Hodáay dátagén sóbay shogriá
Pa sázger o washáwázáni sálárá. Dáuday Zabur.
1Oo Hodáwand! Bádsháh cha tai zórá shádmánia kant o
cha tai rakkénagá ent ke inchok gal o bál ent.
2Taw áiay delay morád bakshátagant o
áiay lontháni wáhaget cha áiá dur nadáshtagant. Ósht...
3Chiá ke gón bázén barkatáni dayagá pa áiay wasshátká dar átkagay o
tájé cha asilén teláhá sará dátet.
4Áiá cha taw zend lóthet o taw bakshát,
rócháni dráji, abad tán abad.
5Cha tai bakshátagén kámránián, áiay shán o marháh mazan ent,
áiárá shawkat o mazani dátag.
6Pa rásti abadmánén barkat bakshátag o
wati bagalá gal o shadánet kortag.
7Chiá ke bádsháh Hodáwanday sará tawkala kant o
borzén arshay Hodáwanday mehrá nalarzit.
8Tai dast, sajjahén dozhmenán dara géjit,
tai rástén dast pa áyán ke cha taw naprata kanant rasit.
9Á wahdi ke záhera bay
áyán porácheshén tarunéay paymá kanay.
Hodáwand wati hezhmay tahá áyán éra bárt o
áiay áchesh áyána wárt.
10Áyáni padréchá cha zeminá gár o bégwáha kanay,
chokk o nabiragánesh cha mardománi nyámá.
11Harchont ke tai helápá palitén shawrbandi bekanant o
badén repk o pandal besázant bale sóbéna nabant,
12chiá ke taw áyána táchénay,
wahdé ke wati kamáná dém pa áyána tarrénay.
13Oo Hodáwand! Gón wati zór o twáná anchosh mazanshán bátay.
Tai wák o kodratá satá kanén o názénén.