ឞូតឹមទីនាវញុបងខឹតឞ្រាសយេឆូ
(មថ ២៦:១-៥; លក ២២:១-២; យហ ១១:៤៥-៥៣)
1ជេសរីបុននហ៝ត នទ្រែលមាបុននុមពាង់មោគែសនទ្រូយហោមឞារនារមាត៝ត់។ មពោលកោរាញជានឞ្រាស នទ្រែលមាផូងនើមនតីនាវវៃផូងអីឆ្រាអែល ជ៝យនាវមើមទឹងគែសញុបនតុងឞ្រាសយេឆូ ងខឹតលើយ។ 2ខាន់ពាង់តឹមញច្រាៈឞាល់លាស៖ “លើយអោសឞ៝ន់ញុបតានោកជានបុន ក្លាចគែសនាវអុសអាសតាសត៝រ់មាផូងប៝នលាន”។
ឞូអូរត៝ៈងីបោកាសតាឞោកឞ្រាសយេឆូ
(មថ ២៦:៦-១៣; យហ ១២:១-៨)
3ជេសរីឞ្រាសយេឆូ ហាន់តាប៝នបេថានី ។ ពាង់គុតាជៃទូហ្វេឞូក្លោរាញាឆីមោន អីតាៈគែសផុងឆា។ នោកនៃតឹងមានាវវៃផូងនទ្រ៝ង់ខាន់ពាង់ឆោងឆាគុឞិចងកេងជឹតច្យៅ អីជ៝ង់រ៝កជឹតកើយ។ នោកពាង់ឆោងឆានទ្រែលត៝ត់ឞ្រោៈទូហ្វេឞូអូរលាប់តាជៃនៃញអោតទូមល៝ម់ដ៝បលុ។ តាត្រោមដ៝បនៃគែសងីបោកាសអីខ្លៃងាន់ អីឞូក្វាល់លាសទាកងី«នារតូ»។ ជេសរីពាង់គិចលើយឞោកដ៝បលុអីនៃត៝ៈងីបោកាសតាឞោកឞ្រាសយេឆូ ។ 4គែសឞូបាបាៈអីគុតានៃជីនូយ្ស ខាន់ពាង់តឹមលាសនទ្រាង់ខាន់ពាង់នើម៖ “ម៝សជានមពុងមពាង់ងីបោកាសកើតនៃ! 5លាសឆ៝ៈព្រីងអីនៃតាច់គែសព្រាក់ ៣០០ ព្រាក់កាក់រាលាវរ៝យាៈ ជេសរីពាៈមាឞូនុយ្សអ៝អាច”។ ជេសរីខាន់ពាង់នទុយ្សអោឞាល់នៃ។ 6ល៝ង់ឞ្រាសយេឆូ ទែលាស៖ “អ៝ន់ទាសមាជានព្រែហ៝ៈ! មើមទឹងខាន់មៃជានអ៝ន់ពាង់គែសនាវរាង៝តកើតនៃ? ពាង់លែៈជាននាវអ្វែសអ៝ន់មាគ៝ប់។ 7ផូងអ៝អាចហោមគុនទ្រែលខាន់មៃមរ៝។ ខាន់មៃជានអ្វែសមាផូងអីនៃតឹងនូយ្សនហ៝ម់ខាន់មៃនើមអុច យើនមាគ៝ប់អ្យាមោអោសគុនទ្រែលខាន់មៃមរ៝។ 8យោសអ្យាជានតឹងនាវទើយពាង់។ ពាង់ត៝ៈងីបោកាសតាឆាក់ជាន់គ៝ប់អេល៝រមាគ៝ប់ខឹត ជេងតឹងនាវវៃផូងឞ៝ន់ជានមានទ្រាប់អេល៝រមាឞូត៝ប់ឞូនុយ្សខឹតតាមោច។ 9 គ៝ប់លាសនហេលនានេៈងាន់មាខាន់មៃ អាប់នតុកឞូហាន់មឞើសងក៝ចនាវមហែមហានអ្វែសលាមងគ៝រឞ្រីតានែសនតូអ្យា ឞូងក៝ចមានាវអីពាង់ជាននើសដ៝ង់ គៃមាងកាសតោរឞូឞាសច្វេលពាង់”។
