នាវនទុយ្សផូងនទ្រ៝ង់អ្យើស
1ល៝ង់មាផូងអីឞូនុយ្សនទ្រ៝ង់ អ៝ន់ខាន់អៃមៃញហ្យាង់ញុមនតែរវើលទោ យ៝រលាសនាវរេសរាញាល់មរាគែសតាផូងខាន់អៃមៃរ៝ 2ទ្រាប់នទើខាន់អៃមៃអោមលែៈផ្យៅ ឞ៝កអាវខាន់អៃមៃលែៈតាប់ទឹរឆាដ៝ង់។ 3ព្រាក់មាយ្សខាន់អៃមៃលែៈអាច់គាម់ឆា ត៝ត់មាឆៃអាច់គាម់ឆា រីមើឞូគឹតលាសមោអោសគែសឆ៝ៈព្រាក់មាយ្សមាកើលឞូ គឹតមាឆាក់ខាន់អៃមៃនើមទើម លាសនទ្រីកោរាញឞ្រាសមរាតេៈទោយ្សខាន់អៃមៃតឹមឞានមាអុញទែឆាដ៝ង់។ រានោកអ្យាជេងរានោកងគ្លែៈទុត យើនមាខាន់អៃមៃហោមរាគូមទ្រាប់នទើមាព្រាប់ 4ខាន់អៃមៃមោអោសបើកព្រាក់ងខោមអ៝ន់មាមពោលអីរែកឞាតាឆ្រែខាន់អៃមៃ ជេសរីឞូមរានតោនខាន់អៃមៃយ៝រមាខាន់អៃមៃមោបើកព្រាក់អីនៃ។ ល៝ង់នាវនតែរមពោលអីនៃតាង់ត៝ត់អាកោរាញឞ្រាសអីទុតគែសនាវទើយមាទឹងលែៈនតីលនទើ។ 5ខាន់អៃមៃគុរេសតានែសនតូអ្យាពើសមាឆាកាសវាសងី រ៝ង់មារាង្លៃឆាក់អុចទុតអ្វែសរាម់មអាកងាន់ តឹមឞានមានទ្រោកឆាលៃ យើនមាឞូមរាមឞាងពាង់មាឆា កើតនៃដ៝ង់ ខាន់អៃមៃជានតីសអ៝ក់ពើសមារាម់មអាកខាន់អៃមៃនើមទើម យើនមាកោរាញឞ្រាសមរាតេៈទោយ្សជ្រូមាខាន់អៃមៃ។ 6រាលាវឞើសនៃជឹត ខាន់អៃមៃលែៈតេៈទោយ្ស នទ្រែលមាលែៈងខឹតលើយដ៝ង់ឞូនុយ្សឆ៝ង់អាបាៈ ឞ៝លលាសខាន់ពាង់មោអោសតឹមរាទ៝ង់ដាសខាន់អៃមៃ។
នាវអ៝ត់នូយ្សតានាវជេរជ៝ត់
7អើអ៝សនោតានាវញឆីង អ៝ន់ខាន់អៃមៃអ៝ត់នូយ្សនហ៝មាត៝ត់នារកោរាញយេឆូ ព្លឹវាច់។ ល៝ង់អ្វាញ់មពោលអីជានមីរជានឆ្រែ នតើមឞើសតូចខាន់ពាង់គែសនូយ្សនហ៝ម់អ៝ត់នូយ្សគុក៝ប់ទាកមីសនហ៝មាត៝ត់ឞាទុមគែសព្លៃអីអ្វែសអីតាៈឞើសនែសនៃ។ 8អ៝ន់ខាន់អៃមៃគុក៝ប់មានូយ្សនហ៝ម់អ៝ត់នូយ្សតឹមឞានកើតនៃដ៝ង់ អ៝ន់ខាន់អៃមៃគែសនូយ្សនហ៝ម់ន៝ប់ យ៝រលាសនារកោរាញយេឆូ ព្លឹវាច់ឞើយត៝ត់ជេស។
9អើអ៝សនោតានាវញឆីង លើយអោសអ៝ក់ឞ៝រ់ញជ៝រ់ឆេកនទ្រាង់នើម គៃមាលើយតាកោរាញឞ្រាសតេៈទោយ្ស យ៝រលាសនើមអីផាតទោយ្ស ពាង់លែៈទ៝ក់តាឞោកមពោងជេស។
