1គ៝ប់ទាន់លាស តានាវវៃឞ៝ន់ ឞូនុយ្សក៝នដើយអីគែសនទើនទ្រៃតាៈឞើសមេៈឞឹពាង់នើម នោកពាង់ហោមក៝នឆែ នាវគុរេសពាង់អីនៃមោអោសតឹមតីសមាឞូនុយ្សអីជានទឹកឞូ យ៝រលាសហោមគែសឞូនុយ្សម៝ត់អ្វាញ់ពាង់ ឞ៝លលាសពាង់ជេងនើមកោរាញមាទឹងលែៈទ្រាប់នទើនទ្រៃអីនៃកាដោយ។ 2ពាង់អីនៃហោមគុតាន៝ម់នើមអីម៝ត់ពាង់ នទ្រែលមាតាន៝ម់នើមកោរាញម៝ត់អ្វាញ់ទ្រាប់នទើអីនៃ នហ៝មាត៝ត់ទីនារអីឞឹពាង់លែៈតឹមនាលនើស។ 3អេល៝រមាឞ៝ន់ញឆីងមាឞ្រាសក្រីស ឞ៝ន់តឹមឞានមាក៝នឆែកើតនៃដ៝ង់ ឞ៝ន់ជេងទឹកមានាវទើយឞ្រាសអេងៗអីគែសតានែសនតូអ្យា។ 4យើនមាត៝ត់ទីនារអីកោរាញឞ្រាសលែៈអើមនាលនើស កោរាញឞ្រាសញជុនក៝នពាង់នើមអ៝ន់ទែសឞើសទូហ្វេឞូអូរ ជេសរីពាង់គុរេសតាន៝ម់នាវវៃមោឆេ ដ៝ង់ 5គៃមារាក្លាយ្សទឹងលែៈឞូនុយ្សអីគុតាន៝ម់នាវវៃអីនៃ អ៝ន់ជេងក៝នកោរាញឞ្រាសនើមងាន់។ 6យ៝រមាខាន់អៃមៃលែៈជេងក៝នកោរាញឞ្រាសងាន់ ពាង់លែៈញជុនជេសឞ្រាសហ្វេងអ្វែសឞ្រាសក្រីស ក៝នពាង់នើមគុតានូយ្សនហ៝ម់ខាន់អៃមៃ នទ្រីឞ៝ន់ឞ្លាវក្វាល់ពាង់៖ «ឞឹ»។ 7នទ្រីទឹងខាន់អៃមៃមោហោមអោសជេងទឹកជឹត លែៈជេងក៝នកោរាញឞ្រាសនើម។ លាសខាន់អៃមៃលែៈជេងក៝នងាន់ ខាន់អៃមៃមរាឆ៝ៈទើនទឹងលែៈនាវអីតឹមឞានមានទើនទ្រៃអីកោរាញឞ្រាសទែអ៝ន់នៃដ៝ង់។
ពោល គែសនាវរាវៃមាផូងញឆីងតាឞ្រីកាលាតី
8អាល៝រនើសខាន់អៃមៃអេហ៝ៈអោសគឹតនាល់កោរាញឞ្រាស ហោមជេងទឹកមាឞ្រាសអេងៗអីមោទីឞ្រាសងាន់។ 9យើនមាអាបៃអ្យា ខាន់អៃមៃលែៈគឹតនាល់កោរាញឞ្រាស ងើយទូត៝ងលាសកោរាញឞ្រាសលែៈនាល់ខាន់អៃមៃ លាសនទ្រីមើមទឹងខាន់អៃមៃហោមអុចព្លឹតឹមរាង្លាប់តៃមាផូងឞ្រាសអីមោងាន់នៃ អីរាអ្យា អីមោគែសនាវខ្លៃ ជេសរីអុចជានទឹកមាខាន់ពាង់ទូតឹជឹត? 10គ៝ប់ងើយកើតនៃ យ៝រមាគ៝ប់ឆៃខាន់អៃមៃហោមជានតឹងនាវវៃមោឆេ កើបនារអាបាៈខ្លៃរាលាវ ខៃអាបាៈខ្លៃរាលាវ នាម់អាបាៈខ្លៃរាលាវ។ 11គ៝ប់ក្លាចលាសទឹងលែៈនទើអីគ៝ប់លែៈជានការរាអាសរាគាញ់មាខាន់អៃមៃនើស ជេងទើមទាម។ 12អើអ៝សនោតានាវញឆីង គ៝ប់ទាន់ហោងាន់ខាន់អៃមៃ អ៝ន់ខាន់អៃមៃគុងាវតឹមឞានមាគ៝ប់ យ៝រលាសគ៝ប់លែៈញឆីងមាឞ្រាសយេឆូ នទ្រីគ៝ប់មោហោមគុតាន៝ម់នាវវៃ កើតគ៝ប់លែៈគុងាវកើតខាន់អៃមៃមោអោសជានតឹងនាវវៃមោឆេ នើសដ៝ង់។ ខាន់អៃមៃមោគែសអោសជានតីសមាគ៝ប់ នោកគ៝ប់ហាន់អាខាន់អៃមៃទាកឞោកនើស។ 13ខាន់អៃមៃលែៈគឹតជេស នោកគ៝ប់មឞើសងក៝ចនាវមហែមហានអ្វែសអ៝ន់មាខាន់អៃមៃនើស គ៝ប់គែសនាវជីតាឆាក់ជាន់។ 14ឞ៝លលាសនាវជីគ៝ប់អីនៃជានអ៝ន់ខាន់អៃមៃគែសនាវជេរជ៝ត់កាដោយ ហោមខាន់អៃមៃមោមអារ់គ៝ប់ មោអ្វាញ់បឹគ៝ប់ដ៝ង់ យើនមាខាន់អៃមៃរ៝មគ៝ប់តឹមឞានមារ៝មតោងពារ់កោរាញឞ្រាសនើម មោលាសតឹមឞានមារ៝មឞ្រាសក្រីសយេឆូ ងាន់។ 15លាសនទ្រីនាវរាម់មអាកអីខាន់អៃមៃលែៈគែសនោកនៃនើសអាសនតុកអ៝ន់? យ៝រលាសគ៝ប់លែៈគឹតនហេល នោកនៃនើសខាន់អៃមៃអុចមារាវែកគារ់មាត់ខាន់អៃមៃនើមអ៝ន់មាគ៝ប់រ៝លាសមាឞ្លាវជាន។ 16អាបៃអ្យាមើមទឹងខាន់អៃមៃតឹមរាទ៝ង់ដាសគ៝ប់ច្រាវ យ៝រមាគ៝ប់ងើយនាវងាន់ឞើស?
17ផូងនើមនតីងក្លាៈអីនតីអ្យាត់មាជានតឹងនាវវៃមោឆេ ខាន់ពាង់គែសនូយ្សនហ៝ម់គើយ្សងាន់មាខាន់អៃមៃ យើនមាអីនាវអុចនត្រ៝ង់មោអ្វែសអោស ខាន់ពាង់អុចតឹមងខាសខាន់អៃមៃឞើសហេន គៃមាអ៝ន់ខាន់អៃមៃគែសនូយ្សនហ៝ម់គើយ្សតឹងខាន់ពាង់ទុតហោហ៝ៈ។ 18អ្វែសងាន់លាសគែសនូយ្សនហ៝ម់គើយ្សតឹងទុតហោងាន់មាទូនតីលនាវ លាសនាវអីនៃអ្វែស អ្វែសងាន់លាសតឹងនាវអ្វែសបាបើ មោអោសទើនតឹងនោកគ៝ប់ហោមគុនទ្រែលទើម។
19អើអ៝សនោតានាវញឆីងអីតឹមឞានមាក៝នឆៅគ៝ប់នើម នាវគ៝ប់លែវខាន់អៃមៃឆឹតញឆីងមាឞ្រាសក្រីស នើស តឹមឞានមានាវគុអ៝ស អាបៃអ្យាគ៝ប់គែសនាវជេរមាខាន់អៃមៃទូតឹជឹត តឹមឞានមានាវគុអ៝សមាខាន់អៃមៃទូតឹជឹត នហ៝មាត៝ត់ឞ្រាសក្រីស ជេងកោរាញតានាវរេសខាន់អៃមៃងាន់។ 20នាវគ៝ប់ងើយញចីសតាឆ៝ម់បុតអ្យាទាង់ដេៈ គ៝ប់អុចងាន់គុនទ្រែលខាន់អៃមៃ គៃមាគ៝ប់មឞើសងើយរាទឹរាឞាន់ យ៝រលាសគ៝ប់មោហោមអោសគែសនាវមឹនមាញចីសញជ្វាល់អ៝ន់ខាន់អៃមៃ។
នាវតឹមរាង្លាប់អើម នទ្រែលមានាវតឹមរាង្លាប់មហែ
21អើអ៝សនោតានាវញឆីង ខាន់អៃមៃអីអុចគុតាន៝ម់នាវវៃមោឆេ ល៝ង់ខាន់អៃមៃមឞើសមាគ៝ប់ហ៝ម់៖ អាសខាន់អៃមៃមោគឹតបាសម៝សបាៈគែសញចីសតានាវវៃអីនៃ? 22យ៝រលាសលែៈគែសញចីសតានាវវៃអីនៃលាស អាឞ្រាហាម់ គែសឞារហៃក៝នឞូក្លោ អីទូហ្វេអីក៝ន ឞូអូររាញាហាការ ជេងទឹកពាង់នើម អីទូហ្វេជឹតអីក៝ន ឞូអូររាញាឆារា ជេងឞូនុយ្សក៝នមែ។ 23តីសមាក៝នអីទែសឞើសឞូអូរទឹកពាង់នើមនៃ ជេងតាៈឞើសនាវគុអូរឆាយទើម យើនមាក៝នអីទែសឞើសអូរពាង់នើមអីឞូនុយ្សក៝នមែនៃ ជេងក៝នអីទែសតាៈឞើសកោរាញឞ្រាសទែត៝ន។
