ឆ៝ម់បុតពោលញជ្វាល់អ៝ន់មាផូងញឆីងតាប៝ន
កោរិនតោ រើស ១
នាវឞោកអ៝ន់ឞូគឹតល៝រ
នើមញចីសឆ៝ម់បុតអ្យារាញាពោល ពាង់ញចីសឆ៝ម់បុតអ្យាក្លាប់លាសតានាម់ ៥៦ ក្លាប់លាស ២៣ នាម់ជេសឞ្រាសយេឆូ ទ៝ក់រេស។ ពាង់គុតាប៝នអេផេឆោ នោកពាង់ញចីសឆ៝ម់បុតអ្យា។
រានោកពោល ប៝នកោរិនតោ ជេងទូមល៝ម់ប៝នអីក្វ៝ង់ងាន់តាឞ្រីអាខៃ ជេងឞ្រីគ្រែក អាបៃអ្យា។ ពោល នតើមហាន់មឞើសងក៝ចនាវមហែមហានអ្វែសតាប៝នកោរិនតោ ក្លាប់លាសតានាម់ ៥១ ពាង់គុតាប៝ននៃទូនាម់ងគូល(កាន ១៨:១-១៨)។ ឞើសកើយពោល នៃគែសទូហ្វេរាញាអាពោលុស ដ៝ង់ ហាន់នតីនាវឞ្រាសក្រីស តាប៝នកោរិនតោ (១កោ ៣:៦)។
មាឆ៝ម់បុតអាអេងអីពោល ញចីសទាន់អ្វាញ់តាឆ៝ម់បុតរោមតានាវឞោក «ឆ៝ម់បុតពោល »។
នាវអុចនត្រ៝ង់តាឆ៝ម់បុតអ្យា
ពោល ញចីសឆ៝ម់បុតអ្យាគៃមាព្លើងអើសនាវអោបតាទូមល៝ម់ឆ៝ម់បុតឞើសផូងញឆីងតាប៝នកោរិនតោ (១កោ ៧:២៥) ពាង់គែសដ៝ង់តាង់លឺនាវឞូមឞើសងក៝ចផូងញឆីងតាប៝នកោរិនតោ នៃគែសនាវតឹមពាៈផូង(១កោ ៣:១-១៣) គែសនាវជានមោអ្វែសអាបាៈ(១កោ ៥:១-១៣) គែសឞូនុយ្សអាបាៈមឺចពោល មោអុចឆ៝ៈទើនពាង់ជេងកោរាញអ៝សម៝ន។
នាវខ្លៃអាបាៈអេង
នាវនតីអាបាៈអីអ្វែស នទ្រែលមាអីគែសខ្លៃហោងាន់តាឆ៝ម់បុតអ្យា នាវនតីមានាវញេតឆាងកាសក្ល៝សអ្វែស(១កោ ១១:២០-៣៤) នាវនតីមានាវឞ្រាសហ្វេងអ្វែសទែអ៝ន់ទើមទាម(១កោ ១២:១-៣១) នាវនតីមានាវរ៝ង់(១កោ ១៣:១-១៣) នាវនតីមានាវទ៝ក់រេសតៃ(១កោ ១៥:១-៥៨)។
មឞើសនាវខ្លៃតាឆ៝ម់បុតអ្យា
- នាវអោបអ្វែសលាង់ (១:១-៩)
- នាវតឹមរាលាច់តាផូងអីញឆីងមាឞ្រាសក្រីស (១:១០-៤:២១)
- នាវអ្យើសតាផូងញឆីងតាប៝នកោរិនតោ (៥:១-៦:២០)
- នាវនអាប់អូរឆាយ (៧:១-៤០)
- នទើអោបឞ្រាស (៨:១-១១:១)
- នទើអ្វែសមោអ្វែសតានោកយើកមឞាសមាកោរាញឞ្រាសនើម នាវញេតឆាងកាសក្ល៝សអ្វែស នាវឞ្រាសហ្វេងអ្វែសទែអ៝ន់ទើមទាម នទ្រែលមានាវរ៝ង់មាឞូ (១១:២-១៤:៤០)
