1Helii Kooh woꞌinka bi leerin an: ga jamaanucaa mëeñjohanɗa, hay kilaak ɓiɓoꞌ ɓaa foñan ngëmii, ɓa taabuk halaatcaa ëewdohi ɓoꞌ ga kimúuƴ na enaamacaa jëgírohu ee meyoh ga hel cibóníꞌ. 2Ɓa hay kiꞌíis hafɓa ga yah ɓuwii jófjófɗuki ee woꞌsoo kayohɗa, ɗúkɓa. Ɓuwiima jófjófɗukiɗa nak, helcaagaɓa këenírin bi man na odaa ñaasu na pewiñpaa útu ga kiwii bi yoꞌohin cor. 3Ɓa hoonohi ɓuwii kipajoh, ɓa gítínohi an ɓuwii abukat ga kiñam ñamahcii cíinoo. Ee ñamahcaama, Kooh yërí sakca. Kon ɓuwii gëm ga Yéesu ee ínohuunun kayohfiiɗa, mínuununca kiñam, ɓa gërëmmbi gaca. 4Ɓéeɓ iñaa Kooh sakin jofin. Laakoo dara iñaa jom ga kisagu. Ñamat hen rek ɗú taam ga na kigërëm Kooh. 5En kiꞌenaa, woꞌeenaa Kooh, wa na kíimaa ɗu kíimiriɗa onin iñaa en tóoh kiselaꞌ.

6Binaa fu jëgíꞌ kerceencum iñcaama tóohcanaa, fu hay kiꞌen súrga Yéesu Kiristaa yijófíꞌ, súrgaa líif na woꞌeencii jëgírohu ga ngëmiiɗa na jëgírohii wukayohwii fu taabukɗa. 7Abukaa ga woꞌeen ëdítcum laakoo haf ee taammbii na kigëm Koohɗa. Namaa haffu kiméeríꞌ ga kitum iñaa neɓ Kooh. 8Jeriñaa ga kiméeríꞌ haffu ga kiheel dooli faanɗa laakin daa wa eem, wayee jeriñaa ga kiméeríꞌ haffu ga iñaa neɓ Kooh onohin iñaa en tóoh. Ka dígohin kipeskii diima na kipeskaa hayanɗa. 9Woꞌeenii mi woꞌ wii wóorin ee ɓéeɓ jominwa kiꞌam dijófíꞌ. 10Kërí tah, ɗu apuki, ɗu lebirohi ndaga ɗu lík yaakaaꞌtuu ga Kooh yii laak kipesɗa, yii músal ɓéeɓ ɓuwiiɗa, wëñaa ga ɓuwii gëminɗa.

11Iñuma yërí fu jom kiꞌebiloh kitum ee yërí fu jom kijëgíroh. 12Kaa took kiꞌeewu ndaga dum fu en oomaaɗa, wayee guuꞌguulukaa ga kiꞌen ɓaa kerceencum mínan gari kimalak: ennda ga woꞌeencum fu woꞌiɗa, ga ɓadukeenumgaraa, ga kiwaaꞌkum fu waaꞌɓaɗa, ga ngëmum fu laakɗa, na ga kiset ga fíkíi Kooh. 13Dëkaa ga kijaŋ Woꞌeenii Kooh ga fíkíi ɓéeɓ, fu jangatiɓa, fu jëgíriɓa bi ga daa mi hayan. 14Kaa caahadoh doolum Helii yiselaꞌíꞌyii onndaaɗa, wii koorohee ga woꞌeen sëldíiga-Kooh ee yaakcaa tíkkaraa yah ga hafɗa. 15Iñuma tumaari ga helfu, fu ek keeñfu ga tóoh, doonaa ɓéeɓ hot ga dii ngëmiigaraa ɓaatukɗa. 16Malaksukohaa daa fu jom kiman ga kipesfu, fu ínoh iñcaa fu jëgírohiɗa, ee fu dëk ga iñaama rek. En kiꞌenaa, fu tumkanaa, fu hay kimúc, fu na ɓuwaa súkúrukanndaaɗa.