1Ked chikami un makakawachi kan Apudyus, mangkadkachegu kami kan chikayu ta achiyu mambyalilon chi kachegun Apudyus kan chikayu lappun simbila. 2Ti kalan Apudyus,
“Chingngeɏk chi chilawatyu, hachi ustuʼn timpu un kacheguwak chikayu,
ked tuɏungak chikayu lu chumtong chi eɏgew un malaguwak kan chikayu.”
Ked chongɏonyu, sala ustuʼn timpu un mangawatanyu si kachegun Apudyus,
ti sala ustuʼn eɏgew un mataguwanyu!
3An-allechenmi ta lappun machillaw si mansimbiyanmi kan Apudyus. Siya ipapatimi tipochon ta lappun makabyasuɏ. 4Ked ipailami un chikami bubùulon Apudyus si losan un koonmi. Ked ipapatimi un mangiyalu-alus kan cha losan un sakit, ligat ya losan un kaog-ogyat un makmakwa. 5Labyaubyautan kami ya libyaɏubyaɏud kami. Ya gilulugulu chikami bo. Ya lauungeɏ kami bo, ked lapachasanmi un lapuyapuyatan ya labitibitin. 6Ked gapu ta mampeɏkas chi somsomokmi ya laammuwanmi chi katuttuwaan, ya kilaalus, ya kilamalegchegu, awed chi Ispiritun Apudyus kan chikami, ya ipailami bo tuttuwaʼn ayatmi kan cha losan un tagu. 7Gapu si mangibyegbyeg-anmi si katuttuwaan un ugudla ya pallakabyelin Apudyus, kilabiɏumi aggommi un mangɏogenmi si cha kabusuɏ ya mangkaɏasegmi kan cha mangwa si lawwing kan chikami. 8Ulay chayawon chikami ya pabiilan chikami. Ya ulay lu ak-akiton chikami willu bibiɏuwon chikami. Kalanchaʼn latuli kami, siyad abus uguchonmi katuttuwaan. 9Ulay lu kalanchaʼn lappun bilangmi ti machamchameg kami. Ked ulay sosòogonmi matoyanmi, mamàila un matatagu kami. Ya ulay lu mapampaligatan kami, achipun kami mapatoy. 10Ked ulay lu manchachauy kami, pasig kami bo lagalas. Ya ulay lu kalanchaʼn kapus kami, ngim pabyaklangonmi cha achuʼn tagu. Ked isun chi lappun mabyelinmi, ngim uwami losan si ing-inggala.
11Chikayuʼn susulud utlat Corinth, gapu si ayatmi kan chikayu, imbyegbyegami losan un somsomokmi kan chikayu. 12Chakampun un chikami langkuɏang chi ayatla kan chikayu, ngim chikayu kuɏang chi ayatyu kan chikami. 13Ked chikayuʼn ibilangkuʼn aalakku, pakoscheɏonyu otyan chi ayatyu kan chikami un isun chi man-aayatmi kan chikayu.
Achi Taku Otyan Maawis Si Pin-an Cha Achipun Mamati Koon
14Chitakuʼn mamati, achipun makwa un mitimbuɏuy taku kan cha achipun mamati. Ti achipun makwa un mantipug chi bibiɏu ya lawwing. Makwa kamman un mantipug chi gikbot ya padcha? 15Achipun bo makwa un mantimpuyug cha Kristu kan Satalas. Ked isun bo cha mamati ya achipun. 16Ti makwa kamman un mantimpuyug chi templon Apudyus ya silan-apudyus? Ti chitaku chi templon chi latattaguʼn Apudyus. Ti imbyegan Apudyus,
“Inyak mikabyeɏoy ta inggewak kan chicha,
ta sakon chi man-Apudyuscha ya chicha mantaguk.”
17Ked kalan bo Apudyus,
“Telanyu chicha ked summila kayu kan chicha. Achiyu oglen chi kaisaw,
ked awatok chikayu.
18Kalan chi mallakabyelin un Ap-apu, Sakon chi amayu ya
chikayu man-alakku.”