Allah Yubu

1Lea me mangal dolamogpa, Rahel nenekori, “Naro'el me mangal dolamlaba, na me mangaro an koma wamna,” aro elto'elag wana mali uro seneraglamogti, Yakubag yubu lelamogti, “Me nhon tatnululam kom, tanena na tebanun,” seog.
2Wene seogpa, Yakub neneko wanaag yo sembaogti, “Na Allah saog uro wamna kom. El nenekori seneraghogne sunsunum uro an ibili talamlam,” aro Rahel wabaog. 3-4Wabaogpa, Rahel nenekori yubu lelamogti, “Na arukna Bilhaap maptumunba, eldi me mangaro na ilag pipleba, nari me talul,” aro eldi arukna Bilha aneko ela'ange Yakubag ambarogpa, Yakub elkel wilindipne taog. Yakub neneko Bilha anekoap maptekpa, 5me monag taogpa, me nengabo me mangaro aog. 6Mangaro aogpa, Rahel nenekori yubu lelamogti, “Nari Allahag mololamnoba, ka'ebaneori, nanag sip tangto me nengabo me tatnel,” aro me si Dan engkaog.
7Wamekti, Bilha nenekori nen sap me nhon monag taogpa, Yakub elme nengabo me mangaro aog. 8Mangaro aogpa, Raheldi yubu lelamogti, “Naro'elap talamnomori, na paliag neneptano,” aro me aneko si Naptali engkaog.
9Wamekti, Lea nenekori, “Me mangaro anep kom saog wamna,” sembaogti, elenge arukna Silpa neneko “Yakub elkel tale,” sembaogti tarog. 10Tarogpa, Silpa nenekori me nengabo me nhon Yakub sembe mangkarog. 11Mangkarogpa, Lea nenekori yubu lelamogti, “Na wali neneptan,” aro me si Gad engkaog.
12Wamekti, Silpa nenekori nen sap me nengabo me nhon mangaro aog. 13Mangaro aogpa, Lea nenekori yubu lelamogti, “Na wali kel neneptan. Ora kelabori, 'El wali,' senelamnukang,” aro me aneko si Aser engkaog.
14Wamekti, wal tomneag Ruben neneko paiag piogti, kal wana terobpa me yag tananne sembe terop kal wana tobogti, ilin Lea tarel aog. Ilin Lea tarel aogne Rahel el taogti, yubu lelamogti, “Kal wana anmeri payalne olog tatne,” aro Leaag molbaog. 15Molbaogpa, Leari yubu lelamogti, “Andi na'ange tobomne sunsunum komdi, wene babe 'Kal wana ane babe tomnun,' aro ulamlam?” aro wabaog.
Wabaogpa, Raheldi, “Hae, kal wana anmeri tol pildi, tarel aghelba, tatnemendi andi kamna saog uro inipna Yakubap mapturom,” aro ambarog.
16Sinag Yakub aweag agha yalamogpa, Lea whingag piogti ambarelamogti, “Kal wana me yag tananne sembe terop kal wana nameri tol pildi, tarel anelba, nari Rahel tatnange sembe kamna saog uro 'Yakubap mapturom,' selba, sumene nanap mamnunam,” aro ambarog. Ambarogpa, sumeneko inipna Leaap nhon maptek. 17Maptekpa, Leari Allahag mololamogne sunsunum uro me monag taogpa, Leah elme lamne Yakub sembe mangkarog. 18Mangkarogti, yubu lelamogti, “Nanenge arukna aneko na'angeag ambatnonge sembe kamna Allahri tatnel,” aro me si Isakhar engkaog.
19Wamekti, Lea neneko me monag nhon taogpa, Lea elme no'opne Yakub sembe mangkarog. 20Mangkarogti, yubu lelamogti, “Allahri ya'ag tapto walia tatneoba, wene na'ange sembe me no'opne mangkatna anekona eldi na sembe wali sembamneleba, ya'ag ma'aro wamnunam,” aro me si Sebulon engkaog.
21Wamekti Lea nenekori kel nhon mangaro aogti, kelme si Dina engkaog.
22-23Olog wamekti, Allahri Rahel sembe ekon tan koma seneraghogpa, Raheldi mololamogne sunsunum uro me nhon monag taogpa, me nengabo me mangaro aog. Mangaro aogti, Rahel nenekori yubu lelamogti, “Na ali uro wamnonge neneko NANI Allahri kom nembaldi, 24amik me nengabo me nhon tatnilul,” aro me aneko si Yusup engkaog.
Yakubap Labanap yubu nikne lepteka (30:25-43)
25Raheldi Yusup mangkaogpa, Yakubti Labanag yubu lelamogti, “Weneogna sae limnemenba, nanenge mog so'oag punun. 26Nanenge kelabo phendeap, nanenge maboap, sin topsinonge, awang, an el wamlam. Na awe maikno welamnori, topsi. Ane sembe nhon pukap,” aro molbaog. 27Molbaogpa Labandi yubu lelamogti, “Na lia peneheng kom, kekneba wene ulamlange iamnange nia mangkina nanag wamlange Allahri an pere agha yepneo. 28Ane sembe, 'Kamna tatnoho,' sembamlamne etbare leplulam,” seog.
