Pɛtǝlɛhɛm ɩcɑtɛ nyɑɣɑ Ɩfǝlɑtɑ tɑɑ,

n kɛ́ Yutɑ ɑcɑlɛɛ tɑɑ sǝkpete kɛ́.

Amɑ nyɑ́ tɑɑ kɛ́ mɑɑ lǝsɩ wei ɩ kɑ́

tiiki Ɩsɛɣɛlɩ nyǝ́mɑ nɑ mɑ hǝtɛ tɔ.

Pʋntʋ ɩnɩ ɩ lʋlʋɣʋ hoolɑɣɑ lɩɩ sɔsɑɑ tɑɑ kɛ́.

2Tɑcɑɑ kɑ́ lɔ ɩ yǝlɑɑ,

hɑlǝnɑ pǝ́ tɑlɑ wɑɑtʋ wei

ɑlʋ nɔɣɔlʋ ɩ kɑ́ lʋlɩ pǝyɑɣɑ tɔ.

Mpɑ pɩɩ sɔɔ mpɑ pɑ kuuwɑ tɔ pɑ tɑɑ tɔ,

pɛlɛ pɑɑ kɔɔ nɑ pɑ́ sɔɔsɩ Ɩsɛɣɛlɩ nyǝ́mɑ lɛlɑɑ tɔɔ.

3Pǝyɑɣɑ ŋkɛ, kɑ Ɩsɔ Tɑcɑɑ toŋ kɛ kɑɑ

tiikinɑ Ɩsɛɣɛlɩ nyǝ́mɑ nɑ pɑ́ cɑɣɑnɑ pɑ tɩ.

Mpi tɔ, ɑntulinyɑ yǝlɑɑ tǝnɑ kɑ́

yɔɣɔtǝɣɩ kɑ pǝsʋɣʋ tɔm kɛ́.

4Nkɛ kɑɑ yelinɑ nɑ tǝ́ hɛɛsɩ.

Pɑɑ Asilii nyǝ́mɑ kɔmɑ nɑ pɑ́ wɑtɩ tɑ́ tɛtʋ

nɑ pɑ́ sʋʋ tɑ́ tɛɛsɩ tɑɑ.

Tɩɩ kʋsɩ tɑ́ nyʋɣʋ nyǝ́mɑ tuutuumɑ,

nɑ pɑ́ polo pɑ tɔɔ.

5Pɑɑ lɛɛkɩ Nimloti Asilii nyǝ́mɑ nɑ toŋ.

Pɑɑ wɑɑsɩ-tʋɣʋ pɑ niŋ tɑɑ kɛ́ wɑɑtʋ wei pɛlɛ

pɑɑ tɛsɩ tɑ́ kɑŋmɑɑɣɑ nɑ pɑ́ wɑtɩ-tʋ tɔ.

6Ɩsɛɣɛlɩ nyǝ́mɑ kɑkɑɑsɑɣɑ kɑ wɛɛ

piitimnɑɑ lɛlɑɑ tɑɑ ɩsɩɩ cɔlɔʋ.

Yɑɑ tɛʋ ŋku Tɑcɑɑ yeki nɑ kʋ nɩɩkɩ

nɑ pǝ́ tɑ́ lɩɩnɑ yʋlʋ toŋ tɑɑ tɔ.

7Pɑɑ wɛɛ toŋ kɛ́,

ɩsɩɩ tɔɣɔlɑɣɑ kɛ tɑɑlɛ wontu hɛkʋ,

yɑɑ heeŋ kɑlǝkʋ tɑɑ.

Pɑɑ timpiɣi pɑ tɔŋ pɑ kpiki pɑ tɔɣɔnɑɣɑ kɛ́,

nɑ pɑ́ cǝlɩ, nɔɣɔlʋ ɩɩ lɛɛkǝɣɩ-wɛ.

8Ɩsɛɣɛlɩ kpɑ nyɑ́ kolontunɑɑ

tǝnɑ nɑ n cǝlɩ-wɛ.

9Ḿpʋ́ɣʋ́ Tɑcɑɑ yɔɣɔtɑɑ sɩ:

Kʋyɑkʋ nɑkʋlɩ kɩɩ kɔɔ,

ŋku kʋ tɑɑ mɑɑ kʋ mǝ kpɑɣɑnǝŋ

nɑ mɑ́ wɑkǝlɩ mǝ yoou kɛɛkɛnɑɑ tɔ.

10Mɑɑ yɔkɩ mǝ ɑcɑlɛɛ

nɑ mǝ koloosi nyǝnɑ.

11Mɑɑ wɑkǝlɩ nyɑ́ topotopo tǝmɑ,

hɑlɩ pɑ kɑɑ nɑ nyɑ́ tɛɣɛ tʋ́ʋ́.

12Mɑɑ yɔkɩ mǝ tɩɩŋ nɑ pɛɛ kʋlɑlɑɑnɑ.

Ɩ́ kɑɑ tɑsɑ luŋuɣu kɛ wontunɑɑ

mpɑ ɩ́ lupɑ mǝ mɑɣɑmɑɣɑ tɔ.

13Mɑɑ kpɛsɩ mǝ tʋɣʋ ɑlʋnyǝŋkʋ

Asǝtɑtɩ tesikɑ kʋlɑlɑɑɣɑ,

nɑ mɑ́ yɔkɩ mǝ ɑcɑlɛɛ.

14Mɑɑ mʋ pɑ́ɑ́nɑ́ sɔsɔɔnɑ,

nɑ mɑ́ lɛɛtɩ piitimnɑɑ mpɑ pɑɑ tʋɣʋnɑ-m tɔ.