ឞូអូរអីហាន់នទ្រែលឞ្រាសយេឆូ
1ជេសរីឞ្រាសយេឆូ នទ្រែលមា ១២ កោរាញអ៝សម៝នពាង់ ហាន់រ៝ៈប៝នក្វ៝ង់ប៝នជេៈមឞើសងក៝ចនាវមហែមហានអ្វែសអីកោរាញឞ្រាសអុចម៝ត់អ្វាញ់ឞូនុយ្ស។ 2គែសឞូអូរអាបាៈហាន់នទ្រែលដ៝ង់ ឞូអូរអាបាៈលែៈឞ្រាសយេឆូ ជានឞាសជេសនាវជី នទ្រែលមាលែៈនត្រុតឞ្រាសអ្យើសអ៝ន់លោស តានៃគែសរាញាមារី តាៈឞើសប៝នមាដាលា ឞូអូរអីនៃឞ្រាសយេឆូ នត្រុតពើសឞ្រាសអ្យើសលោសឞើសពាង់ 3ជេសរីឞូអូររាញាយោអាន់នា អីអូរខូឆា ឞូនុយ្សម៝ត់អ្វាញ់មពោលជានការមាហេរោត-អ៝ន់តីពាស អីកោរាញម៝ត់អ្វាញ់ឞ្រីកាលីលេ គែសឞូអូររាញាឆូឆាន នទ្រែលមាឞូអូរអាបាៈអេងអ៝ក់ដ៝ង់ ខាន់ពាង់ឆ៝ៈទ្រាប់នទើខាន់ពាង់នើមគៃមាកើលឞ្រាសយេឆូ នទ្រែលមាមពោលអ៝សម៝នពាង់។
នាវនតឹតមាគារ់នតីល
(មថ ១៣:១-៩; មក ៤:១-៩)
4គែសអ៝ក់ឞូនុយ្សតាៈឞើសប៝នអេងៗ ហាន់វាច់តាឞ្រាសយេឆូ រី ជេសរីពាង់ងើយនាវនតឹតកើតនអា៖ 5“គែសទូហ្វេឞូក្លោហាន់ឆូយគារ់នតីល។ នោកពាង់ឆូយនៃអាបាៈតុបរ៝ៈត្រ៝ង គែសឞូនុយ្សជ៝ត ជេសរីឆ្យុមច៝កលែៈផ្យៅ។ 6គារ់អាបាៈតុបតានែសក្លេរ ហ៝នព្រូ ជេសរីនទ្រ៝លែៈរាងោច យ៝រលាសរែសមោជ្រូមោគែសទាក។ 7គារ់អាបាៈតុបតានែសល៝ក ល៝កហ៝ននទ្រែល ជេសរីល៝កត៝ល់លែៈផ្យៅ។ 8គែសគារ់អាបាៈជឹតតុបតានែសអ្វែស ហ៝នត៝ត់ព្លៃ ទូគារ់ជេងគែស ១០០ រាង្លៃរ៝”។ ជេសឞ្រាសយេឆូ ងើយនាវនៃ ពាង់ក្វាល់៖ “ឞូម៝សតាង់នាវគ៝ប់ងើយអ្យា អ៝ន់ពាង់មឹនអេងតាឆាក់!”
ឞ្រាសយេឆូ រាឞ្លាងនាវងើយនតឹត
(មថ ១៣:១០-២៣; មក ៤:១០-២០)
9ជេសរីមពោលអ៝សម៝នអោបឞ្រាសយេឆូ ៖ “លាសនទ្រីម៝សនាវខ្លៃតានាវងើយនតឹតអីនៃ?” 10 ពាង់អើស៖ “កោរាញឞ្រាសលែៈអ៝ន់ជេសនាវខ្លៃនាវអីនៃមាខាន់មៃគឹតវ៝ត់ មពើលនាវនទ៝ប់អាល៝រនើស អីនៃជេងនាវខ្លៃកោរាញឞ្រាសម៝ត់អ្វាញ់ឞូនុយ្ស។ ល៝ង់ឞូនុយ្សអាបាៈជឹត គ៝ប់ងើយនតឹតអ៝ន់មាខាន់ពាង់។ កើតនទ្រីឞ៝លលាស
«ខាន់ពាង់អ្វាញ់នទើគ៝ប់ជានក៝ៈមោវ៝ត់នទើខ្លៃនាវអីនៃ
ខាន់ពាង់តាង់នាវគ៝ប់ងើយក៝ៈមោវ៝ត់ដ៝ង់»។
11អ្យាគ៝ប់រាឞ្លាងនាវនតឹត៖ គារ់នើសជេងនាវកោរាញឞ្រាស។ 12ឞូនុយ្សអាបាៈតឹមឞានមាគារ់តុបតាត្រ៝ង តាង់ដ៝ង់នាវកោរាញឞ្រាស តីសមាឆាតាង់ អីកោរាញមពោលឞ្រាសអ្យើសពីតលើយនាវកោរាញឞ្រាសឞើសនូយ្សនហ៝ម់ខាន់ពាង់ គៃលើយអ៝ន់អ្យាត់ ជេសរីលើយគែសនាវរាក្លាយ្ស។ 13ឞូនុយ្សអាបាៈជឹតតឹមឞានមាគារ់តុបតានែសក្លេរ ត៝ត់តាង់នាវកោរាញឞ្រាស ខាន់ពាង់អ្យាត់រាម់មអាកងាន់ តីសមាខាន់ពាង់អ្យាត់ទូនទ៝ម់ទើម មោអោសអ៝ន់នាវកោរាញឞ្រាសអីនៃហ៝នរែសជ្រូតានូយ្សនហ៝ម់ខាន់ពាង់ លាសគែសនាវជេរនាវនទើម ខាន់ពាង់នត្លើយនាវញឆីងរ៝។ 14គារ់តុបតានែសល៝ក តឹមឞានមាឞូនុយ្សអ្យាត់នាវកោរាញឞ្រាស តីសមាតាត្រោមនូយ្សនហ៝ម់រីរាវៃកើញមាទ្រាប់នទើហោងាន់គឹតមានាវមអាកទើម នូយ្សនហ៝ម់អុចមាគែស ឞូនុយ្សកើតនៃតឹមឞានមាល៝កបារ់មោអ៝ន់ខាន់ពាង់ព្លៃត្រុយ្សទុម។ 15ល៝ង់គារ់អីតុបតានែសអ្វែសរី តឹមឞានមាឞូនុយ្សអ្យាត់នាវកោរាញឞ្រាស គែសនូយ្សនហ៝ម់អ្វែស ញអោតន៝ប់តានូយ្សនហ៝ម់ពាង់នើមនាវអីនៃ នហ៝មាត៝ត់គែសព្លៃអ៝ក់ងាន់ យ៝រមានូយ្សនហ៝ម់ញឆ្រោយ្ស”។
នាវងើយនតឹតមាអុញឆាគេង
(មក ៤:២១-២៥)
