ផូងញឆីងមាឞ្រាសយេឆូ តឹមរាង្លាប់ជេងង្វាយ
1គ៝ប់គុតាត្រោមនទ្រូងអ្យា យ៝រមាគ៝ប់ឆើមកើលជានការមាកោរាញយេឆូ ។ លាសនទ្រីគ៝ប់ទាន់ហោងាន់ខាន់អៃមៃគុងាវតឹមទីដាសនាវកោរាញឞ្រាសអុចមាផូងអីពាង់លែៈក្វាល់នៃទោ។ 2អ៝ន់ខាន់អៃមៃញជុរឆាក់ខាន់អៃមៃនើម គែសនូយ្សនហ៝ម់មលែសទេសរាហេត ឞ្លាវអ៝ត់នូយ្ស។ ជេសរីឞ្លាវញឆ្រោយ្សតឹមរ៝ង់នទ្រាង់នើម ឞ៝លលាសឞូនុយ្សអីនៃជានមោអ្វែសមាខាន់អៃមៃកាដោយ។ 3ឞ្រាសហ្វេងអ្វែសលែៈអ៝ន់ខាន់អៃមៃជេងតឹមរាង្លាប់ឞាល់។ នទ្រីអ៝ន់ខាន់អៃមៃញឆ្រោយ្សគុទូនតោរនាវនទ្រែលឞាល់មានាវដាប់មពាន់។ 4ផូងអីញឆីងមាឞ្រាសក្រីស ជេងង្វាយទើម ជេងតឹមឞានមាទូរាង្លៃឆាក់ទើម គែសទូហ្វេឞ្រាសហ្វេងអ្វែសទើម ជេសរីកោរាញឞ្រាសលែៈក្វាល់ជេសខាន់អៃមៃអ៝ន់គែសង្វាយនាវរានើមនៃដ៝ង់។ 5គែសទូហ្វេកោរាញទើម គែសទូនតីលនាវញឆីងទើម គែសទូនតីលនាវជានបាប់តែមយុកមាទាកទើម។ 6គែសទូហ្វេកោរាញឞ្រាសទើមអីឞឹទឹងលែៈឞ៝ន់។ ពាង់កោរាញមាទឹងលែៈឞ៝ន់ ពាង់ទ៝ង់ទឹងលែៈឞ៝ន់ជានការនទើអីពាង់នើមអុច ពាង់គុនទ្រែលទឹងលែៈឞ៝ន់។ 7យើនមាទឹងលែៈឞ៝ន់ទូហ្វេទូហ្វេលែៈឞ្រាសក្រីស អ៝ន់ទើមទាមនាវទើយអេងៗតឹងពាង់នើមអុច។ 8កើតនទ្រីទឹងនាវកោរាញឞ្រាសងើយលែៈគែសញចីសកើតនអា៖
«ជេសពាង់ទើយដាសផូងរាលាង់ពាង់ នោកពាង់ហាវតាកាលើត្រោកនតុកទុតព្រេស ពាង់លែវឞូនុយ្សអីពាង់ញុបក៝ត់នៃឞ្រោៈឞើសកើយពាង់នើម
ជេសរីអ៝ន់នទើអ្វែសទើមទាមមាផូងប៝នលានពាង់នើម»។
9នាវលាស៖ «ហាវតាកាលើ»អីនៃម៝សបាៈគែសនាវខ្លៃ? នាវអីនៃគែសនាវខ្លៃឞ្រាសក្រីស លែៈល៝រជុរជេសតានែសនតូអីទុតទេសអ្យាប៝ត់។ 10 ពាង់អីជុរនៃជេងនើមអីហាវតានតុកទុតព្រេសតាកាលើត្រោក គៃមាជេងកោរាញមាទឹងលែៈនទើ។ 11 ពាង់អ៝ន់ទើមទាមនទើអ្វែសមាផូងប៝នលានពាង់នើម ពាង់អ៝ន់មាឞូនុយ្សអាបាៈជេងកោរាញអ៝សម៝ន អាបាៈជេងនើមនតើយ្សនាវងើយកោរាញឞ្រាស អាបាៈជេងនើមមឞើសងក៝ចនាវមហែមហានអ្វែស អាបាៈជេងកោរាញម៝ត់អ្វាញ់ផូងញឆីង នទ្រែលមាអាបាៈជឹតជេងនើមនតុមនតី។ 12 ពាង់អ៝ន់នទើអ្វែសអីនៃគៃមាកើលទឹងលែៈផូងប៝នលានពាង់នើមឞ្លាវជានការមាពាង់នើម