យូដាស-អីឆាការីយោត តឹមទីទូនតោរនាវមាឞូញជុនឞ្រាសយេឆូ
(មថ ២៦:១៤-១៦; លក ២២:៣-៦)
10ជេសរីយូដាស-អីឆាការីយោត ទូហ្វេកោរាញអ៝សម៝នតាមពោល ១២ នុយ្ស ពាង់ហាន់ម៝ប់ដាសមពោលកោរាញជានឞ្រាស គៃមាតឹមញច្រាៈឞាល់លែវឞូញុបឞ្រាសយេឆូ ញជុនអ៝ន់មាខាន់ពាង់។ 11ជេសផូងអីនៃតាង់នាវយូដាស-អីឆាការីយោត ងើយនៃ នូយ្សនហ៝ម់ខាន់ពាង់រាម់ងាន់ ខាន់ពាង់ត៝នងខោមព្រាក់មាពាង់។ នទ្រីយូដាស-អីឆាការីយោត នតើមជ៝យម៝សនោកអីអ្វែសគៃមាលែវឞូហាន់ញុបឞ្រាសយេឆូ ។
ឞ្រាសយេឆូ ញេតបុននហ៝តនទ្រែលអ៝សម៝នពាង់
(មថ ២៦:១៧-២៥; លក ២២:៧-១៤, ២១-២៣; យហ ១៣:២១-៣០)
12តានារនតើមនទ្រាប់ញេតបុននុមពាង់មោគែសនទ្រូយ ជេងនារឞូងខឹតក៝នឞែឞ្យាប់មាជានឞ្រាសគៃមាញេតបុននហ៝ត ជេសរីមពោលអ៝សម៝នអោបឞ្រាសយេឆូ ៖ “ហើយកោរាញ អាសនតុកមៃអុចអ៝ន់ហេននទ្រាប់មាមៃញេតឆោងបុននហ៝តអ្យាមេស?” 13 ឞ្រាសយេឆូ ដាៈឞារហៃអ៝សម៝នហាន់ជ៝យនតុកមឞើសមាខាន់ពាង់៖ “ខាន់មៃហាន់តាប៝នក្វ៝ង់រី ខាន់មៃម៝ប់ទូហ្វេឞូក្លោតេៈទាកយាង់កាលើមលីក។ អ៝ន់ខាន់មៃហាន់តឹងពាង់។ 14ម៝សជៃពាង់លាប់ អ៝ន់ខាន់មៃងើយមានើមតើមជៃនៃ៖ «នើមនតីហេនដាៈហេនហាន់អោបមៃ ជ្រោមាពាង់ញេតបុននទ្រែលអ៝សម៝នពាង់តានារញេតបុននហ៝តអ្យា អាសនតុកមេស?» 15ឞូនុយ្សតើមជៃនៃលែវមាខាន់មៃរ៝តានតុកកាលើរីជ្រោហ្វីងាន់ លែៈអើមជេសនទ្រាប់អាប់លែៈផ្យៅ។ អ៝ន់ខាន់មៃនទ្រាប់នាវញេតឆោងអ៝ន់មាឞ៝ន់តាជ្រោនៃរ៝”។ 16ជេសរីអ៝សម៝នឞារហៃនៃឞ្រោៈទ្រើនរ៝ ត៝ត់តាប៝នក្វ៝ង់នៃខាន់ពាង់ឆៃកើតនាវឞ្រាសយេឆូ លាសនើស ជេសរីខាន់ពាង់នទ្រាប់នទើឆោងឆាមានាវញេតបុននហ៝តអីនៃ។
