1Ked sakon si Paul, un labyaɏud gapu si mansimbiyak kan Jesu Kristu kan chikayuʼn Gentil, iluwaluk chikayu kan Apudyus ta matuɏungan kayu. 2Ked chingngeɏyu un illidchon Apudyus kan sakon chi biyang un mangipatigammu si kachegula kan chikayu, un siya bumaɏuwanyu. 3Ti achipun lipakaammu mipanggop si lipatiyanyuʼn Gentil kan Apudyus inggala si sala, ngim impakaammun Apudyus kan sakon, ked siya allaʼn insuɏatku kan chikayu si sala. 4Ked lu byasaonyu alla, maammuwanyu man-aawatku si planun Apudyus mipanggop kan Jesu Kristu un achipun lipakaammu. 5Ti inggan chi sin-eɏgew, lappun tagud langagammu si planun Apudyus, ngim si sala, impakaammun chi Ispiritun Apudyus kan chikami un chilutukalaʼn apostolesla ya propetala. 6Ked gapu si litimpuyugenyu kan Apu Jesu Kristu, chikayuʼn Gentil makabingay kayu si idchon Apudyus kan chikami un Judio, ya mibilang kayu bo kan chikami un isun chi long-eg Jesu Kristu.

7-8Ulay lu sakon chi kabyabyaan un tagun Apudyus, killingwala sakon un mansimbi kan siya ti illidchelak si pallakabyelin un mangipakaammu si bibiɏuʼn chameg kan chikayuʼn Gentil. Ked impiyeɏla kan sakon un ipakaammuk kan chikayu kachegun Jesu Kristu un lappun miyisuwala. 9Ked ha osaʼn imbyegan Apudyus, ipakaawatku kan cha losan un tagu in-ilon Apudyus un mangipatungpeɏ si planula un achipun lipakaammu. Ti si Apudyus un langwa si losan, achipunla impakaammu hachiʼn planula inggala si sala. 10Ked ulay cha losan un achipun maila un alla kilabyelincha, bibiɏu man willu lawwing, achipuncha ammu ti lakaskaschaaw chi kilalaing Apudyus, ti ha piola, chitakuʼn mamati kan Jesu Kristu chi mangitullongancha si kilalaing Apudyus un lappun miyisuwala. 11Hachi planun Apudyus, lisisigud si somsomokla, ked lipatungpeɏla losan mipagapu kan Apu takuʼn Jesu Krsitu. 12Ked si sala, gapu si lamatiyan taku kan Jesu Kristu ya litimpuyugen taku kan siya, achipun taku umogyat un umacheli kan Apudyus si losan un kochewon taku. 13Ked achi kayu otyan maasusu gapu si allaʼn mapaligatak gapu kan chikayu, maalusak losan ti bumaɏuwanyu.

14Lu somsomkok losan cha killingwan Apudyus un Ama taku, mampalintumingak un malaychayaw kan siya 15un puun cha losan ya siya bo Aman cha losan, ulay ud langit ya utla pita. 16Iluwaluk kan siya un kangatuwan, ya lappun makasomsomok si pallakabyelinla ta pakoscheɏola somsomokyu gapu si Ispiritula. 17Iluwaluk bo ta inggew si Jesu Kristu si somsomokyu gapu si pammatiyu ya lumamut si somsomokyu cha man-aayatyu 18taplu kabyeeɏanyuʼn maawatan chi kilapakchot chi ayat Jesu Kristu kan chitaku. Ya chakampun un abus kayu, ngim ulay cha losan un tagun Apudyus, maawatancha losan chi ayat Kristu un lappun miyisuwala. 19Ulay achipun taku makasomsomok si kilapakchot chi ayat Kristu kan chitaku, iluwaluk ta machogchog-an otyan chi maawatanyu inggala miyugali kan chikayu ugalin Apudyus un lappun mangkuɏangala.

20Ulay silu kochewon taku kan Apudyus, makwa un chog-ala cha koola lu kochewon taku willu somsomkon taku, ti lappun kiged chi pallakabyelinla, ti ulay lu achipun taku makasomsomok, makwa kan siya. Ti ha pallakabyelinla, mangkawachi kan chitaku ta matuɏungan taku. 21Ked chitaku losan un mamati, chaychayawon taku si Apudyus si ing-inggala gapu kan Jesu Kristu ya lipatiyan taku kan siya! Amen.