24លាសនទ្រីនាវអីអ្យាជេងតឹមឞានមានាវនតឹតទូនាវដ៝ង់ យ៝រលាសឞូអូរឞារហៃអីនៃជេងនាវនតឹតមាឞារអឹនាវតឹមរាង្លាប់កោរាញឞ្រាស។ អីទូហ្វេរាញាហាការ ជេងតឹមនតឹតមានាវតឹមរាង្លាប់អីគែសតាយោកឆីនាយ នោកកោរាញឞ្រាសអ៝ន់នាវវៃមាមោឆេ នើស ឞូនុយ្សអីគុតាន៝ម់នាវវៃមោឆេ ជេងតឹមឞានមាទឹកមានាវវៃអីនៃ កើតហាការ ជេងទឹកអាឞ្រាហាម់ ។ 25 ហាការ ជេងតឹមនតឹតមាយោកឆីនាយ តាឞ្រីអារាប់ ជេសរីជេងនាវនតឹតដ៝ង់មាប៝នក្វ៝ង់យេរូឆាលឹម តានែសនតូអ្យា ជេសរីប៝នអីនៃជេងនាវនតឹតមាទឹងលែៈផូងអីឆ្រាអែល អីញអោតនាវវៃមោឆេ ខាន់ពាង់ជេងតឹមឞានមាក៝នហាការ នទ្រីខាន់ពាង់ជេងតឹមឞានមាទឹកមានាវវៃអីនៃ។ 26ល៝ង់ឆារា អីឞូនុយ្សក៝នមែជេងនតឹតមាប៝នយេរូឆាលឹម អីគុតាកាលើត្រោកអីនតុកកោរាញឞ្រាស ជេសរីប៝នអីនៃជេងនាវនតឹតមាទឹងលែៈឞូនុយ្សញឆីងមាឞ្រាសក្រីស ពាង់តឹមឞានមាមេៈឞ៝ន់ នទ្រីឞ៝ន់ជេងតឹមឞានមាក៝នមែដ៝ង់។ 27យ៝រលាសតានាវកោរាញឞ្រាសងើយលែៈគែសញចីសលាស៖
«អើឞូអូរអីមោឞាៈក៝នអីមោគែសក៝ន
អ៝ន់អ្វែសមអាកហ៝ម់!
អៃមោអោសម៝ប់នាវជីគុអ៝ស
អ៝ន់នតែររាម់មអាកហ៝ម់
យ៝រលាសក៝នអីឞូអូរមោអោសគែសឆាយ
គែសអ៝ក់រាលាវមាក៝នអីឞូអូរគែសឆាយជឹត»។
28អើអ៝សនោតានាវញឆីង ទឹងលែៈខាន់អៃមៃតឹមឞានមាអីឆាក់ ក៝នឆារា ដ៝ង់ ជេងក៝នកោរាញឞ្រាសតាៈឞើសកោរាញឞ្រាសលែៈត៝នល៝រ។ 29តារានោកអាឞ្រាហាម់ ក៝នអីទែសជេងតាៈឞើសនាវគុអូរឆាយទើមជានជេរមាក៝នអីទែសតាៈឞើសនាវទើយឞ្រាសហ្វេងអ្វែស។ អាបៃអ្យាគែសតឹមឞានកើតនៃដ៝ង់។ 30យើនមាតានាវកោរាញឞ្រាសងើយ អាមើមលាស? គែសញចីសកើតនអា៖ «អ៝ន់មៃនត្រុតលើយឞូអូរទឹកឞូ នទ្រែលមាអីក៝នឞូក្លោពាង់នៃ គៃមាអីក៝នឞូអូរទឹកឞូមោអោសឆ៝ៈទើននទើនទ្រៃនទ្រែលអីក៝នឞូក្លោឞូអូរក៝នមែ»។ 31អើអ៝សនោតានាវញឆីង លាសនទ្រីទឹងលែៈឞ៝ន់មោអោសទីអីក៝នឞូអូរទឹកឞូ ទឹងលែៈឞ៝ន់ជេងអីក៝ន ឞូអូរក៝នមែ។