17ត៝ត់កេងមាង់ឞ្រាសយេឆូ ត្រុយ្សតានតុកនៃនទ្រែល ១២ នុយ្សមពោលកោរាញអ៝សម៝នពាង់។ 18នោកឞ្រាសយេឆូ គុឆោងឆានទ្រែលមពោលអ៝សម៝ន ពាង់មឞើស៖ “គ៝ប់លាសនហេលនានេៈងាន់មាខាន់មៃ តាមពោលខាន់មៃគែសទូហ្វេលែវឞូហាន់ញុបគ៝ប់ ពាង់អីនៃគុឆោងឆានទ្រែលឞ៝ន់ដ៝ង់”។ 19មពោលអ៝សម៝នរាវៃហោងាន់ លែៈខាន់ពាង់នៃអោបឞ្រាសយេឆូ ៖ “នទ្រីគឹតគ៝ប់ហើ?” 20 ឞ្រាសយេឆូ លាសមាខាន់ពាង់៖ “ពាង់អីនៃតាៈឞើស ១២ នុយ្សមពោលខាន់មៃ ពាង់អីលុបនុមពាង់តាងាននទ្រែលគ៝ប់អាបៃអ្យា។ 21 គ៝ប់អីក៝នឞូនុយ្សតាៈឞើសកោរាញឞ្រាសឞូមរាងខឹត តឹងមានាវលែៈញចីសលាសមាគ៝ប់។ តីសមាពាង់អីលែវឞូហាន់ញុបគ៝ប់អីក៝នឞូនុយ្សតាៈឞើសកោរាញឞ្រាសនៃ ពាង់អីនៃគែសនាវរេសរាញាល់ងាន់រ៝។ អ្វែសរាលាវលើយទឹងទែសពាង់អីនៃនើស”។
នាវញេតឆាងកាសក្ល៝សអ្វែស
(មថ ២៦:២៦-៣០; លក ២២:១៥-២០; ១កោ ១១:២៣-២៥)
22ខាន់ពាង់ហោមគុឆោងឆា ជេសរីឞ្រាសយេឆូ ឆ៝ៈទូមល៝ម់នុមពាង់ លាសអ្វែសមាកោរាញឞ្រាស ជេសរីគិចអ៝ន់មាខាន់ពាង់ឆា នហ៝មាលាស៖ “ខាន់មៃឆ៝ៈឆាយឹ អ្យាអីឆាក់ជាន់គ៝ប់”។ 23ជេសរីពាង់ឆ៝ៈកាច៝កនទ្រាញ់ព្លៃយុងយារប៝ន លាសអ្វែសមាកោរាញឞ្រាស ជេសរីអ៝ន់មាខាន់ពាង់ញេតលែៈមាឞាល់។ 24ពាង់លាសមាខាន់ពាង់៖ “នទ្រាញ់ព្លៃយុងយារប៝នតាកាច៝កអ្យាអីមហាមគ៝ប់ អីហ៝ចឞើសឆាក់ជាន់គ៝ប់នោកគ៝ប់ខឹតតៃ គៃមារាក្លាយ្សអ៝ក់ឞូនុយ្ស។ មាមហាមអីអ្យាកោរាញឞ្រាសជាននាវតឹមរាង្លាប់មហែ។ 25 គ៝ប់លាសនហេលនានេៈងាន់មាខាន់មៃ គ៝ប់មោហោមអោសញេតនទ្រាញ់ព្លៃយុងយារប៝នអ្យាជឹត នហ៝មាត៝ត់នារគ៝ប់ញេតតៃនទ្រាញ់ព្លៃយុងយារប៝នត៝ត់កោរាញឞ្រាសម៝ត់អ្វាញ់ទឹងលែៈឞូនុយ្សងាន់មើ”។ 26ជេសមព្រើនាវតឹមរានេ ឞ្រាសយេឆូ នទ្រែលមពោលអ៝សម៝នពាង់លោសឞើសនៃហាន់ជឹតយោកតើមអោលីវ ។
ឞ្រាសយេឆូ លាសពេត្រោស រាលាច់មោគឹតនាល់ពាង់
(មថ ២៦:៣១-៣៥; លក ២២:៣១-៣៤; យហ ១៣:៣៦-៣៨)
27 ឞ្រាសយេឆូ លាសមាមពោលអ៝សម៝នពាង់៖ “ទឹងលែៈខាន់មៃនត្លើយគ៝ប់ យ៝រមាតានាវកោរាញឞ្រាសងើយលែៈគែសញចីស៖ «កោរាញឞ្រាសលាស៖
«គ៝ប់មឞាងងខឹតលើយនើមច្យាប់ឞែឞ្យាប់
