Isakaisi Yesu baisa Pailato
(Md 27.1-2,11-14; Lk 23.1-5; Yn 18.28-38)
1Obulubuvisiga tolula kasi tokugwa deli kaidadala valu deli toninitalapula paila Karaiwaga, e deli togugula komwaidosi isigugulasi ikikeiwalasi; iyuwolaisi Yesu ivakoulisi matauna iuyokaisi Pailato. 2Pailato ikatupoi matauna, kawala, “Ki yoku si giyouveka mina Yudia?”
Yesu ivitakauloki matauna, kawala, “Yokula lokukwaibiga.”
3E tolula kasi tokugwa itabinakaisi matauna bidubadu vavagi. 4Pailato ikatupoi matauna tuvaila, kawala, “Ki, gala sitana kuvivitakaula? Kugisi kwaivila vavagi ikamitulaimsi.”
5Mitaga Yesu gala sitana tuvaila ivitakauloki, mapaila Pailato itutu wowola.
Ikaraiwagasi kidamwa Yesu bikaliga
(Md 27.15-26; Lk 23.13-25; Yn 18.39—19.16)
6E Pailato la bubunela otutala Luvapela pakala bitaneku baisa matausina avai tomipuki inigadaisi baisa matauna. 7Tutala mimilisi tokowolova itokaiasi ipakaisi valu kala karaiwaga, tokwabilia eiyosisi tokwatumata eisailisi wa bwala katupipi. E taitala matausina yagala Baraba. 8E tobobawa imaisi ivitouulasi inigadasi baisa Pailato kidamwa bivagi paila matausina makawala la bubunela ivigibogwi. 9Pailato ivitakauloki matausina, kawala, “Ki, bataneku si giyouveka mina Yudia baisa yokomi?” 10Paila bogwa igisi tolula kasi tokugwa ikasalaisi matauna uula si pogi.
11Mitaga tolula kasi tokugwa itainonaisi tobobawa kidamwa binigadasi bitaneku Baraba kaimapula Yesu baisa matausina. 12Pailato tuvaila iluki matausina, kawala, “Avaka bavigaki matauna kudokaisi si giyouveka mina Yudia?”
13Idouvausi, kawasi, “Kukwatukorosi matauna.”
14E Pailato iluki matausina, kawala, “Avaka dimlela? Avai mitugaga leivagi?”
Mitaga saina minimani idoudousi, kawasi, “Kukwatukorosi matauna.”
15Pailato magila biyomwasali ninasi tobobawa, e itaneku Baraba baisa matausina; ikaraiwaga iwawaiyasi Yesu, oluvi ikasali kidamwa bikatukorosaisi matauna.
Tokwabilia ikatudeuwaisi Yesu
(Md 27.27-31; Yn 19.2-3)
16Tokwabilia ivakoulisi Yesu olumoulela bwala kwaiveka, makwaina la bwala tokwaraiwaga, idouwaisi tokwabilia kasi boda yuwomwaidona bisigugulasi. 17Ivisikomaisi matauna deli kakapula yabweyani, ivilaisi doula kala butia isailisi okulula. 18Ivitouulasi ikavaginasi omatala, ikaibigasi, kawasi, “Wo! si giyouveka mina Yudia.” 19Ilopetaisi pwanetala deli pitapatila, igiusailisi matauna, itapopula kwetutusi ikavaginasi omatala. 20E bogwa ikatudeuwaisi matauna, ivililaisi miyana kakapula yabweyani e ivisikomaisi kala kwama titoulela. E ivakoulisi ivisunupuloiyaisi kidamwa bikatukorosaisi matauna.
Ikatukorosaisi matauna
(Md 27.32-44; Lk 23.26-43; Yn 19.17-27)
21Taitala tau yagala Saimoni guma Sairini imaima metoya wa bagula, e litula Alekisana sola Rupusa; e tokwabilia iyosisi ikaraiwagasi bikeula Yesu la korosi. 22Imaiyaisi Yesu mapilana baleku idokaisi Goligota (e kidamwa takatumikaisi baisa “Viluwela Pwaneta”). 23Itagulikaisi waini deli mro mwada bivimomwaisi matauna, mitaga ipaiki. 24Ikatukorosaisi matauna; ivilaisi kala kwama ikowobobutasi availa bikau avaka. 25Yam kala kalu osi keda valulu eikatukorosaisi matauna. 26Kala kamatula iginisi, “Si Giyouveka mina Yudia.” 27Deli matauna ikatukorosaisi taiyu tolibulebu, taitala ola kakata, taitala ola kikiwama.