16 ឞ្រាសយេឆូ លាសជឹត៖ “មោគែសអោសឞូនុយ្សមពេសអុញឆាគេង ជេសរីឆ៝ៈថុងកុបឞើសលើ មោលាសតេៈតាន៝ម់គ្រែ។ ឞូវៃយោងព្រេស គៃមាអាងលែៈឞូនុយ្សអីលាប់តាត្រោមជៃនៃ។ 17ទឹងលែៈនទើមពោនម៝មាឞូ កោរាញឞ្រាសអុចឞូគឹតនហេល ជេសរីទឹងលែៈនទើនទ៝ប់ពាង់អុចឞូឆៃក្ល៝សរាសវាសតាអាង។ 18លាសនទ្រីញជ្រាង់ងាន់ហ៝ម់នាវអីខាន់មៃលែៈតាង់ យ៝រលាសឞូម៝សអីលែៈគែស កោរាញឞ្រាសកើយនត៝បអ៝ន់មាពាង់ជឹត តីសមាឞូម៝សអីមោគែស កោរាញឞ្រាសឆ៝ៈរាហ្វាត់លើយលែៈនទើអីពាង់គឹតលាសលែៈគែស”។
អីមេៈឞ្រាសយេឆូ នទ្រែលមាអីអ៝សពាង់
(មថ ១២:៤៦-៥០; មក ៣:៣១-៣៥)
19ជេសរីអីមេៈឞ្រាសយេឆូ នទ្រែលមាអីអ៝សឞូក្លោពាង់ ហាន់តាប៝ននៃគៃមាម៝ប់ពាង់ ត៝ត់តានៃមោគែសអោសត្រ៝ងលាប់ យ៝រលាសឞូនុយ្សអ៝ក់អីរ។ 20ជេសរីគែសឞូមឞើសមាឞ្រាសយេឆូ ៖ “មេៈមៃ នទ្រែលមាអ៝សមៃគុឞើសទីសរីអុចម៝ប់មៃ”។ 21 ឞ្រាសយេឆូ អើស៖ “ឞូម៝សអីគុអ្យាត់នាវងើយកោរាញឞ្រាស ជេសរីតឹងជាន ឞូនុយ្សអីនៃជេងមេៈ ជេងអ៝សនោគ៝ប់”។
ឞ្រាសយេឆូ ឞ្វៃផុតច្វាញ់អ៝ន់ឞាស
(មថ ៨:២៣-២៧; មក ៤:៣៥-៤១)
22គែសទូនារឞ្រាសយេឆូ ជាៈមពោលអ៝សម៝នពាង់៖ “ហោៈ ឞ៝ន់ហាន់ជឹតកាល់តីទាកតី”។ ជេសរីខាន់ពាង់ញច៝ទូកហាន់ជឹតកាល់តីទាកងលៅក្វ៝ង់កាលីលេ រី។ 23ទោលខាន់ពាង់ញច៝រី ឞ្រាសយេឆូ ហាក់ឞិច ជេសរីទោមាគែសផុតច្វាញ់ទុតហោរ៝ៈទាកងលៅក្វ៝ង់រី ទូកខាន់ពាង់ទាកលាប់ឞើយមាង៝ម់ លែៈខាន់ពាង់តាកាលើទូករីឞើយមាខឹតងាន់រ៝។ 24ជេសរីខាន់ពាង់រាលៃឞ្រាសយេឆូ ៖ “ហើយកោរាញ! ហើយកោរាញ! ខឹតរ៝ឞ៝ន់មេ”។ ឞ្រាសយេឆូ កាសរាងាល់ វាល់ផុតច្វាញ់ នទ្រែលមាទាករាឞុស។ ជេសរីផុតច្វាញ់ នទ្រែលមាទាករាឞុសឞាសរ៝ ទាករាង៝ន់កើតអើមដ៝ង់។ 25 ឞ្រាសយេឆូ រាង៝ត ជេសរីលាសមពោលអ៝សម៝នពាង់៖ “អាសអ៝ន់នាវញឆីងខាន់មៃ?” មពោលអ៝សម៝នក្លាចញឆ៝រ់ងាន់ នទ្រ៝ត់ហីសរាហ៝ល់ដ៝ង់។ មពោលអ៝សម៝នតឹមលាសនទ្រាង់ខាន់ពាង់នើម៖ “មើមទឹងគែសនាវទើយកើតនៃ ទើយដាៈផុត ដាៈទាក ជេសរីផុតនទ្រែលទាកអ្យាត់នាវពាង់ឞាសផ្យៅដ៝ង់?”
