nɑ ń ŋmɛsəɣɩ nyɑ́ təɣɩ lɑŋwɑkəllɛ kʋyɛɛŋ?

2Ɩsɑɣɑʋ muɣuliɣi kʋnyɔntʋ kɛ́ nɑ kɑlɑmpɑɑnɩ.

Yele nɑ pɑ mɑɣɑmɑɣɑ pɑ kɑtɔsɩ kpɑ-wɛ.

3Ɩsɑɣɑʋ hɔŋ ɩ tɩ nɑ ɩ kʋnyɩɩlʋɣʋ hʋwɛɛ kɛ́.

Nɑ ɩ́ tɔkɩ kɑsəyɑɣɑ ɑsilimɑ nyəŋkɑ.

Nɑ ɩ́ woŋiɣi Tɑcɑɑ nɑ ɩ́ tʋʋkɩ-ɩ.

4Ɩsɑɣɑʋ ləmɑɣɑsɛɛ ntɛ́ kɑlɑmpɑɑnɩ.

Ɩ yɔɣɔtəɣɩ sɩ: Ɩsɔ ɩɩ hɔŋ yʋlʋ ŋkpɑŋʋɣʋ,

pəyele Ɩsɔ tɩɩ fɛɩ.

5Ɩ kʋlɑpəm lɑkɩ teu kɛ pɑɑ wɑɑtʋ wei kɛ́.

Ɩsɔ nyɑ́ hʋʋlɛ kəlɑ-ɩ pooluŋ ɩ tɑ cɛkənɑ.

Nɔɣɔ tɑɑ heelim kɛ n hosiɣi

nyɑ́ kolontunɑɑ tənɑ sɩ ń kpiisi-wɛ.

6Ɩsɑɣɑʋ mɑkɩ ɩ lɑŋlɛ tɑɑ sɩ: Pʋlʋpʋ kɑɑ ciɣiti-m.

Wɑhɑlɑ kɑɑ mɑɣɑnɑ-m pɑɑ pəlee.

7Mpusi təŋsʋɣʋ nɑ tɔm looluɣu nɑ tʋsʋɣʋ

nɑ ɑcilɑɣɑtʋ tɔm nɑ ɩsɑɣɑtʋ wɛnnɑ ɩ nɔɣɔ tɑɑ.

8Acɑlisi kiŋ kɛ ɩ ŋmɛləɣɩ

nɑ ɩ́ cɛŋəɣɩ wɑhɑlɑ nyə́mɑ nɑ ɩ́ kʋɣɩ mʋsʋŋ.

9Ɩ wɛ ɩ təŋmɛllɛ kɛ́ ɩsɩɩ tɔɣɔlɑɣɑ kɛ kɑ lonte tɑɑ.

Nɑ ɩ́ cɛŋəɣɩ sɩ ɩ́ kpɑ kʋnyɔntʋ nɑ ɩ́ tʋ-ɩ ɩ puluɣu tɑɑ.

10Ɩ pɑpəɣɩ kɛ́ nɑ ɩ́ teŋ wɑhɑlɑ nyə́mɑ kɛ ɩ səkpɑŋ tɑɑ.

11Ɩ tɑɑ kɛlɛ sɩ Ɩsɔ sɔɔkɩ

nɑ ɩ́ kɛɛsəɣɩ ɩ ɩsɛ ɩɩ nyənəɣɩ pɑɑ pə́cɔ.

12Hɑɩ, Tɑcɑɑ Ɩsɔ kʋlɩ nɑ ń wɑɑsɩ

tɑɑ sɔɔ wɑhɑlɑ nyə́mɑ tɔɔ.

13Pepe tɔɔ kɛ́ ɩsɑɣɑʋ woŋiɣi-ŋ nɑ ɩ́ tɔŋ sɩ:

Ɩsɔ kɑɑ hɔ mɑ ŋkpɑŋʋɣʋ se.

14N nyənəɣɩ nɑ ń nɑɑkɩ kʋnyɔntʋ wɑhɑlɑ,

nɑ ɩ nəɣəsɛɛ sɩ n pɑɑsəɣənɑ-ɩ.

Nyɑɣɑ ɩ pɛtəɣɩ ɩ tɩ,

pə́cɔ nyɑ́ wɑɑsəɣənɑ sulɑʋ.

15Pɛlɩ ɩsɑɣɑʋ niŋ nɑ ń pɔɔsɩ-ɩ ɩ kɑwɑlɑɣɑ tɔɔ

nɔɣɔlʋ ɩ́ tɑɑ tɔɔsɩ ɩ tɔm.

16Tɑcɑɑ nyɑɣɑlɛ wulɑʋ kɛ tɑm tɔɔ.

N kɑ́ kpiisi piitimnɑɑ kpɑɩ nyəm tənɑɣɑ tɛtʋ tɑɑ kɛ́.

17N nɩɩkɩ kʋnyɔntʋnɑɑ sələmʋɣʋ kɛ́,

nɑ ń keŋ ŋkpɑŋŋ nɑ pɑ tɔɔ nɑ ń hɑɑkɩ-wɛɣɛ ɑpɑlʋtʋ.

18N hɑ suluwɑɑ nɑ mpɑ pɑ muɣulɑɑ tɔɣɔ tɑmpɑnɑ.

Ɩlɛnɑ ń pɛ yəlɑɑ mpɑ pɑ ŋmɑnɑ tɛtʋ tɔɣɔ mpɑɑʋ

sɩ pɑ ŋmɑkəlɩ lɛlɑɑ.