Buki Pilabumaboma Kabutubogwa Deli Kabutuvau

Veivai mapilana Kena
1E igau bugitolu ivagaisi veivai pakala mapilana Kena olumoulela mapilana Galili; e Yesu inala tatoula isisu baisa. 2E leidouwaisi Yesu toyo la toligalega bilosi wa paka makwaina. 3E tutala waini iwokuva, Yesu inala iluki matauna, kawala, “Gala kasi waini.”
4E Yesu iluki minana, kawala, “Ve! Taga bukulukwaigu kudoki avaka ibodi bavagi. Ulo tuta igau wala bima.”
5Inala iluki towotetila, kawala, “Bukuvagaisi avaka bilukwaimi.”
6E isisuaisi baisa yalima yatala lukwava dakuna yavakaveka leisailisi, makawala mina Yudia kasi gulogula paila kikila; kidamwa bitavisaikolaisi, kaina biboda yalakatutala sopi kala mokaila yatala yatala. 7Yesu iluki matausina, kawala, “Kuvigogwaisi sopi olukwava.” E ivakasauwaisi miyasina. 8E iluki matausina, kawala, “E baisa tuta kutavilaisi, e kukwauwaisi baisa tolipaka.” E ikauwaisi. 9E tutala tolipaka imomkoli waini, gala inikoli ammetoya leimaiyaisi, mitaga towotetila matausina kala tovagogu sopi inikolaisi. E tolipaka idou matauna tovaivau, 10e iluki matauna, kawala, “Tomota taitala taitala isaibogwi waini bwaina; e igau tomota bogwa eimomsi kwaiveka, oluvi bisaili waini sitana bwaina. Yokula kuyusi waini bwaina igau tuta makwaina.”
11Baisa kabovitouula la kabutuvatusi Yesu ivagi mapilana Kena olumoulela mapilana Galili, e iyomitali kala yakaula; e la toligalega idubumaisi matauna.
12E oluvi Yesu ila Kapaneum, sola inala, toyo budala toyo la toligalega; e isisuaisi baisa kwaivila yam.
Yesu ikatumigileu Bwala Kwebumaboma
(Md 21.12-13; Mk 11.15-17; Lk 19.45-46)
13E mina Yudia kasi paka Luvapela bogwa ivakatitaikina, e Yesu ilaguva Yerusalem. 14E ibani matausina igigimwalasi bulumakau toyo sipi toyo bubuna wa Bwala Kwebumaboma; toyo matausina tokwatumapu mani eisisuaisi baisa. 15E deli yuwoyoula ivigaki lewa e iyobutubutu tomota komwaidosi toyo sipi deli bulumakau metoya wa Bwala Kwebumaboma; e ikatusou si mani tokwatumapu e si kabosakaila ikatukovi. 16E iluki matausina togimwala bubuna, kawala, “Kulauwaisi minasina; taga kuvigakaisi la bwala Tamagu kwaitala baku.” 17La toligalega iluluwaisi Buki Pilabumaboma kala ginigini isisu, “Bayomadi ulo peula paila m bwala kala pwaitukula.”
18Mapaila mina Yudia ilukwaisi matauna, kawasi, “Avai kabutuvatusi bukuvagi bivitulokaimasi m kwaraiwaga paila bukuvagi vavagi makwaina?”
19Yesu ivitakauloki matausina, kawala, “Kidamwa kukodidaimisi Bwala Kwebumaboma makwaina, yam kwaitolu bakaliivau makwaina.”
20Mapaila mina Yudia ikaibigasi, kawasi, “Kweluwovasi kwailima kwaitala taitu ikaliaiisi bwala makwaina; ki bukukwalatolu bukukwaliivau makwaina?”
21Mitaga Yesu ililivala paila wowola, makawala makwaina bwala kwebumaboma. 22Mapaila tutala itokaia imovavau, la toligalega iluluwaisi leilivala makawala; e idubumaisi Buki Pilabumaboma, toyo mabigana avaka Yesu leilivala.
Yesu inikoli tomota komwaidosi
23Tutala Yesu isisu Yerusalem paila Luvapela pakala, bidubadu idubumaisi matauna paila igisaisi la kabutuvatusi avaka leiuvagi. 24Mitaga Yesu gala itugulimakavi titoulela baisa matausina, paila goli inikoli tomota komwaidosi; 25e gala bibodi availa biluki Yesu paila tomota. Paila Yesu inikoli avaka isisu oninasi tomota.

u2:1 Mapilana valu katitaikina Nasaredi opiliyavata kala kaduwonaku Losuia bitala Yalaka (6 km).

v2:1 Mina Yudia si valu pilamwaidona eidokaisi katupotolu, e Galili katupotala wala, isisu opiliyavata valu.

w2:4 Biga makwaina ikibuboti tuta matutona uulela Yesu la vavagi baisa ovalu watanawa bikaloubusi, e tomota bivitusaisi matauna kidamwa Yaubada Latula. Kugisi Yn 12.23.

x2:11 Yoni ivigaki kaboyowalula bikibuboti Yesu kidamwa matauna Yaubada Latula. Kugisi tuvaila Yn 4.54.

y2:12 Mapilana valu isisu milaveta Galili olumata opilikwaibwagayouya.

2:12 2.12 Md 4.13

z2:13 Kugisi makasana Biga Kala Katumiki.

2:13 2.13 Sun 12.1-27

a2:14 Togimwala mwada bipilasaisi totapwaroru, paila uula bidubadu leimaisi metoya saina kaduwonaku, e binainevisi igimolaisi avai mauna bibudoki bilulasi wa Bwala Kwebumaboma.

b2:14 Bidubadu totapwaroru metoya wa boda ituwoli ituwoli e si mani migila kala gigisa ituwoli ituwoli. E kidamwa magisi bisemakavisi kaina bigimolaisi mauna paila lula, ibodi biyosisi oyumasi manila Bwala Kwebumaboma. E baisa uula mabudona tokwatumapu mani isisuaisi baisa.

2:17 2.17 Sam 69.9

2:19 2.19 Md 26.61; 27.40; Mk 14.58; 15.29

c2:20 Makwaina Bwala Kwebumaboma Erodi Toveka eivitouula kaliai wa taitu 19 kaina 20 BC, e taitu makwaiwena ikikaliaiisi wala. E baisa uula tanikoli taitu makwaina Yesu ililivala 28 AD.

d2:23 Kugisi mailela 11 kala katumiki.