នអ៝ប់មារាទ៝ក់ញជេងផូងអីញឆីងមាឞ្រាសក្រីស អីជេងតឹមឞានមាឆាក់ជាន់ពាង់នើម 13នហ៝មាត៝ត់ទឹងលែៈឞ៝ន់តឹមរាង្លាប់ឞាល់យ៝រមាឞ៝ន់ញឆីងមាក៝នកោរាញឞ្រាស។ ពាង់អ៝ន់នទើអីនៃគៃមាទឹងលែៈឞ៝ន់តឹមរាង្លាប់ឞាល់ យ៝រលាសឞ៝ន់គឹតនាល់ពាង់ ជេសរីទឹងលែៈឞ៝ន់ជេងតឹមឞានមាឞូនុយ្សលែៈក្វ៝ង់តានាវញឆីងតានាវគុងាវ នហ៝មាត៝ត់នូយ្សនហ៝ម់នាវគុងាវទឹងលែៈឞ៝ន់ជេងតឹមឞានមាឞ្រាសក្រីស ងាន់។
14លាសនទ្រីឞ៝ន់មោហោមតឹមឞានមាក៝នឆែទាសមាអ្យាត់នាវឞូនតុមនតីងក្លាៈអុចដ៝ត់អុចតេកឞ៝ន់។ ឞ៝ន់មោហោមអោសតឹមឞានមានទើនហោងកាលើទាកឆ្យាលខោមជឹតនាប់ខោមជឹតកើយ ជេសរីមោហោមទាសមាអ្យាត់នាវឞូឞ្លាវមរោសឞូឞ្លាវរាលាម់នៃដ៝ង់។ 15យើនមានោកឞ៝ន់ងើយនាវងាន់មាឞូ អ៝ន់ងើយមានាវទេសរាហេត។ អ៝ន់ឞ៝ន់លើមាហោទឹងលែៈតាអាប់នតីលនាវជេងតឹមឞានមាឞ្រាសក្រីស ។ ពាង់កោរាញឞ៝ន់តឹមឞានមាឞោកជេងកោរាញមាឆាក់ជាន់។ 16 ពាង់ជានអ៝ន់ឞ៝ន់តឹមរាង្លាប់ឞាល់ តឹមឞានមាកោៈអេងៗតាឆាក់ជាន់តឹមនត្រុបតឹមងក្រេបឞាល់។ លាសនទ្រីលាសទឹងលែៈឞ៝ន់ទូហ្វេទូហ្វេជានអ៝ន់អ្វែសតឹងនាវពាង់អុច នអ៝ប់មាគែសនាវតឹមរ៝ង់ឞាល់មាទឹងលែៈផូងញឆីង នទ្រីទឹងលែៈឞ៝ន់តឹមរាទ៝ក់ញជេងឞាល់។
នាវរេសអើម នទ្រែលមានាវរេសមហែ
17គ៝ប់មឞើសដាៈខាន់អៃមៃជេងនទើតឹមទីមានាវអុចកោរាញយេឆូ ងាន់៖ លើយហោមអោសគុងាវកើតផូងអីមោញឆីងមាឞ្រាសក្រីស យ៝រលាសនាវមឹននាវគឹតខាន់ពាង់អីនៃមោគែសអោសនាវខ្លៃ។ 18នូយ្សនហ៝ម់ខាន់ពាង់ង៝ងាន់ ខាន់ពាង់គុតឹមងខាសដាសកោរាញឞ្រាស មោអោសគែសនាវរេសអីតាៈឞើសពាង់ យ៝រលាសខាន់ពាង់មោអោសគឹតនាល់នាវពាង់។ នូយ្សនហ៝ម់ខាន់ពាង់ទាង់ក៝មោអុចអ្យាត់នាវកោរាញឞ្រាស។ 19ខាន់ពាង់មោអោសឞ្លាវគឹតមានទើអ្វែសនទើអ្យើស ខាន់ពាង់ជេងឞូនុយ្សតឹមទ៝ង់ ជាននទើអ្យើសអាប់នតីលងាន់តឹងរាង្លៃឆាក់កើញ តឹងនូយ្សនហ៝ម់ខាន់ពាង់នើមកើញ។ 20ល៝ង់ខាន់អៃមៃ ខាន់អៃមៃឞូនតីមាឞ្រាសក្រីស មោគែសអោសកើតនអៃ។ 21ខាន់អៃមៃលែៈតាង់ឞូមឞើសងក៝ចនាវឞ្រាសយេឆូ ឞូលែៈនតុមនតីខាន់អៃមៃមានាវងាន់ទាទេអីគុតាឞ្រាសយេឆូ ។ 22ឞូនតុមនតីមាខាន់អៃមៃមអារ់លើយនាវវៃគុងាវអើមអាល៝រនើស មអារ់លើយនូយ្សនហ៝ម់អើម នទ្រែលមាមអារ់លើយទឹងលែៈនាវមឹនអើមអីអ្យើសទាទេ។ នាវមឹនអើមអីនៃលើមាហោមោអោសឞ្លាវគឹតមានទើទីនទើតីស យ៝រមានាវកើញហោអីរ យ៝រមានាវមរោស។ 23អ៝ន់ឞ្រាសហ្វេងអ្វែសជាននូយ្សនហ៝ម់នាវមឹនខាន់អៃមៃមហែទាទេលែៈផ្យៅ។ 24តឹមឞានមាឞូញឆ៝សងគូតខ៝អាវមហែ អ៝ន់ខាន់អៃមៃគុងាវតឹងមានូយ្សនហ៝ម់នាវមឹនមហែអីកោរាញឞ្រាសលែៈញជេងជេងតឹមឞានមាពាង់នើម គែសនាវឆ៝ង់ងាន់ គែសនាវក្ល៝សអ្វែស។
25លាសនទ្រីខាន់អៃមៃលើយហោមអោសតឹមងើយមរោស អ៝ន់ងើយនាវងាន់ហ៝ៈនទ្រាង់ខាន់អៃមៃនើម យ៝រលាសទឹងលែៈឞ៝ន់តឹមឞានមាទូឆាក់ជាន់ទើម។ 26«លាសខាន់អៃមៃជីនូយ្ស ញជ្រាង់លើយអោសជានតីស»។ ជេសរីលើយអោសហោមជីនូយ្សនហ៝មាត៝ត់នារលែៈញ៝ប់។ 27លើយអ៝ន់ឆាតាង់ អីកោរាញមពោលឞ្រាសអ្យើសគែសនាវមានទើមជានតីសយ៝រមានាវជីនូយ្ស។ 28ឞូម៝សអីវៃនតុង លើយហោមនតុងជឹតអោស អ៝ន់ពាង់ញឆ្រោយ្សជានការរាប់ជាប់មាឆាក់ពាង់នើមហ៝ៈ គៃមាគែសនទើមាពាង់នើមនអ៝ប់មាគែសនទើមាកើលផូងអីមោគែស។ 29លើយអោសអ៝ន់នាវអ្យើសលោសឞើសមឞូងខាន់អៃមៃទូនាវ អ៝ន់លោសនាវអីអ្វែសៗទើមគៃមាតឹមកើលរាទ៝ក់ញជេងមាឞូនុយ្សអីតាង់។ អ៝ន់ងើយនាវអីគែសនាវខ្លៃមាឞូ គៃមានាវអ្វែសអ៝ន់មាមពោលអីគុអ្យាត់ដ៝ង់។ 30លើយអោសជានអ៝ន់ឞ្រាសហ្វេងអ្វែសកោរាញឞ្រាសរាង៝ត។ លែៈកោរាញឞ្រាសអ៝ន់ឞ្រាសហ្វេងអ្វែសអីក្ល៝សអ្វែសគុតាខាន់អៃមៃ ឞ្រាសហ្វេងអ្វែសអីជេងតឹមឞានមានទើព្លាក្រេបតាខាន់អៃមៃ គៃមាខាន់អៃមៃគឹតនហេលគែសនាវរាក្លាយ្សងាន់ត៝ត់តានារឞ្រាសក្រីស ព្លឹវាច់។ 31អ៝ន់ខាន់អៃមៃមអារ់លើយអីនូយ្សនហ៝ម់កែសក៝ស នូយ្សនហ៝ម់ហាត់ជាញ នូយ្សនហ៝ម់ជីនូយ្ស នាវតឹមវាល់តឹមមព្រាត នាវងើយញចើតឞូ នទ្រែលមាអាប់នតីលនទើអ្យើស។ 32អ៝ន់ខាន់អៃមៃគែសនូយ្សនហ៝ម់ល៝ង់ នអ៝ប់មាតឹមយោៈនអាចនទ្រាង់នើម។ អ៝ន់តឹមយោៈនទ្រាង់ខាន់អៃមៃនើមមោហោមតឹមកើបនាវតីស កើតកោរាញឞ្រាសលែៈយោៈខាន់អៃមៃមោហោមកើបនាវតីសខាន់អៃមៃដ៝ង់យ៝រមានទើឞ្រាសក្រីស លែៈជេសជាន។