- នាវទ៝ក់រេសឞ្រាសយេឆូ នទ្រែលមានាវទ៝ក់រេសតៃផូងអីញឆីងមាឞ្រាសយេឆូ (១៥:១-១៥:៥៨)
- ព្រាក់កើលមាផូងញឆីងតាប៝នយេរូឆាលឹម (១៦:១-១២)
- នាវពោល នតិញអេងៗ (១៦:១៣-២៤)
នាវអោបអ្វែសលាង់
1ឆ៝ម់បុតគ៝ប់ពោល ញចីស គ៝ប់ជេងកោរាញអ៝សម៝នឞ្រាសក្រីសយេឆូ អីតាៈឞើសកោរាញឞ្រាសក្វាល់គ៝ប់ អីតាៈឞើសនាវអុចកោរាញឞ្រាសនើមដ៝ង់។ គ៝ប់នទ្រែលមានោឆោសតែន អីនោឞ៝ន់តានាវញឆីង 2ឞារហៃហេនទាន់អោបនាវអ្វែសលាង់ផូងញឆីងមាកោរាញឞ្រាសតាប៝នកោរិនតោ ។ កោរាញឞ្រាសលែៈក្វាល់ជេសខាន់អៃមៃអ៝ន់ជេងផូងប៝នលានពាង់នើម នអ៝ប់មាជានខាន់អៃមៃលែៈជេងប៝នលានពាង់នើមអ៝ន់គុក្ល៝សអ្វែសយ៝រមានទើឞ្រាសក្រីសយេឆូ លែៈជាន។ ខាន់អៃមៃជេងប៝នលានកោរាញឞ្រាស នទ្រែលមាទឹងលែៈឞូនុយ្សតាអាប់នតុកអីញឆីងមាឞ្រាសយេឆូក្រីស អីកោរាញឞ៝ន់។ ពាង់ជេងកោរាញមាខាន់ពាង់អីនៃ នទ្រែលមាជេងកោរាញមាទឹងលែៈផូងឞ៝ន់ដ៝ង់។ 3ទាន់កោរាញឞ្រាសឞឹឞ៝ន់ នទ្រែលមាកោរាញយេឆូក្រីស អ៝ន់នាវអ្វែស អ៝ន់នាវដាប់មពាន់មាខាន់អៃមៃ។
4គ៝ប់លាសអ្វែសមាកោរាញឞ្រាសបាបើងាន់អ៝ន់មាខាន់អៃមៃ យ៝រមាពាង់លែៈអ៝ន់នាវអ្វែសពាង់នើមមាខាន់អៃមៃតាៈឞើសនទើឞ្រាសក្រីសយេឆូ លែៈជាន។ 5តាៈឞើសខាន់អៃមៃគុនទ្រែលឞ្រាសក្រីស ទឹងកោរាញឞ្រាសលែៈអ៝ន់មាខាន់អៃមៃអាប់នតីលនទើអីគែសខ្លៃ ពាង់លែៈអ៝ន់ខាន់អៃមៃអ៝ក់នតីលនទើ៖ អ៝ន់ឞ្លាវនតីឞូ នអ៝ប់មាលែៈអ៝ន់ខាន់អៃមៃគឹតវ៝ត់អាប់នតីលមពែសមានាវពាង់។ 6នាវកោរាញឞ្រាសអ៝ន់អីនៃអ៝ន់ខាន់អៃមៃគឹតនហេលនានេៈនាវឞ្រាសក្រីស អីគ៝ប់មឞើសងក៝ចមាខាន់អៃមៃលែៈទីងាន់។ 7កើតនទ្រីអាបៃអ្យាខាន់អៃមៃគុក៝ប់ឞ្រាសយេឆូក្រីស អីកោរាញឞ៝ន់ព្លឹតានែសនតូអ្យា ខាន់អៃមៃលែៈគែសអាប់នតីលនាវឞ្លាវអីឞ្រាសហ្វេងអ្វែសអ៝ន់ទើមទាម។ 