1-2N nyǝmɑ́ tɑɑlɛ pǝ́ŋ nɑ nɑmǝŋ

husi ɩsɔtʋnɑɑ nɑ?

Nyɑ́ feŋiɣinɑ ɩ tɔɔ

kɛ́ sɑɑ wei lʋlʋɣʋ wʋsɑsɩ tɑpɑ-ɩ tɔ?

Yɑɑ n tɩɩ nyǝmɑ́ ɩ lʋlʋɣʋ wɑɑtʋ?

3Ɩ sopiɣi kɛ́ nɑ ɩ́ lʋlǝɣɩ ɩ piyɑ.

Ɩlɛnɑ ɩ́ hɛɛsǝɣɩ wʋsɑsɩ.

4Nɑ ɩ piyɑ wɛnɑ ɑlɑɑfǝyɑ nɑ sɩ́ pɩɩkɩ nyɩɩtʋ tɑɑ.

Kʋyɑkʋ nɑkʋlɩ, ɩlɛnɑ sɩ́ tɛɛ.

Sɩɩ tɑsǝɣɩ mǝlʋɣʋ.

5Awe hɛtǝnɑ tɑɑlɛ kpɑŋɑɣɑ

nɑ ɩ́ yele-kɛ́ sɩ kɑ́ tɛɛ?

6Mɑ́ lɑpǝnɑ kɑ tǝcɑɣɑlɛ kɛ wʋlɑɣɑ tɛtʋ

nti tǝ wɛ tǝnyɑŋŋ tɔ tǝ tɔɔ.

7Sɩ woŋiɣi ɩcɑtɛ tɑɑ kɔkɔtɛ kɛ́.

Pǝyele sɩɩ nɩɩkɩ cɛcɛ holɑ.

8Pulɑɣɑ tɔɔ kɛ́ sɩ cɑɑkɩ sɩ sɩ́ hiki sɩ tɔɣɔnɑɣɑ,

nɑ sɩ́ pɛɛkǝɣɩ nyɩɩtʋ kʋlɛkǝlɛkǝtʋ.

9Tɑɑlɛ nɑʋ kɑ́ kɔɔ sɩ ń lɑnɑ-ɩ tǝmlɛ

yɑɑ ɩ́ hǝntɩ nyɑ́ tɔlɑ tǝtɔɣɔlɛ kiŋ kɛ ɑhoo nɑ?

10N kɑ́ tʋ ɩ luɣu tɛɛ kɛ́ ŋmǝnɑɣɑ,

yɑɑ ɩ́ hɔ ɑkuɣu nɑ wɑɑlɩ tɔɔ, nɑ ɩ́ hɛɛ kpɛɛsɩ nɑ?

11N kɑ́ lɑpɩ-ɩ nɑɑni kɛ́ ɩ tomiŋ sɔsɔɔŋ tɔɔ,

nɑ ń yelinɑ-ɩ nyɑ́ tǝmɑ sɩ ɩ́ pɑɑsǝnɑ?

12Yɑɑ nyɑ́ kʋmtʋ kɛ ń kɑ́ yelinɑ-ɩ sɩ ɩ́ kpeenɑ tǝyɑɣɑ,

yɑɑ ɩ kuu pee kɛ kɑtɑɣɑ tɑɑ?

13Tɑɑtɑɑnɑɑ hɛtǝɣǝnɑ pɑ keŋ nɑ lɑŋhʋlʋmlɛ kɛ́,

nɑ ɩ́ nǝɣǝsǝnɑ ɩsɩɩ kʋlɑɑlʋɣʋ nyǝŋ.

14Wɑɑtʋ wei tɑɑtɑɑ tʋɣɩ ɩ yɑlɑ nɑ ɩ́ tɑkɩ-yɛɣɛ

ilim kɔkɔ kɑnyǝŋɑ sɩ ɑ́ tiisi tɔ,

15ɩ sɔɔkɩ kɛ́ sɩ tɑɑlɛ wontuɣu nɑkʋlɩ

kɩɩ fɛlɩ-yɛɣɛ nɔɔhǝlɛ nɑ ɑ́ yɔkɩ.

16Ɩ tɔkǝɣɩ ɩ piiŋ kɛ́ nɑ toŋ, ɩsɩɩ pǝ tɑɣɑ ɩnɩ ɩ tǝnnɑ.