10ល៝ង់អ្វាញ់មពោលឞូនុយ្សនតើយ្សនាវងើយកោរាញឞ្រាសកាល់អែនើស ខាន់ពាង់មឞើសងក៝ចតារាញាកោរាញឞ្រាសនអ៝ប់មានូយ្សនហ៝ម់អ៝ត់នូយ្ស ឞ៝លលាសឞូជានជេរជ៝ត់មាខាន់ពាង់កាដោយ អ៝ន់ខាន់អៃមៃជានតឹងខាន់ពាង់ទោ។ 11ល៝ង់ឞូម៝សអីវៃគុន៝ប់តានាវជេរជ៝ត់ ឞ៝ន់កើបឞូនុយ្សអីនៃកោរាញឞ្រាសអ៝ន់នាវគែសជេង។ កើតលាសខាន់អៃមៃលែៈវៃតាង់ជេសមាទូហ្វេយោប កាល់អែនើស ពាង់វៃគុន៝ប់តានាវជេរជ៝ត់ ជេសរីខាន់អៃមៃលែៈគឹតដ៝ង់ត៝ត់ឞើសកើយនៃកោរាញឞ្រាសអ៝ន់នាវគែសជេងមាពាង់លើមាហោ យ៝រលាសកោរាញឞ្រាសគែសនូយ្សនហ៝ម់អ្វែស គែសនូយ្សនហ៝ម់យោៈនអាចទុតហោងាន់។
12អើអ៝សនោតានាវញឆីង អីខ្លៃរាលាវលើយអោសត៝នមាត្រោក មានែស មោលាសមានទើអេងៗជឹត។ លាសខាន់អៃមៃលាស «អើ» អ៝ន់គឹតលាស «អើ» លាសខាន់អៃមៃលាស «មោ» អ៝ន់គឹតលាស «មោ» គៃមាលើយអ៝ន់គែសទោយ្ស។
នាវមឞើសឆើម
13តាផូងខាន់អៃមៃ លាសគែសទូហ្វេឞូនុយ្សគែសនាវជេរជ៝ត់ អ៝ន់ពាង់មឞើសឆើម។ លាសឞូម៝សអីគែសនាវរាម់មអាក អ៝ន់ពាង់មព្រើរានេកោរាញឞ្រាស។ 14លាសគែសឞូនុយ្សជី អ៝ន់ពាង់ក្វាល់មពោលកោរាញផូងញឆីង គៃមាកើលមឞើសឆើមមាឞូនុយ្សជីអីនៃ នទ្រែលមាហឹងទាកងីតាឆាក់ឞូនុយ្សជីនៃ ទាន់តារាញាកោរាញយេឆូ ។ 15លាសខាន់ពាង់មឞើសឆើមនអ៝ប់មានាវញឆីង ឞូនុយ្សអីនៃមរាឞាសជីរ៝ កោរាញយេឆូ មរាជានឞាសពាង់អីនៃរ៝។ លាសពាង់គែសជានតីស កោរាញឞ្រាសមរាយោៈនាវតីសពាង់។
16លាសនទ្រីអ៝ន់ខាន់អៃមៃតឹមងក៝ចនាវតីសអ៝ន់មានទ្រាង់នើម នហ៝មាតឹមកើលមឞើសឆើមនទ្រាង់នើម គៃមាឞាសនាវជី។ នាវមឞើសឆើមឞូនុយ្សឆ៝ង់គែសនាវទើយគែសនាវតាមងាន់។ 17គែសទូហ្វេឞូនុយ្សនតើយ្សនាវងើយកោរាញឞ្រាសកាល់អែនើស រាញាអេលីយា ពាង់ឞូនុយ្សកើតឞ៝ន់ដ៝ង់ ពាង់មឞើសឆើមមាលែៈនូយ្សនហ៝ម់ទាន់មោអ៝ន់គែសទាកមីសតាឞ្រីអីឆ្រាអែល ជេសរីត្រោកព្រាង់ជ៝ៈពែនាម់ងគូល។ 18ជេសពែនាម់ងគូលនៃពាង់មឞើសឆើមតៃទូតឹជឹតអ៝ន់គែសទាកមីស ត្រោកគែសមីសរ៝ ជេសរីនែសនតូហ៝ននទើគែសព្លៃ។
19អើអ៝សនោតានាវញឆីង លាសគែសទូហ្វេឞូនុយ្សតាផូងខាន់អៃមៃហ្យើតគុងាយឞើសនាវនតីអីងាន់ ជេសរីលាសគែសទូហ្វេឞូនុយ្សជឹតលែវពាង់ព្លឹឆឹតមាកោរាញឞ្រាស 20អ៝ន់ខាន់អៃមៃគឹត លាសឞូម៝សអីលែវឞូនុយ្សតីសព្លឹឆឹតមាកោរាញឞ្រាស នត្លើយឞើសត្រ៝ងតីសពាង់នៃ ឞូនុយ្សអីនាក់លែវនៃជេងរាក្លាយ្សពាង់ឞើសនាវខឹត ជេសរីកោរាញឞ្រាសយោៈទឹងលែៈនាវតីសតាពាង់អីនៃ៕៚