amwesiga saanahaswale.”
7Ebaale lino lyamugaso bugali eyiri enywe abamufugiirira
aye eyiri abo abatafugiirira,
“ebaale eri abatongoli batala baati siraŋi,
njʼeryafuuha eryʼomugaso mu gosigosi.”
8Era nindi hyaŋandiihiwa hiiti,
“Lino njʼebaale egumu erireetera abaatu ohwegumula,
ebaale ehosa eribaleetera ohwetega baagwa.”
Begumula olwohuba sibafugiirira ehibono, nga Hatonda ehigategeha hyolerera.
Abaatu abagwalaafu
9Aye enywe babatobola, muli basengi ba Hatonda, egwanga eryawufu, abaatu babe abagatobola ohulomera abaatu obuhwenda bwʼoyo owabalanga ohuŋwa mu hiirema ohwingira mu njase yiye eyʼamaani. 10Simwali baatu ba Hatonda aye ŋaahani muli baatu babe era egongo eyo mwali muŋuma hisa hihye aye ŋaahani mwahisuna.
Abeedu ba Hatonda
11Bameeri bange, ngʼolu mumanyire muuti muli balugendwa era abawuli mu hyalo muno, mbasunga mweŋalame ohuhola ebikolwa ebyʼomubiri ebibaŋiriŋania. 12Esambo jenywe jibenga ndaŋi ŋagati mu batafugiirira Hatonda abamumenyiremo. Wayire banababeŋerenga, ne ni banabonenga ebikolwa byenywe ebiraŋi, baja huŋa Hatonda eŋono hu ludaalo olwʼekomerero.
13Ngʼolu muli baloobera ba Yesu Musengwa, mugonderenga abaŋugi benywe: muŋulirenga habaha wenywe, 14oba abaŋugi abandi abagataŋo ohugudya abo abahola ebibi era nʼohusiima abo abahola ebiraŋi. 15Hatonda genda ebikolwa byenywe ebiraŋi bisimye ebibono byʼabaŋubeebe abo ababaŋaha esiro. 16Wayire muli badembe aye muli beedu ba Hatonda era simutambisanga dembe lyenywe ohuhola ebibi. 17Muŋenga hiisi muutu eŋono, mwendanenga hyʼabalebe, mutyenga Hatonda era muŋenga habaha eŋono.
Kurisito njʼehyohuboneraho hyefe
18Abeedu, muŋulirenga abasengwa benywe, si abo abababisya obulaŋi boŋene aye ni naabo abababisya obubi. 19Hiri hiityo olwohuba Hatonda alibaŋa ekabi olwʼohwehaliriha ebiguudyo ebi baatu babahola aŋaŋuma songa. 20Omuutu asunamo hi singa bamuhubba olwʼebibi ebi ahola? Aye singa bamugudya olwʼebiraŋi ebi ahola, ehyo hisangaasa Hatonda. 21Hatonda gabalanga ohuhola ebiraŋi wayire hibaŋwereyemo ohugada. Ni Kurisito yeesi gagada hu lwenywe. Muholenga ebi gaholanga olwohuba Ye njʼehyohuboneraho hyenywe. 22Eŋuma hibi ehi Kurisito gaahola wayire ohuloma ehyʼobundulingi. 23Era ni bamufodogola, niye sigabagobolamo era ni bamugudya sigesasusa muutu yesiyesi aye niye obulamu wuwe gabuŋambya Hatonda asala emisango nʼatehubbira. 24Kurisito omwene geetwiha ebibi byefe gabiŋira hu musalabba, ko hube hyʼabaatu abafuuye eyiri ehibi aye abagwalaafu mu moni jije. Ebihubbe ebi bamwosaho mbebibaŋonia. 25Mwali muŋabire hyʼetaama aye babagobosa eyiri Omwayi era Omuhuumi wʼobulamu wenywe.