Ɩ fɛɩ sɔɣɔntʋ sɩ ɩ wɑhɑlɑ kɑ́ lɑ yem.

17Mpi tɔ, mɑ tɑ tʋ-ɩ lǝmɑɣɑsɛɛ

yɑɑ lɑɣɑtʋ kɛ sɑɑ wei mɑ ŋmɑ-ɩ tɔ.

18Amɑ wɑɑtʋ wei ɩ kʋlǝɣɩ sewɑ tɔ,

ɩ pɑɑ fɛɩnɑ kpɑɣɑnʋ nɑ ɩ cɑɣɑlʋ.

19Nyɑ́ tʋnɑ kpɑɣɑnʋ kɛ tomiŋ nɑ?

Yɑɑ nyɑ́ tʋnɑ ɩ luɣu tɛɛ kpɛɛm?

20Nyɑ́ yekinɑ nɑ ɩ́ ŋmɑɑkɩ ɩsɩɩ lɑkǝlɛ

nɑ ɩ́ wiikinɑ ɑpɑlʋtʋ nɑ sɔɣɔntʋ kpɑɑkɩ kolontu nɑ?

21Ɩ hɑlǝɣɩ ɑcʋwɑ kɛ tɛtɛkǝlɛ tɑɑ,

nɑ ɩ lɑŋlɛ hɛɛnɑ ɩ toŋ.

Ɩlɛnɑ ɩ́ ŋmɑɑ kolontu nɔɣɔ tɔɔ kɛ́ yoou tɑɑ.

22Ɩ fɛɩ sɔɣɔntʋ,

pǝ́cɔ́ ɩɩ nyɑŋnɑ pʋlʋ,

ɩɩ tuliɣi tɑpǝŋ kɛ kolontu lɑɣɑtɛ kiŋ.

23Ɩ tɔɔ cɑɣɑlʋ ŋmɑntɑɑɣɑ, nɑ ɩ lɑɣɑtɛ pǝ mʋɣɩ kɔkɔ,

nɑ ɩ kɔɔkɑ nɑ́ɑ́ cɛɣɛtǝɣɩ ɩ tɔɔ.

24Tutuɣu wiiki nɑ pǝ́ nyɑɣɑlɩ-ɩ teu

nɑ ɩ́ kpisi ɩ tǝɣɩ kpɑʋ, ɩlɛnɑ ɩ́ tʋ cɑsǝlɛ.

25Tutuɣu wiiki, ɩlɛnɑ ɩ́ yɑɣɑ ɑpɑlʋkɑkiisɑɣɑ tǝwɑpɑpɑ.

Too pooluŋ tɑɑ kɛ́ ɩ nɩɩkɩ yoou tɑŋ

nɑ yoolɑɑ sɔsɑɑ holɑ nɑ pɑ kɑkiisɑsɩ.

26Nyɑ́ lɑɣɑtʋ kɛ ŋmɑkǝlɛ kʋlǝɣǝnɑ

nɑ tǝ́ hɛtǝɣɩ tǝ keŋ nɑ ilim mpǝtǝŋ tɔɔ?

27Nyɑ́ hɑɑnɑ cɔlɔʋ sɔsɔ kɛ nɔɣɔ sɩ

ɩ́ kʋlǝɣɩ, yɑɑ ɩ́ tʋɣɩ ɩ tɑntɛ kɛ pulɑɣɑ tɑɑ?

28Kʋkpɑmǝŋ tɑɑ kɛ́ ɩ cɑkɩ nɑ ɩ́ sʋʋkɩ

kʋkpɑmʋɣʋ kʋkʋlʋɣʋ nyʋɣʋ tɑɑ,

timpi nɔɣɔlʋ ɩɩ tɑkɩ tɔ.

29Hɑtoo nyʋɣʋ tɑɑ tǝnɑɣɑ ɩ wɛɛkɩ,

nɑ ɩ́ loosiɣi ɩ tɔɣɔnɑɣɑ nɑ ɩ́ cɛŋǝɣɩ-kɛ.

30Ɩ piiŋ nyɔɔkɩ cɑlǝm kɛ́

nɑ timpi wontu kʋsǝpʋtʋ wɛɛ tɔɣɔ ɩ cɑkɩ.