1Susulud, achiyu gamgaman un mantudtuchu si ugud Apudyus ti ammuyu un lachegchegson chi mangkukuis Apudyus kan cha pin-a mantudtuchu si ugudla, lu cha tudtuchuwancha. 2Losan taku achu mikachaw-asala. Ngim lu awed tagu un maattomala un achipun man-ugud si lawwing, ked laangsan ya maallechela long-egla.

3Isun chi kabyayu, lu mapatingeɏan chi tupokla, tumuttuwa kan chitaku, makwa un ipooy taku kabyayu si pion taku un mangikaplan. 4Isun bo chi bapur, ulay lu chakeɏ ya michulun chi lapigsan bidbid, makwaʼn mipooy chi chalibyeɏ si piolaʼn mangikaplan gapu si byenbyen-it un tabla un awed si pon-edla. 5Katchi bo tupok taku, ulay lu byenbyen-it ked mamaspasweɏ. Ya isun chi byenbyen-it un peɏatik chi apuy, lu gungngot makwaʼn lasapola eɏwa-eɏwa un gilubyat. 6Ha tupok taku ked isun chi apuy ti siya mampeɏpuwan cha lawwik un ugud un umiklap ya mampeɏwing si kilatatagu taku. Ti si Satalas chi meɏpuwan cha lawwing un ibusgey chi tupok.

7Losan un kalasin chi atap un ayam, cha sissiwit, cha mangkakkachap ya cha inggew si chelum ked makwaʼn paamuwon chi tagu ked alla cha lapaamu. 8Ngim lappun tagud makapaamu si tupokla. Ti achipun makaiyattom ya man-ugud si lawwing un isun chi kochot un umtoy.

9Ha tupok useɏon takuʼn manchayaw kan Apu taku ya Ama takuʼn Apudyus ya siya bo useɏon takuʼn man-eɏaweg si asintatagu taku un kingwan Apudyus un kais-isula. 10Ossaan chi tupok, ngim manchayaw ya man-eɏaweg. Susulud, chakampun otyan un katchi! 11Ha miyaligela, awed kamman uud un manchisan lumoswad chi mampeɏkas ya manggigipɏok un chelum? 12Lappun! Ti achipun makwaʼn lumoswa chi mampeɏkas un chelum si uud un siya lumos-loswaan chi manggigipɏok un chelum. Isula bo un ha byeybyey ked chakampun un siya meɏpuwan chi mailum un chelum. Isulaʼn lappun geyabya un mamunga si mangga ya lappun grapes un mamunga si geyabya.

13Awed kamman lalaing ya malag-awat kan chikayu? Lu awed, masapuɏn ipailala kilalaingla si bibiɏuʼn biyegla si mangwaala si bibiɏuʼn angwat un lapakumbyabya. 14Ngim lu amod chi aposyu ya lakukuttuman kayu, achiyu otyan ilastug un mangibyegan lalaing kayu ti lambyalilonyu tilutuli chi katuttuwaan. 15Ha katchiʼn laing ked chakampun un lampeɏpu kan Apudyus, ngim lampeɏpu si somsomok chi tagu, un lailubungan ya lampeɏpu kan Satalas. 16Ti lu awed apos ya kutum, ked lappun timpuyug ya awed losan un kalasin chi kilalawwing.

17Lu awed kan chitaku kilalaing un lampeɏpu kan Apudyus, ked mampeɏkas taku, pion taku mallin-awa, sumayakaw taku, malagteun taku, malagkachegu taku ya pasig bibiɏu koon taku kan cha asintatagu taku ya achipun taku mampili si tagu ya achipun taku mamappain-on. 18Ked lu mapalin-awa taku cha uchum, isun chi lammuɏa taku si lumin-awaan, un siya ibungala kilalintog un bibiɏuʼn angwat.