1Allaya cha tudtuchuk kan chikayuʼn mangipangpangu kan cha mamati utlat. Kalobbongak un maludtuchu kan chikayu ti sakon boʼn suludyu, osaak un mangipangpangu ya tistigu si lapaligatan Kristu, ked siya mipatiyak si machayawala un mipaila. 2Masapuɏʼn ayyuwalanyu cha mamati un lipiyeɏ kan chikayu un isun chi keɏlilun Apudyus. Koonyu biyangyu, chakampun otyan un mapatut kayu ngim gapu si ayatyu. Chakampun otyan un gapu si agum chi pilak, ngim gapu ta pionyuʼn mansimbi kan Apudyus. 3Achiyu ipatut chi pionyu si tagu un lipiyeɏ kan chikayu, ngim chikayu otyan chi mantuɏachencha. 4Ked lu mampaila si Jesu Kristu un Ap-apun chi Pastuɏ, awatonyu machaychayaw un koronaʼn mallalayun.

5Katchi bo kan chikayuʼn bumaru, masapuɏʼn mampaituray kayu kan cha pallakayon. Ya chikayu losan, masapuɏʼn lapakumbyabya kayu si kacha osa, ti kalan chi liigili un ugud Apudyus,

6Ked mampakumbyabya kayu kan Apudyus un mallakabyelin ta siya mangipangatu kan chikayu lu chumtong chi timpula. 7Ipiyeɏyu cha losan un suklutyu kan Apudyus ti siya mangay-ayyuwan kan chikayu.

8Mansasaggala kayu otyan ya man-alled kayu. Malliklikwos si Satalas un kabusuɏyu, un isun chi lakupeɏn layun un mansingisingit si kalola. 9Ked pakoscheɏonyu pammatiyu ta tubngaɏonyu siya. Ti ammuyu cha susuludyuʼn mamati un inggew si intilun chi lubung, man-iisun malligligatcha un isun bod chi ligligatyu. 10Ngim lu lagamput chi sin-akitan un malligatanyu, si Apudyus un meɏpuwan cha losan un kachegu, siya langayeg kan chikayu un mipati si mallalayun un machayawala gapu si litimpuyugenyu kan Kristu. Pakoscheɏonyu pammatiyu, pabiɏuwonyu somsomokyu ya pumingot kayu. 11Siya mallakabyelin un manturay si ing-inggala. Amen!

12Insuɏatku alla gapu si tuɏung Silvanus un imbilangkuʼn mantegochen un sulud. Laluɏatak kan chikayu ta segagok chikayu ya paloklokak alla un tuttuwa kachegun Apudyus. Ked itakcheɏyu cha hachi.

13Pakumustaon chikayu kan cha mamati ud Babylon, un chilutukan Apudyus un isuyu. Pakumustaon chikayu bo kan Mark un ibilangkuʼn alakku. 14Man-asikumusta kayu un mangipaila un man-asiay-ayat kayuʼn mansusulud. Mallin-awa otyan chi somsomokyu losan un mamati kan Kristu.