29Matausina ililoulasi ititageunasi, ibigigagaisi matauna, kawasi, “Aa yokula! Ki bukukodidaimi Bwala Kwebumaboma e yam kwaitolu bukukwaliivau? 30Kukwatumovaim titoulem, kubusi metoya wa korosi.”
31Makawala tolula kasi tokugwa deli toninitalapula paila Karaiwaga ikatudeuwaisi matauna taitala baisa taitala. Ikaibigasi, kawasi, “Eikatumovi tomota ituwoli, mitaga gala gagabila bikatumovi titoulela. 32Kidamwa matauna Mesaia deli ma giyouvekasi yakamaisi mina Isireli bibusi titoulela metoya wa korosi wa tuta matutona, e bitagisaisi bitadubumaisi.”
Tuvaila matausina ikatukorosaisi deli matauna ilulukwaisi matauna makawala.
Yesu ikaliga
(Md 27.45-56; Lk 23.44-49; Yn 19.28-30)
33Bogwa itowota kalasia, e valu komwaidona idudubila, igau ila itobala kalasia. 34E bogwa itobala kalasia, Yesu kaigala kaigaveka idou obonasi mina Iberu, kawala, “Eloi, Eloi, lema sabakitani?” E kidamwa takatumikaisi, “Ulo Yaubada, ulo Yaubada, avaka dimlela lokusilavaigu?”
35Mimilisi matausina itotusi baisa ilagaisi e ikaibigasi, kawasi, “Ka, idoudou baisa Ilaitia.” 36E taitala isakaula ividagu toutou wa waini pwayuyu, e ibabi wa kai mwada bivimom, ikaibiga, kawala, “Desi iga bitagisaisi kaina Ilaitia bima bivabu.”
37E Yesu iwaiweya ikaliga.
38Bwala Kwebumaboma kala taboda karekwa itavisiki yayu metoya walakaiwa e watanawa. 39Tutala kumatoula matauna itotu omatala korosi igisi ammakawala Yesu eikaliga, ikaibiga, kawala, “Mokwitala matauna Yaubada Latula.”
40Tuvaila mimilisi vivila itotusi kaduwonaku igigisaisi; e minasina igasi Meri Magidalini sola Meri inasi Yemesa tokekita deli Yosesi, toyo Salomi. 41Paila tutala Yesu isisu Galili, minasina ibokulaisi iwotitalaisi matauna. E bidubadu vivila tuvaila itotusi baisa deli minasina, leimakaiasi Yerusalem deli Yesu.
Yosepa ibaku Yesu
(Md 27.57-61; Lk 23.50-56; Yn 19.38-42)
42Eikoyavi, e yam makwaina idokaisi Yamla Katubaiasa, paila yam sabate makateki bikaloubusi. 43Isisu taitala togugula, e tomota saina itemmalaisi matauna. Yagala Yosepa guma Alimatia, e matauna iuwayausa paila Yaubada la Karaiwaga. Matauwena ituvaluwa ilokaia Pailato, e inigadi wowola Yesu. 44Pailato itutu wowola paila ilagi Yesu bogwa leikaliga, e idou kumatoula ikatupoi, kawala, “Ki, bogwa ikaligimolila?” 45E tutala kumatoula iluki Pailato kidamwa leikaligimolila itugwali tomata baisa Yosepa. 46Matauna igimoli mwaikapula yapupwakau yaminabwaita, e ivabu minana tomata ikapoliki miyana. E ibaku wa laka makwaina leikeli metoya odakuna; e ilopipili kwaitala dakuna owodola laka. 47Meri Magidalini sola Meri Yosesi inala igisaisi ambaisa leibaku matauna Yesu.