ជេសរីផូងឞែឞ្យាប់ទូចាសច្រាយលែៈ»»។
28យើនមាជេសគ៝ប់ទ៝ក់រេសតៃ គ៝ប់ហាន់តាឞ្រីកាលីលេ ល៝រឞើសនាប់ខាន់មៃ”។ 29ជេសតាង់ឞ្រាសយេឆូ ងើយនទ្រីពេត្រោស លាសមាពាង់៖ “ឞ៝លលាសទឹងលែៈខាន់ពាង់នត្លើយមៃកាដោយ គ៝ប់មោអោសនត្លើយមៃ”។ 30 ឞ្រាសយេឆូ លាសមាពាង់៖ “គ៝ប់លាសនហេលនានេៈងាន់មាមៃ តាមាង់អ្យារ៝ អេល៝រមាអ្យារ់នទ្រាវឞារតឹ មៃរាលាច់ពែតឹលាសមោគឹតនាល់គ៝ប់”។ 31 ពេត្រោស រាលាច់លើមាហោ៖ “មោអោស! ឞ៝លលាសឞូងខឹតគ៝ប់នទ្រែលមៃកាដោយ គ៝ប់មោគែសអោសរាលាច់លាសមោគឹតនាល់មៃ”។ ទឹងលែៈមពោលអ៝សម៝នគែសងើយកើតនៃដ៝ង់។
ឞ្រាសយេឆូ គុមឞើសឆើមតាគេតឆេមានី
(មថ ២៦:៣៦-៤៦; លក ២២:៣៩-៤៦)
32ជេសរីឞ្រាសយេឆូ នទ្រែលមាមពោលអ៝សម៝នពាង់ហាន់ជឹតនតុកឞូរាញាគេតឆេមានី ។ ពាង់លាស៖ “ខាន់មៃគុតាអ្យាប៝ត់យឹ គ៝ប់ហាន់មឞើសឆើមប៝ត់”។ 33ពាង់ជាៈពេត្រោស យាកើ នទ្រែលមាយោហាន ហាន់នទ្រែល។ នោកនៃពាង់នតើមគែសនាវរាវៃហោងាន់ នូយ្សនហ៝ម់មោដាប់មពាន់ រាង៝តហោងាន់។ 34 ពាង់លាសមាពែនុយ្សខាន់ពាង់នៃ៖ “នូយ្សនហ៝ម់គ៝ប់រាង៝តហោងាន់នទាៈមាខឹតរ៝។ ខាន់មៃហោមគុតាអ្យាប៝ត់ គុរាងែសញជ្រាង់ងាន់ហ៝ៈ”។ 35ជេសរីឞ្រាសយេឆូ ហាន់ជឹតនាប់ដេៈ ពាន់ត្រុយ្សអានែសមឞើសឆើមទាន់លើយតាគែសអោសនាវជេរជ៝ត់ លាសទើយ។ 36 ពាង់លាស៖ “អាប់បាអើឞឹ! ទាសមៃនើមអុចមៃទើយជានទឹងលែៈនតីលនាវ ទាន់មៃឆ៝ៈនាវជេរជ៝ត់អ្យាអ៝ន់ទូងាយឞើសគ៝ប់។ យើនមាលើយអោសតឹងនូយ្សនហ៝ម់គ៝ប់អុច អ៝ន់តឹងនាវមៃនើមអុចហ៝ៈ”។ 37ជេសរីពាង់ព្លឹជឹតមពោលអ៝សម៝ននៃ ឆៃខាន់ពាង់ហាក់ឞិច ពាង់លាសមាពេត្រោស ៖ “ហើយឆីមោន ម៝សឞិចមៃនៃហ្យាស? ម៝សមៃមោទើយញឆ្រោយ្ស មានមាទូម៝ងមោទើយដ៝ង់? 