8កោរាញឞ្រាសជានអ៝ន់ខាន់អៃមៃហោមគុន៝ប់នឹងតានាវញឆីង គៃមាមោអោសគែសនាវមានទុយ្សតានារឞ្រាសយេឆូក្រីស អីកោរាញឞ៝ន់ព្លឹវាច់តានែសនតូអ្យា។ 9កោរាញឞ្រាសរាប់ជាប់ងាន់ ពាង់លែៈក្វាល់ជេសខាន់អៃមៃអ៝ន់គុតឹមរាង្លាប់នទ្រែលក៝នពាង់នើម ជេងឞ្រាសយេឆូក្រីស អីកោរាញឞ៝ន់។
នាវតឹមរាលាច់តាផូងញឆីង
10អើអ៝សនោតានាវញឆីង តាៈឞើសនាវទើយឞ្រាសយេឆូក្រីស អីកោរាញឞ៝ន់គុតាគ៝ប់ ទឹងគ៝ប់ទាន់ខាន់អៃមៃហោងាន់ អ៝ន់ខាន់អៃមៃមឞើសងើយទូនតោរនាវហ៝ៈ លើយអោសតឹមងខាសមពោល អ៝ន់គែសនាវមឹនទូនតោរនាវហ៝ៈ អ៝ន់គែសនូយ្សនហ៝ម់ទូនតោរដ៝ង់។ 11អើអ៝សនោតានាវញឆីង គ៝ប់តាង់ឞូនុយ្សអាបាៈឞើសរានាក់វ៝ល់យោសក្លោអេ មឞើសងក៝ចអ៝ន់គ៝ប់ តាផូងខាន់អៃមៃគែសនាវតឹមរាលាច់ឞាល់។ 12តាផូងខាន់អៃមៃទូហ្វេទូហ្វេលាសអេងៗឞាល់កើតនអា៖ “គ៝ប់អ្យាអីក៝នឆៅពោល !” “គ៝ប់អ្យាអីក៝នឆៅអាពោលុស !” “គ៝ប់អ្យាអីក៝នឆៅពេត្រោស !” “គ៝ប់អ្យាអីក៝នឆៅឞ្រាសក្រីស !” 13លាសនទ្រីអើមឞ្រាសក្រីស គែសតឹមពាៈអ៝ក់កើតនៃលាស? អើមគ៝ប់ពោល លែៈឞូងខឹតតាឆីតឹមរាកាង់អ៝ន់មាខាន់អៃមៃលាស? មោលាសអើមឞូជានបាប់តែមយុកមាទាកអ៝ន់ខាន់អៃមៃតារាញាគ៝ប់ពោល លាស? 14គ៝ប់ទាន់លាសអ្វែសមាកោរាញឞ្រាស គ៝ប់មោអោសជានបាប់តែមយុកមាទាកអ៝ន់មាឞូនុយ្សតាផូងខាន់អៃមៃ មានមាគែសជានអ៝ន់មានោក្រីសពុស នទ្រែលមានោកៃយុស ឞារហៃនៃទើម។ 15លាសនទ្រីមោគែសអោសទូហ្វេឞូនុយ្សតាផូងខាន់អៃមៃទើយលាសលែៈគែសជានបាប់តែមយុកមាទាកតារាញាឆាក់គ៝ប់។ 16អើ គ៝ប់លែៈគែសជានបាប់តែមយុកមាទាកអ៝ន់រានាក់វ៝ល់នោឆាតេផានាស ដ៝ង់ ឞូនុយ្សអាអេងគ៝ប់មោហោមអោសកាសគឹត។ 17 ឞ្រាសក្រីស មោអោសដាៈគ៝ប់ហាន់មាជានបាប់តែមយុកមាទាក ពាង់ដាៈគ៝ប់គៃមាមឞើសងក៝ចនាវមហែមហានអ្វែស។ យើនមាគ៝ប់មឞើសងក៝ចនាវអីនៃមោអោសទ៝ង់នាវងើយគែសនាវមឹនគឹតឞ្លាវអីអ្វែសមាអ្យាត់ ក្លាចលាសងគ្រ៝សលើយនាវទើយតានាវខឹតឞ្រាសក្រីស តាឆីតឹមរាកាង់។