ឞ្រាសយេឆូ នត្រុតឞ្រាសអ្យើសលោសឞើសទូហ្វេឞូក្លោ
(មថ ៨:២៨-៣៤; មក ៥:១-២០)
26 ឞ្រាសយេឆូ នទ្រែលអ៝សម៝នពាង់ត៝ត់កាល់តីទាកងលៅក្វ៝ង់កាលីលេ ទាច់នតុកប៝នរាញាកេរាឆីន រី នតុកប៝នអីនៃឞូមោអោសតឹងនាវវៃផូងអីឆ្រាអែល ។ 27នោកឞ្រាសយេឆូ ហាវអាកើសតី គែសទូហ្វេឞូក្លោតាៈឞើសប៝ននៃរានជឹតពាង់អ្យា។ ឞូនុយ្សអីនៃឞ្រាសអ្យើសលាប់គុតាពាង់ អ៝ន់ពាង់គុលាហោក មោគែសអោសគុតាជៃ គុតានតុកមោចទើមលែៈជ៝ៈនាម់ហើយ។ 28-29គែសអ៝ក់តឹឞ្រាសអ្យើសញុបពាង់ ឞ៝លលាសឞូក៝ត់ជ៝ង់ក៝ត់តីពាង់មារាឆែរាវាក់អ៝ន់គុទូនតុកហ៝ៈ ពាង់ងក្លាសលើយរាឆែរាវាក់លែៈផ្យៅ ជេសរីឞ្រាសអ្យើសលែវពាង់គុអេងតាឞ្រីរាទាសងាយឞើសឞូនុយ្ស។ ត៝ត់ឆៃឞ្រាសយេឆូ រី ពាង់ពាន់តាជ៝ង់ឞ្រាសយេឆូ នៃ ជេសរីឞ្រាសយេឆូ នត្រុតឞ្រាសអ្យើសដាៈពាង់លោសឞើសឞូក្លោអីនៃ យើនមាឞ្រាសអ្យើសអេហ៝ៈលោសអោស ពាង់នតែរទុតនតែសៗងាន់៖ “ហើយឞ្រាសយេឆូ ក៝នកោរាញឞ្រាសអីទុតព្រេសតាកាលើត្រោក មើមមៃជានមាគ៝ប់មេស? ខឹតអោមលោមលាៈ លើយទឹងងក្រីតគ៝ប់”។ 30ជេសរីឞ្រាសយេឆូ អោបពាង់៖ “មើមរាញាមៃមេស?” ពាង់អើស៖ “គ៝ប់រាញាមពោលតាហែនអ៝ក់រាឞាន់”។ ពាង់អើសកើតនៃយ៝រលាសឞ្រាសអ្យើសអ៝ក់ងាន់គុតាឆាក់ពាង់រី។ 31មពោលឞ្រាសអ្យើសអីនៃឞ៝ញឞ្រាសយេឆូ លើយអោសងក្លាច់ខាន់ពាង់តានតូឞ្រ៝ង់អីនតុកតេៈទោយ្សមាឞ្រាសអ្យើស។ 32គែសឆុរផូងគុឆាមពារ៝ៈយោកទាច់មានតុកនៃ។ មពោលឞ្រាសអ្យើសអីរីឞ៝ញឞ្រាសយេឆូ អ៝ន់លាប់គុតាឆុរអីនៃ ជេសរីឞ្រាសយេឆូ អ៝ន់ពាង់លាប់តាឆុរ។ 33ជេសរីមពោលឞ្រាសអ្យើសអីរីលោសឞើសឞូនុយ្សអីនៃលាប់គុតាឆុររីលែៈរាង៝ត់ ជេសរីឆុរអីនៃញច្វាត់រាឞុលជឹតឆ៝បរាប៝ង់ជឹតទាកងលៅរី លាប់តាទាករាម៝កខឹតលែៈផ្យៅ។