38ខាន់មៃញជ្រាង់ហ៝ម់នហ៝មាមឞើសឆើម គៃមាមោជានតីសនោកគែសនាវនទើម។ នូយ្សនហ៝ម់ឞូនុយ្សលែៈអុចជានទីងាន់ តីសមាមោអោសឞ្លាវជាន យ៝រមាហោមរាអ្យា”។ 39ជេសរីឞ្រាសយេឆូ ទូតៃឞើសខាន់ពាង់ មឞើសឆើមកើតនាវអើមនើសទូតឹដ៝ង់។ 40ជេសរីពាង់ព្លឹឆឹតហាន់ម៝ប់មាមពោលអ៝សម៝នជឹត ឆៃខាន់ពាង់ហោមហាក់ឞិច លីនមាត់មោទើយ ជេសរីជ៝យនាវអើសមាពាង់មោគែស។ 41 ឞ្រាសយេឆូ ហាន់ព្លឹម៝ប់តៃខាន់ពាង់លែៈពែតឹជេស ពាង់លាសខាន់ពាង់៖ “ខាន់មៃហោមឞិចទាសជ៝ៈមាកាស? ទាសនៃគាប់ហើយ្ស! អាបៃអ្យាម៝ងលែៈត៝ត់ជេស ឞូញជុនគ៝ប់អីក៝នឞូនុយ្សតាៈឞើសកោរាញឞ្រាសអ៝ន់មាផូងឞូនុយ្សតីស។ 42ទ៝ក់ហ៝ម់លែវឞាល់ហាន់ ពាង់អីលែវឞូហាន់ញុបគ៝ប់លែៈឞើយត៝ត់ហើយ!”
ឞូញុបឞ្រាសយេឆូ
(មថ ២៦:៤៧-៥៦; លក ២២:៤៧-៥៣; យហ ១៨:៣-១២)
43 ឞ្រាសយេឆូ ហោមអែងើយ ទោមាត៝ត់យូដាស-អីឆាការីយោត ជេងទូហ្វេឞូនុយ្សតា ១២ នុយ្សមពោលកោរាញអ៝សម៝ននៃ។ គែសទូផូងហាន់នទ្រែលពាង់នៃ ញអោតម៝ង់ញអោតដាវ។ ខាន់ពាង់អីនៃតាៈឞើសមពោលកោរាញជានឞ្រាស ផូងនើមនតីនាវវៃផូងអីឆ្រាអែល នទ្រែលមាផូងកោរាញឞ្រីយូដា ទែដាៈ។ 44 យូដាស-អីឆាការីយោត អីលែវឞូហាន់ញុបឞ្រាសយេឆូ នៃលែៈជេសមឞើសទូនទើគឹតនាល់មាឞូលាស៖ “ឞូម៝សអីគ៝ប់ចុមពាង់អីរីរ៝។ នទ្រីខាន់មៃញុបលែវពាង់ទោ”។ 45ជេសរីយូដាស-អីឆាការីយោត ហាន់ត៝ត់តាឞ្រាសយេឆូ រ៝ ពាង់លាស៖ “ហើយនើមនតី!” ពាង់ចុមឞ្រាសយេឆូ 46ជេសរីឞូញុបឞ្រាសយេឆូ ។ 47គែសទូហ្វេអ៝សម៝នអីគុទាច់តារីតាក់ដាវច្រីប ឆ្រែសតោរអីទឹកកោរាញជានឞ្រាសទុតក្វ៝ង់តាច់ទូទីង។ 48ជេសរីឞ្រាសយេឆូ លាសមាផូងអីនៃ៖ “ម៝សឞ្រោៈខាន់មៃញអោតនអ៝ប់មាម៝ង់មាដាវគៃមាញុបគ៝ប់កើតនៃ កើបគ៝ប់ជេងឞូនុយ្សនតុងឞើស? 49អាប់នារកាល់ទឹនើស គ៝ប់គុនតុមនតីតាជ៝ង់គូងញីសជានឞ្រាស។ ខាន់មៃគុតានៃដ៝ង់ មោអោសញុបគ៝ប់។ អ្យាត់មាគែសនាវត៝ត់អ្យាជេងទីដាសនាវកោរាញឞ្រាសងើយអីឞូលែៈញចីស”។ 50ជេសរីមពោលអ៝សម៝នញច្វាត់រាង៝ត់លែៈផ្យៅ នត្លើយឞ្រាសយេឆូ ។ 51គែសទូហ្វេឞូនទាម់អីតឹងពាង់ ឞូនទាម់អីនៃគែសឞ៝កទូឞ្លាសទើមមាងគូតឆាក់ជាន់ ឞូទែញុបអោឞាល់ដ៝ង់។ 52ពាង់មអារ់ឞ៝កអីនៃ ញច្វាត់ឆាក់កុសទើម។