ឞ្រាសយេឆូ ញហើនាវទើយ នទ្រែលមាញហើនាវមឹនគឹតឞ្លាវកោរាញឞ្រាសនើម
18នាវងក៝ចឞ្រាសក្រីស ខឹតតាឆីតឹមរាកាង់នៃ ផូងអីមោញឆីងអីមរារ៝សហេង ខាន់ពាង់កើបនាវងក៝ចអីនៃជេងនទើរាលូកម៝ល់ទើម យើនមាឞ៝ន់អីកោរាញឞ្រាសរាក្លាយ្ស ឞ៝ន់កើបនាវងក៝ចអីនៃជេងនាវទើយកោរាញឞ្រាស។ 19នាវអីនៃតឹមទីមានាវលែៈគែសញចីសតានាវកោរាញឞ្រាសងើយ៖ «កោរាញឞ្រាសលាស៖
«គ៝ប់មរាងគ្រ៝សលើយអីនាវមឹនគឹតឞ្លាវតាឞូនុយ្សអីគែសនាវមឹនគឹតឞ្លាវ
គ៝ប់មរាលើសហេងលើយនាវឞ្លាវមឹនតាឞូនុយ្សអីគែសនាវឞ្លាវមឹនដ៝ង់»»។
20លាសនទ្រីឞូនុយ្សអីគែសនាវមឹនគឹតឞ្លាវ ឞូនុយ្សអីនើមនតី នទ្រែលមាឞូនុយ្សអីឞ្លាវមេតអ្វាញ់នាវជ្រូៗតារានោកអ្យា អើមហោមឞ្លាវជានដ៝ង់ លាសកោរាញឞ្រាសលែៈលើសលើយអីនាវគឹតឞ្លាវតានែសនតូអ្យាអ៝ន់ជេងរាលូកម៝ល់ច្រាវ! 21កោរាញឞ្រាសជានអ៝ន់ឞូនុយ្សតានែសនតូអ្យាមោអោសទើយគឹតនាល់ពាង់តាៈឞើសនាវមឹនគឹតឞ្លាវខាន់ពាង់នើម ពាង់ជានកើតនៃតាៈឞើសនាវមឹនគឹតឞ្លាវពាង់នើម។ កើតនទ្រីទឹងកោរាញឞ្រាសរាក្លាយ្សឞូនុយ្សអីញឆីងតាៈឞើសនាវមឞើសងក៝ចនាវមហែមហានអ្វែសអីឞូនុយ្សអាអេងទែកើបរាលូកម៝ល់អីនៃ។ 22ផូងអីឆ្រាអែល អុចឆៃនទើមឞេននាវខ្លៃល៝រ រីមើខាន់ពាង់អុចញឆីងមានាវមឞើសងក៝ចនៃ។ ផូងគ្រែក អុចឆៃនាវមឹនគឹតឞ្លាវឞូនុយ្សតានាវមឞើសងើយ រីមើខាន់ពាង់អុចញឆីង។ 23យើនមាហេន ហេនហោមមឞើសងក៝ចមានាវឞ្រាសក្រីស ខឹតតាឆីតឹមរាកាង់ គៃមារាក្លាយ្សឞូនុយ្សឞើសនាវកោរាញឞ្រាសតេៈទោយ្ស។ ជេសរីផូងអីឆ្រាអែល រាលាច់មោអុចអោសនាវអីនៃ ជេសរីផូងអីមោទីផូងអីឆ្រាអែល កើបនាវអីនៃជេងនាវរាលូកម៝ល់។ 24យើនមាទឹងលែៈផូងអីលែៈកោរាញឞ្រាសទែក្វាល់ជេស