Nan Huwhai Ja Nan Dragon
1Sachi kun iningkaw nan amochay mangimatunanay mataakan gway naila ad langit. Iningkaw nan huwhaiyay nansisillup san init ja sa'ad nan huyan kukuschanana kun nangwhawhallangat san nasagwayan as chugwaay whituwon. 2Takinana'on as sija kun naniwhil san amochay sikab nan mangkumutana.
3Kun iningkaw nan nampailaay sawhali mangimatunanay mataakan ad langit: osa agagya'janay chayag gway Dragon gway pitu nan wha''agna ja simpuyu nan sakkudna, ad na gwaschi wha''agna nernob as pitu whana'iyutay whayangat. 4Ad sa'ad nan ipusna iyapyasna ingkud nan mi'atluway koggwan nan whituwon ad langit kun intoperna san luta. Ad sa'ad nan dragon summi'ad san sangun nan takinana'onay huwhai tot sa'ad nu ijana'na nan ana' anona.
5Kun iyana'na nan laya'i gway sija nan mangituyay san losanay taku san ailiili gway ituyajana chicha gway maid kun achakuna. Gwon napyos chay ana'na kun niijoy ad langit an Apudyus ja san tukawna gway mangituyay. 6Kun ummagwid chay huwhai san luta gway maid kun ingkaw as taku gway agwad nan ikawna gway insakanan Apudyus an sija gway aschi nan mangaaygwanancha an sija san 1,260 gway erkaw.
7Sachi kun whinumta' nan kuwhat ad langit. Ad sa'ad as Miguel gway osa pangat chanan a'anghel ja chanan huhuyunna a'anghel, ummoycha kinuwhat nan dragon. Kun na'akuwhat chay dragon gway huyunna chanan pasuyutna, 8gwon naawha' chay dragon ja chanan pasuyutna ad achicha kun mijujaay ingkaw ad langit. 9Kun nitoper chay agagya'janay dragon gway chay uyog gway nampaila san agwaagwi gway ma'gwaniyon Chijabyu ja Satanas gway nangallilaw san losanay taku san luta. Ad sa'ad chanan pasuyutna nitopercha gway nitapicha an sija.
10Sachi kun chingngor' nan towhag gway kinga nerpud langit gway manggwana,
“Anna tuwa natungper
nan manakuwan Apudyus san atakutaku.
Impailana nan ayobhongana gway mantuyay
ja impailan ahos nan Kristu gway chinutu'ana nan ayobhongana
kapu tan nitoper chay mampabpawhersu sasan susunud ta'u
san inerkaw ja nilawhi san sangun Apudyus ta'u.
11Inawha' ahos chachay susunud ta'u san pammati as sija kapu san chayan nan Uyhunay Kernero gway ummigwangan natojana
ja kapu san ukud Apudyus gway impaakammucha.
Wha'on kus sija pinatkancha nan whijagcha,
nan inatuttugwaana na'asakanachaay matoy kapu san pammaticha.
12Sija nan mallagsa' ajuway ingkaw ad langit!
Gwon a'oogjat nan ma'gwa an cha'ajuway ingkaw san luta ja ingkaw san whaywhay.
Nanosog nan Chijabyu an cha'aju gway amod nan linguna
tan akammunaay a''itan nan natchajay chimpuna gway manggwa san whayugwona oon.”
13Nawhigwhig kun chay dragon gway nitoper as sija san luta, chinogchogna chay huwhai gway nangijana' san ana'ay laya'i. 14Gwon naatchan chay huwhai as chugwa paja' nan cha'or tuyajan tot tumajap as sija umoy san ikawna san luta gway maid kun ingkaw as taku gway ad aschi nan maaygwanana as tuyu ja koggwa tagwon ta mijachaju san uyog gway chay dragon. 15Kun inghugwis chay uyog nan chanumay isun nan acha'orn nan gwanggwang say huwhai ta machapyut as sija. 16Gwon nawhadngan chay huwhai kapu san nanta'angan chay luta gwot naisup chay gwanggwang gway inghugwis chay dragon. 17Kun nalingu chay dragon say huwhai kun aysan gway ummoyna kinuwhat chachay uchumay anana'na gway mamopotpot sasan whilin Apudyus ja chachay impaakammun Hesus an chicha.
18Kun summi'ad chay dragon san tayantag nan whaywhay.