A̱maꞌ yej mo‑ijkuiloj iga judiyojmej yej kitokaj Jesucristo
Hebreos
Dios te̱no̱tza ipan iPiltzi̱n
1Ikya Dios kitajto̱lmáꞌ profe̱tajmej miaꞌ ve̱j iga makino̱tzaka̱n to‑ikyapatajwa̱n, iwá̱n ayá̱ꞌ nochipa iga tájto̱l kino̱tzkej, sino de se̱seꞌpa. 2Eꞌ iná̱n iga ayoꞌ wejka iga nochi tamis, Dios te̱no̱tzaꞌ ipan Jesús yej iPiltzi̱n. Dios kijtoj iga iPiltzi̱n makichi̱wa nochi yej onoꞌ pan iní̱n ta̱jli iwá̱n yej onoꞌ ajko, iwá̱n ijkó̱n Jesús nochi nokta itatki iga Dios kitatkimáꞌ. 3Ipan Jesús mo‑ita ipode̱r Dios iwá̱n ípan ne̱si ken nokta in Dios, iwá̱n iga ipode̱r itájto̱l kichi̱wa iga nochi yej onoꞌ wel maonoka̱n. Kua̱ꞌ Jesús kíchija iga Dios wel te̱perdona̱rowiliá yej tikchijkej yej aye̱kti, mota̱lij ila̱doj iye̱ꞌma̱ꞌ Dios ka̱n manda̱rowa ipan cielo.
Te̱Piltzi̱n má̱j kipiá poder que a̱ngelejmej
4IPiltzi̱n Dios ma̱jya sej que a̱ngelejmej, iga Dios kimáꞌ ito̱ka̱ꞌ yej má̱j kajasi iga mamoweyimati. 5Iwá̱n Dios ayí̱ꞌ kijlij nisé̱ ángel:
Tej tinopiltzi̱n;
a̱man nej nimitzmáꞌ movi̱daj;
iwá̱n seꞌ ve̱j kijtoj:
Nej nimochi̱was te̱taj iga yéj;
iwá̱n yéj mochi̱was te̱piltzi̱n iga nej.
6Eꞌ kua̱ꞌ kiti̱tan isentepiltzi̱n ipan iní̱n ta̱jli, kijtoj:
Nochi iya̱ngelejmej Dios, makiweyimati̱lti Jesús.
7Iwá̱n iga iya̱ngelejmej, Dios kijtoj:
Nikchi̱wa ken ejekaꞌ noa̱ngelejmej,
iwá̱n notekipanowa̱nimej wel nikchi̱wa ken tiwelo̱n.
8Eꞌ Dios kijlij iPiltzi̱n:
Tej tiDio̱s iwá̱n ayí̱ꞌ tamis iga timanda̱rowa;
iwá̱n tej nochi tikye̱ꞌchi̱wa iga tirreina̱rowa.
9Tej tikye̱ꞌita yej ye̱kti iwá̱n tikijiya yej aye̱kti;
inó̱n iga Dios, yej moDio̱s, mitztapejpen iga xitagoberna̱ro,
iwá̱n kichij iga má̱j xiyo̱lpa̱kto que sekin mokni̱wa̱n.
10No̱ kijtoj:
Tej, noTe̱ko, kua̱ꞌ pe̱waꞌ tikchij ta̱jli, tikta̱lij kajká̱n mataksato,
iwá̱n no̱ tikchij cielo iga moma̱ꞌ.
11Cielo wa̱n ta̱jli tamiskej, eꞌ tej tonos nochipa.
Nochi ino̱mej we̱wejtiaskej ken tzótzol;
12ino̱mej tiko̱kolocho̱j ken se̱ tzótzol yej iga timotaajakiáj,
iwá̱n mopatas ijkó̱n ken kua̱ꞌ agaj motapajpata.
Eꞌ tej kensan nochipa tonos,
iga ayí̱ꞌ timikis.
13Dios, nisé̱ ángel ayí̱ꞌ kijlij:
Ximota̱li ila̱doj noye̱ꞌma̱ꞌ ka̱n nimanda̱rowa, este que manikta̱li mokxitampa yej mitzijiyaj.
14Nochi a̱ngelejmej espi̱ritojmej iwá̱n tekipanowaj iga Dios. Dios kiti̱tani iga makipale̱wi̱ka̱n yej yawij mosalva̱ro̱tij.