34ជេសមពោលច្យាប់ឆុរអីនៃឆៃកើតនៃ ខាន់ពាង់ញច្វាត់មឞើសរ៝មាឞូនុយ្សគុរ៝ៈប៝ន រ៝ៈមីរ។ 35ជេសរីឞូនុយ្សអីតាង់នាវនៃខាន់ពាង់ហាន់អ្វាញ់គៃមាឆៃនហេលនទើអីនៃ។ ត៝ត់តាឞ្រាសយេឆូ ខាន់ពាង់ក្លាចទាទេងាន់ ឆៃឞូក្លោឞ្រាសអ្យើសលាប់នើសគុតានាប់ឞ្រាសយេឆូ រី នទ្រែលមាញឆ៝សខ៝អាវកាសគឹតឆាក់ដ៝ង់។ 36ឞូនុយ្សអីលែៈឆៃមាមាត់នាវនៃ ខាន់ពាង់ដើនងក៝ចអ៝ន់មាឞូអេងមើមបាៈឞ្រាសយេឆូ ជានឞាសមាឞូនុយ្សឞ្រាសអ្យើសលាប់នៃ។ 37លែៈឞូនុយ្សគុរ៝ៈឞ្រីទាច់មាប៝នកេរាឆីន ក្លាចញឆ៝រ់ហោងាន់ ខាន់ពាង់ឞ៝ញឞ្រាសយេឆូ ដាៈពាង់ទូលោសឞើសនតុកនៃ នទ្រីទឹងឞ្រាសយេឆូ ញច៝ទូកឆឹត នទ្រែលមាមពោលអ៝សម៝នពាង់។ 38ល៝ង់ឞូនុយ្សអីលែៈឞ្រាសអ្យើសលោសនៃនើស ពាង់ឞ៝ញទាន់គុនទ្រែលឞ្រាសយេឆូ តីសមាឞ្រាសយេឆូ មោរ៝មអោស ជេសរីលាសមាពាង់៖ 39“មៃឆឹតជឹតជៃមៃនើមរី មឞើសលែៈនាវកោរាញឞ្រាសជានអ្វែសមាមៃនើស”។ ជេសរីពាង់ហាន់លាមប៝នក្វ៝ង់ មឞើសលែៈនាវឞ្រាសយេឆូ ជានមាឆាក់ពាង់នើមនើសរ៝។
ឞ្រាសយេឆូ ជានឞាសឞូអូរជីរីស នទ្រែលមាជានទ៝ក់រេសក៝នយៃរុស
(មថ ៩:១៨-២៦; មក ៥:២១-៤៣)
40ត៝ត់ឞ្រាសយេឆូ ព្លឹឆឹតតារី ប៝នលានរ៝មពាង់ ឞូរានច្វាៈពាង់ យ៝រលាសលែៈឞូនើសអ្វាញ់មាត់តើមត្រ៝ងទាទេ។ 41តានៃគែសទូហ្វេឞូក្លោ ពាង់រាញាយៃរុស ពាង់កោរាញញីសរាបុនផូងអីឆ្រាអែល តានៃ ពាង់រានពាន់តាជ៝ង់ឞ្រាសយេឆូ រី ឞ៝ញជាៈឞ្រាសយេឆូ ហាន់អាជៃពាង់ 42យ៝រលាសក៝នឞូអូរពាង់ជីឞើយខឹត។ ពាង់គែសទូហ្វេក៝នអីនៃទើម ក្លាប់លាស ១២ នាម់។ ជេសរីឞ្រាសយេឆូ ហាន់ជឹតជៃពាង់ រ៝ៈត្រ៝ងនៃគែសអ៝ក់ឞូនុយ្សតឹមមពែតងាន់។ 43តាមពោលនៃគែសដ៝ង់ទូហ្វេឞូអូរជីរីសលែៈជ៝ៈ ១២ នាម់ហើយ ពាង់ហ្វាចលែៈទ្រាប់នទើពាង់ គៃមាអ៝ន់កោរាញទាកឆី តីសមាមោគែសអោសទូហ្វេឞូនុយ្សទើយជានឞាសពាង់។ 44ពាង់អីរីហាន់ឞើសកើយឞ្រាសយេឆូ ពាសតាច្យាង់អាវឞ្រាសយេឆូ រី