ឞ្រាសយេឆូ គុឞើសនាប់មពោលកោរាញជានការផូងឞ្រីយូដា
(មថ ២៦:៥៧-៦៨; លក ២២:៥៤-៥៥, ៦៣-៧១; យហ ១៨:១៣-១៤, ១៩-២០)
53ជេសរីឞូលែវឞ្រាសយេឆូ អាជៃកោរាញជានឞ្រាសទុតក្វ៝ង់។ លែៈមពោលកោរាញជានឞ្រាស ផូងនើមនតីនាវវៃផូងអីឆ្រាអែល នទ្រែលមាផូងកោរាញឞ្រីយូដា គុរាគូមតារីទាទេ។ 54ល៝ង់ពេត្រោស រីតឹងឞ្រាសយេឆូ ឞើសកើយ ឞ្រោៈនទ៝ប់ឞោកមពើលឞោក នហ៝មាត៝ត់តាត្រោមជ៝ង់គូងជៃកោរាញជានឞ្រាសទុតក្វ៝ង់ ជេសរីលាប់គុញជ៝រ់អុញនទ្រែលមពោលឞូនុយ្សកើលជានការតានតុកនៃ។ 55មពោលកោរាញជានឞ្រាស នទ្រែលមាទឹងលែៈផូងកោរាញជានការផូងអីឆ្រាអែល តឹមញច្រាៈឞាល់ជ៝យនាវនតោនឞ្រាសយេឆូ គៃមាតេៈទោយ្សងខឹតលើយពាង់ ជ៝យមោអោសទើយឆៃ។ 56គែសអ៝ក់ឞូនុយ្សងើយញចើតនតោនពាង់ យើនមាទឹងលែៈនាវខាន់ពាង់នតោននៃមោអោសតឹមទីឞាល់។ 57ឞូបាបាៈទ៝ក់ងើយញចើតនតោនឞ្រាសយេឆូ លាស៖ 58“ហេនតាង់ពាង់ងើយលាស៖ «គ៝ប់រើយ្សមអារ់លែៈញីសជានឞ្រាសមាកោរាញឞ្រាសអីតីឞូនុយ្សជាន ជេសរីតាពែនារឞើសកើយនៃគ៝ប់ជានញីសជានឞ្រាសទូមល៝ម់អេងជឹត ញីសជានឞ្រាសអីនៃមោគែសអោសតីឞូនុយ្សជាន»”។ 59ឞ៝លលាសខាន់ពាង់នតោនមានាវអីនៃកាដោយ ក៝ៈហោមមោតឹមទីឞាល់ដ៝ង់។ 60ជេសរីទ៝ក់ដឺបអីកោរាញជានឞ្រាសទុតក្វ៝ង់នៃ ទ៝ក់ឞើសនាប់លែៈឞូនុយ្សអីគុតានៃ ពាង់អោបឞ្រាសយេឆូ ៖ “មើមមៃមោអើសនាវឞូនតោនមៃនៃមេស?” 61 ឞ្រាសយេឆូ គុអ្យាត់ឆាក់ក្លាក់មោអើសដេៈរ៝។ កោរាញជានឞ្រាសអោបតៃពាង់ទូតឹជឹត៖ “នទ្រីមៃជេងឞ្រាសក្រីស អីនើមរាក្លាយ្សតាៈឞើសកោរាញឞ្រាសទែញជ្វាល់ងាន់ អីក៝នកោរាញឞ្រាសងាន់បាស?” 62 ឞ្រាសយេឆូ អើស៖ “អើគ៝ប់អ្យាងាន់។
ទឹងលែៈខាន់មៃមរាឆៃគ៝ប់អីក៝នឞូនុយ្សតាៈឞើសកោរាញឞ្រាស
គុឞើសមាតីកោរាញឞ្រាសនើមអីទុតនាវទើយគៃមាម៝ត់អ្វាញ់