29Wene seogpa Yakubti lelamogti, “Nawang, awe maikno tolamnange an el wamlam. Pham babe wene andinge maikno talamlange 30nari pia ulamsinba. Na anam yan komag awangdinge sa'a-sa'a etbare wamo kom, aghana awang wene an nubu taom. NUNI Allahri yepkeonge babe nanag agha. Wene naringe kelabo me sembe awe wero tomnun,” seog.
31Wene seogpa Labandi, “Wene selamba, sa'a agha tatkinun?” seogpa, Yakubti, “Awangdi, sa'a undoba tatneheng kom. Pham andinge nari piamsinun. Ot nari lepnunne nene sembe awangdi, 'Wali,' sululam: 32Na sumene pham kambing domba anabi toman yabalamneri, pham domba me mirinneap, pham kambing domba ma'i ukum siptopneap ni kamna saogne topsunun,” seog. 33Seogti, “Amik ik nhon nari pham kemelapmenba, pham domba kambing hong solomne undo nari pham anabiag wamikpa, ipmen tanena, 'Haogha tobo,' sembalulam. Aghana nari pham anabiag pham hong solomne orogtina, 'Yakub sik urop nimi wamla,' sembalulam” seog.
34Wene seogpa Labandi, “Ot andi leplamne neneog uanunam,” seog. 35-36“Uanunam,” seog, aghana Yakub anam toro pil phiog kom agha sumeneko babe Labandi, “Yakub mane ulamna,” aro eldi pham kambing yemne kelneap, parektopneap, hong yogto-yogto siriktopneap, ma'i ukum siptopneap, domba me mirinne babe, ni taneko toro Labandi elmaboag, “Weag pham yag lambahukap,” seog.
Wene seogpa, Labanap elmaboapti tognoro yag lambahiekti, Yakub laploa palamekti, inaag inipna ik wilindi maro piek. Maro piekpa Yakubti pham Labandinge nen laplopsiekne yae uro wamog.
37Yae uro wamogti, Yakubti ere saog kal tunguna sae erenne sae nhon tobogti, kon septo tobog. Kon septo tobogti, kal pun solomne kemelamog. 38Kemelamogti, tunguna kon septo tobogne ane pabiog. Pabiognena, pham kwaneng mag terobag pham yaekti, lop phamap kel phamap nebel talamikti, yina tobukang senenag aneko tunguna ikog. 39Tunguna ikoghag lop pham kel pham nebel talamekti, pham ma'i ukum siktopneap, parektopneap, yogto-yogto siriktopneap, mangal talamek. 40Yakubti kemelamogpa, pham maikno taikpa, mangal talamekne Yakubti pham me pogto, Labandinge nenag palilamog, el damnangdinge nenag sip palilamog. Palilamsiogti, pham Labandinge ma'i ukum siptopneap, parektopneap, yogto-yogto siriktopneap wamekne ane yogto pabihiogti, “Nandam pham maikno taukang,” aro eldi pham whingag wimbahiog. Labandi pham nhonag Yakubti pham nhonag mo'olamsiog. 41-42Mo'olamsiogti, pham me mangap taukang arobag kame aneko iklamog. Sikin kwaneng mag telamekti, “Anea mangal talamukang,” aro eldi kame tunguna palilamog. Mikipne whingag sip tunguna palilamog, aghana mikip komne sembe palilamog kom. Ane sembe mikipne mangal talamekne Yakub saeag talamogpa, mikip komne mangal talamekne Laban saeag talamog. 43Unulamogti, Yakub pham tupne taog. Eldi aruknaap, kelaboap, nengaboap, maikno wamek. Eldi popsirop pham untaap, keledaiap babe maikno wamog.

*30:6 Nimi si “Dan” engeropne anena, “Nanag sip tangtal,” aro engkaog.

†30:8 Nimi si “Naptali” engeropne anena, “Nimiap nari talamnomoa,” aro engkaog.

‡30:11 Nimi si “Gad” engeropne anena, “Walia imna,” aro engkaog.

§30:13 Nimi si “Aser” engeropne anena, “Awi wamna,” aro.

*30:14 Yahudi yubu tobognena, “Roti wana kareptop li” tobog aghana nu sembe wal wilindipneag, wal tomneag kareplamek.

†30:14 Yahudi yubuag kal wana ane si “dudaim” engerop.

‡30:18 Nimi si “Isakhar” engerop lilim ane, Yahudi yubuagna “kamna” arop yubu ene nikne.

§30:20 Nimi si “Sebulon” engeropne ane “maiptopne” aropne saog uro wamla.

*30:24 Nimi si “Yusup” engeropne ane, “Ma'aro tatnelul” aro engkaog.

30:32 Sumbaogha 31:9-12

†30:37 Ere saog kal Yakubti mog so'oag wamogne ene sina “kal hawar, kal badam, apna kal berangan” wamog.