ជេសរីមហាមពាង់ឞាសនទាលតានៃរ៝មោហោមអោសត្រោស។ 45 ឞ្រាសយេឆូ លាស៖ “ឞូម៝សពាសគ៝ប់?” ទឹងលែៈឞូតានៃ ឞូលាសមោពាសអោស។ ពេត្រោស លាស៖ “ហើយកោរាញ ឞូនុយ្សជុមមៃតឹមមពែតងាន់ ទឹងលែៈឞូគែសគ៝ៈមៃទាទេ”។ 46 ឞ្រាសយេឆូ លាស៖ “គែសទូហ្វេឞូនុយ្សពាសគ៝ប់ងាន់រ៝ យ៝រលាសគ៝ប់គឹតនាវឞ្រាសគែសលោសតាៈឞើសឆាក់គ៝ប់”។ 47ជេសរីឞូអូរអីនៃហាន់តានាប់ឞ្រាសយេឆូ រីញឆ៝រ់ងាន់ ពាន់តាជ៝ង់ឞ្រាសយេឆូ រី ពាង់លែៈគឹតនាវអីនៃពោនមោនទ៝ប់អោស។ ពាង់ងក៝ចអ៝ន់មាឞ្រាសយេឆូ តានាប់ឞូឞាល់ ម៝សយ៝រទឹងពាង់ពាសឞ្រាសយេឆូ មើមទឹងពាង់ឞាសនទាលរ៝។ 48 ឞ្រាសយេឆូ លាសមាពាង់៖ “ហើយអ៝ស នាវអៃញឆីងជានឞាសអៃហើយ ឆឹតអ៝ន់អ្វែសលាង់ដាប់មពាន់យឹ”។
49នោកឞ្រាសយេឆូ ហោមអែងើយនៃ គែសទូហ្វេឞូនុយ្សតាៈឞើសជៃយៃរុស រីមឞើសមាយៃរុស អីកោរាញញីសរាបុន៖ “ក៝នមៃលែៈខឹតមេ លើយហោមរាខ្វាកអោឞាល់”។ 50ត៝ត់ឞ្រាសយេឆូ តាង់ឞូមឞើសកើតនៃ ពាង់លាសមាយៃរុស ៖ “លើយទឹងក្លាចអោស អ្យាត់មាមៃញឆីងមាគ៝ប់ ក៝នមៃរេសរ៝”។ 51ជេសរីឞ្រាសយេឆូ ហាន់ត៝ត់តាជៃយៃរុស ពាង់លាប់តាត្រោមជៃ ឞូអាបាៈអេងមោអោសអ៝ន់លាប់ ពាង់អ៝ន់ពេត្រោស យោហាន យាកើ នទ្រែលមាអីមេៈឞឹក៝នឆែអីនៃ ទូនៃទើមអ៝ន់លាប់។ 52ទឹងលែៈឞូនុយ្សតានៃញុមវើលមាក៝នឆែអីខឹតរីទាទេ ឞ្រាសយេឆូ លាសមាខាន់ពាង់៖ “លើយហោមញុម ពាង់មោអោសខឹត ពាង់ហាក់ឞិចទើម”។ 53មពោលអីនៃគើមមឺចមាឞ្រាសយេឆូ យ៝រលាសខាន់ពាង់លែៈគឹតជេសក៝នឆែអីនៃលែៈខឹតងាន់។ 54ជេសរីឞ្រាសយេឆូ ញុបតីក៝នឆែអីនៃ លាសមាពាង់៖ “ហើយអ៝ស អៃទ៝ក់ហ៝ម់!” 55នោកនៃរ៝ហ្វេងពាង់ព្លឹឆឹតតាពាង់នើម ជេសរីទ៝ក់រេសរ៝។ ឞ្រាសយេឆូ ដាៈឞូឆ៝ៈនទើអ៝ន់មាពាង់ឆា។ 56មេៈឞឹក៝នឆែអីនៃនទ្រ៝ត់ហីសរាហ៝ល់ងាន់មោវ៝ត់អោស យើនមាឞ្រាសយេឆូ ឞ្វៃមោអោសអ៝ន់ខាន់ពាង់ងក៝ចនាវអីនៃមាឞូអេងគឹត។