ជេសរីជុរឞើសត្រោករីហាន់រ៝ៈនទ៝រ់តុក”។
63ជេសតាង់ពាង់ងើយកើតនៃ កោរាញជានឞ្រាសទុតក្វ៝ង់នៃងខេកអាវពាង់នើមច្វីក ជេសរីលាស៖ “ឞ៝ន់មោហោមខាច់អោសជ៝យឞូនុយ្សតើមឆៃតើមតាង់អាអេងជឹត។ 64លែៈខាន់មៃតាង់ទាទេជេសនាវព្រែមឺចរាម៝តកោរាញឞ្រាស។ នទ្រីមើមខាន់មៃអុចតេៈទោយ្សមាពាង់?” ទឹងលែៈឞូលាសតេៈទោយ្សងខឹតលើយពាង់។ 65ឞូបាបាៈលែវឞាល់ឆ៝សទាកទីវតាអោឞាល់ ងកុមមាត់ថុកអោឞាល់ ជេសរីអោប៖ “លាសមៃឞ្រាសក្រីស ងាន់ មឞើសមាហេនឞូម៝សថុកមៃ!” ជេសរីមពោលតាហែនញជ្រាង់ញីសជានឞ្រាសតាបអោឞាល់ដ៝ង់។
ពេត្រោស រាលាច់លាសមោគឹតនាល់ឞ្រាសយេឆូ
(មថ ២៦:៦៩-៧៥; លក ២២:៥៦-៦២; យហ ១៨:១៥-១៨, ២៥-២៧)
66ល៝ង់ពេត្រោស រីពាង់ហោមគុតាជ៝ង់គូង ជេសរីត៝ត់ឞ្រោៈទូហ្វេឞូអូរតានៃ ពាង់ជានការមាកោរាញជានឞ្រាសទុតក្វ៝ង់។ 67ត៝ត់ឆៃពេត្រោស គុញជ៝រ់អុញតានៃ ពាង់អ្វាញ់អ៝ន់នហេលអីមុសមាត់ ជេសរីលាស៖ “ងាន់មៃជេងឞាល់មពោលយេឆូ ត៝អីតាៈឞើសប៝ននាឆារែត !” 68 ពេត្រោស រាលាច់លាស៖ “គ៝ប់មោអោសគឹតវ៝ត់ម៝សនាវអៃរែលាសរី”។ ជេសរីពេត្រោស ទូឞើសនតុកអីនៃហាន់អាមពោងមពេរ នោកនៃអ្យារ់លែៈនតើមនទ្រាវ។ 69ជេសរីឞូអូរអីជានការតានៃឆៃពេត្រោស គុតានៃ ពាង់មឞើសលែៈឞូនុយ្សអីគុតារីទូតឹជឹត៖ “ពាង់អីនៃឞាល់មពោលឞូនុយ្សអីឞូញុបនៃដ៝ង់”។ 70 ពេត្រោស រាលាច់តៃជឹត។ ត៝ត់ទូនទ៝ម់ឞើសកើយ មពោលឞូនុយ្សអីគុតានៃងើយមាពេត្រោស លាស៖ “មៃអ្យាឞាល់មពោលពាង់ងាន់រ៝ រាលាវមៃឞ្រីកាលីលេ តឹមឞាន”។ 71 ពេត្រោស ងើយលាស៖ “លាសគ៝ប់មរោស គ៝ប់រាតាប់ឆាក់គ៝ប់នើម ទាន់កោរាញឞ្រាសតេៈទោយ្សមាគ៝ប់ទោស។ គ៝ប់មោអោសគឹតនាល់ពាង់អីខាន់អៃមៃលាស”។ 72ទោមាអ្យារ់នទ្រាវទូតឹជឹត ជេសរីពេត្រោស នតើមកាសគឹតនាវឞ្រាសយេឆូ លាសនើស៖ “អេល៝រមាអ្យារ់នទ្រាវឞារតឹមៃរាលាច់ពែតឹលាសមោគឹតនាល់គ៝ប់”។ ជេសរីពាង់ញុមរាង៝តហោងាន់រ៝។