គែសនអ៝ប់មាផូងអីឆ្រាអែល នអ៝ប់មាផូងអីមោទីផូងអីឆ្រាអែល ផូងអីនៃកើបឞ្រាសក្រីស ញហើនាវទើយ នទ្រែលមាញហើនាវមឹនគឹតឞ្លាវកោរាញឞ្រាសនើម។ 25ម៝សនទើអីឞូកើបរាលូកម៝ល់តាកោរាញឞ្រាស យើនមាហោមគែសនាវមឹនគឹតឞ្លាវរាលាវមានាវមឹនគឹតឞ្លាវឞូនុយ្ស។ ជេសរីម៝សនទើអីឞូកើបមោអោសគែសឆ្វានទាង់តាកោរាញឞ្រាស យើនមាហោមគែសឆ្វានទាង់រាលាវមាឆ្វានទាង់ឞូនុយ្សដ៝ង់។
26អើអ៝សនោតានាវញឆីង អ៝ន់ខាន់អៃមៃគឹតតានាវអ្យា៖ តាផូងខាន់អៃមៃ នោកកោរាញឞ្រាសក្វាល់ខាន់អៃមៃនើស មោលាង់គែសអោសឞូនុយ្សអីឞូកើបគែសនាវមឹនគឹតឞ្លាវ ជេសរីឞូនុយ្សអីក្វ៝ង់ មោលាសឞូនុយ្សអីរាន៝យទែសនទ្រ៝ង់ក៝ៈមោលាង់គែសដ៝ង់។ 27យើនមាកោរាញឞ្រាសលែៈកើយ្សជេសនាវអីឞូនុយ្សតានែសនតូទែកើបរាលូកម៝ល់នៃ គៃមាអ៝ន់ផូងអីគែសនាវមឹនគឹតឞ្លាវដីតព្រេង ជេសរីពាង់លែៈកើយ្សជេសនាវអីឞូនុយ្សតានែសនតូទែកើបមោគែសឆ្វានទាង់នៃ គៃមាអ៝ន់ផូងអីគែសឆ្វានទាង់ដីតព្រេង។ 28កោរាញឞ្រាសលែៈកើយ្សជេសនាវអីឞូនុយ្សតានែសនតូទែកើបទុតជេៈ នាវអីឞូទែមឺច នទ្រែលមានាវអីឞូកើបមោអោសគែសនាវខ្លៃទូនតីល ពាង់ឆ៝ៈទឹងលែៈនាវអីនៃគៃមាងគ្រ៝សលើយទឹងលែៈនាវអីឞូនុយ្សកើបគែសនាវខ្លៃ។ 29កោរាញឞ្រាសជានកើតនៃ គៃមាទឹងលែៈឞូនុយ្សមោហោមអោសគែសទូហ្វេឞ្លាវនហីអេងឆាក់តានាប់មាត់ពាង់នើម។ 30កោរាញឞ្រាសជានអ៝ន់ខាន់អៃមៃលែៈគុនទ្រែលឞ្រាសក្រីសយេឆូ កោរាញឞ្រាសជានអ៝ន់ឞ៝ន់គែសនាវមឹនគឹតឞ្លាវតាៈឞើសឞ្រាសក្រីសយេឆូ ។ តាៈឞើសឞ្រាសក្រីសយេឆូ ទឹងកោរាញឞ្រាសកើបឞ៝ន់ឆ៝ង់ ជេងប៝នលានក្ល៝សអ្វែសពាង់នើម លែៈគែសនាវរាក្លាយ្ស។ 31លាសនទ្រីនាវអីនៃតឹមទីមានាវកោរាញឞ្រាសងើយលែៈគែសញចីសជេស៖ «ឞូម៝សអីអុចរានេអេងឆាក់ពាង់នើម អ៝ន់ពាង់រានេមានទើកោរាញឞ្រាសជានតាពាង់ទើមហ៝ៈ»។