Bayịburu Ikwo Nehemáya 9

Ndu Ízurẹlu ekfushi ẹjo iphe, ẹphe meshiru

1Ọnwa ono agbalẹphu ụkporo abalị l'abalị ẹno; ndu Ízurẹlu edzua; wata ọswi aswịswi. Ẹphe eyeshia uwe-aphụ; kpotsuaru ẹja kpua onwẹphe l'ishi. 2Ndu ọphu bụ ndu Ízurẹlu ekewafụ onwẹphe l'ẹke ndu mbyamụmbya nọ. Ẹphe evudo kfushikota ẹjo iphe, ẹphe meshiru; mẹ lẹ k'ẹjo ọkpoma, nna ẹphe. 3Ẹphe evudo l'ẹke ẹphe vudo; gebe nchị; a gụaru ẹphe iphe, e deru l'ẹkwo ekemu Ojejoje, bụ Nchileke ẹphe ono awa ẹto. Ẹphe egude awa ẹto ọdo kfushia ẹjo iphe, ẹphe meshiru; bya abaaru Ojejoje, bụ Nchileke ẹphe ẹja. 4Jeshuwa; Bani; Kadimẹlu; Shebaniya; Buni; Sherabiya; Bani; mẹ Kenanii ẹphebedua evudo l'ubube ụlo-eli, e metaru ndu Lívayi l'ara ẹkwa echiku Ojejoje, bụ Nchileke ẹphe.

5Ndu Lívayi ono, bụ iya bụ Jeshuwa; Kadimẹlu; Bani; Hashabuneya; Sherabiya; Hodiya; Shebaniya; mẹ Petahiya asụ ẹphe:

“Unu wụ-lihu; jaa Ojejoje,

bụ Nchileke unu ajaja;

mbụ Nchileke ono,

nọ shita l'ojejoje rua l'ojejoje ono.”

“T'a jakwaa Nchileke ono,

dụ biribiri ono ajaja;

mbụ Nchileke ono,

karia ajaja, aaja iya;

karia ekele, eekele iya ono.”

Ndu Ízurẹlu ekfushi ẹjo iphe, ẹphe meru

6Ezura abya ekfuru nụ Nchileke; sụ iya:

“Ọ bụ nggụbedua nkịnyi ngu bụ Ojejoje.

Ọ bụ nggu keru igwe;

kee igwe ọphu ka igwe l'eli;

mẹ iphe bụ iphe nọ iya nụ.

Ọ bụ nggu keru alị;

mẹ iphe bụ iphe, nọ iya nụ;

bụru nggu keru eze ẹnyimu;

mẹ iphe bụ iphe, nọ iya nụ.

Ọ bụ nggu meru iphemiphe ọbule;

yọ nọdu ndzụ.

Iphemiphe ọbule, nọ l'imigwe

abakọtaru ngu ẹja.

7“Ọ bụ nggụbe Ojejoje bụ

Nchileke ono, fọtaru

Ébiramu; dufuta iya lẹ

Úru l'alị Kalúdiya

bya agụ-kwazi iya ẹpha;

yọ ghọo Ébirihamu.

8Ị phụru l'ọ bụ onye e gude

ire iya ẹka l'ẹke ị nọ;

nggu l'iya eworu ndzụ gbaa.

Nggu ekwee ya ụkwa

l'ịi-nụkota yẹle awa iya

alị ndu Kénanu;

kẹ ndu Hetu;

kẹ ndu Amọru;

kẹ ndu Pẹ́rezu;

kẹ ndu Jebusu;

mẹ kẹ ndu Gigashi.

Ụkwa ono, i kweru ono;

b'i medzukotaru;

kẹ l'ị bụ onye

doberu ẹka ndoo.

9Ị phụru iphe-ẹhuka,

nna ayi phẹ jeru lẹ Íjiputu;

nụkwaaphu ẹkwa, ẹphe raru

l'iku Eze Ẹnyimu Uswe.

10I meshiru iphe-ọphulenya;

mẹ iphe-ọhubama,

dụgbaa biribiri

kpua Fero;

mẹ ndu ishi ọru iya;

mẹkpo ndu alị iya l'ẹphe ha;

kẹ l'ị maru ẹge ndu Íjiputu

gude kẹ ekuku,

ẹphe eku onwẹphe;

gwaa ndibe ngu maa.

I meru; a maru ẹpha ngu;

mbụ maru iya ẹge ono jeye ntanụ.

11I meru eze ẹnyimu;

yo kekahu ẹbo l'ifu ẹphe;

k'ọphu bụ l'ẹphe jeru ije

l'alị ọkponku swee

eze ẹnyimu ono.

Obenu lẹ ndu achị ẹphe ọso;

b'ị tụru mgbahẹka;

ẹphe abụru gvudugungu

l'ime mini ono

l'ọ bụ mkpuma, a wụshiru

l'ime eze mini, ha nshinu.

12O -be l'eswe;

nggu egude urukpu,

kpụru rogbodongu dua ẹphe.

Teke o -beru l'ẹnyashi;

nggu egude ọku,

kpụru rogbodongu l'edu ẹphe;

t'ọ bụru iphoro,

a-nọdu ekoshi ẹphe ụzo.

13I nyizitaru lẹ Ugvu Sáyịnayi;

nọdu l'imigwe kfuru nụ ẹphe.

Ị nụru ẹphe ome-l'alị,

kfụru nhamụnha;

mẹ ekemu, bụ ọkpobe iya;

mẹ iphe, ị tọru ọkpa iya,

bụ iphe, dụ mma.

14I meru; ẹphe amaru mbọku,

i doberu t'ọ bụru mbọku

ọtu-ume ngu, dụ nsọ.

I shi l'ẹka nwozi ngu,

bụ Mósisu kfuru ẹphe

ekemu, ẹphe a-nọdu etso.

15Teke ẹgu gụru ẹphe;

b'ị nụru ẹphe nri,

shi l'imigwe;

bya ekee ẹphe mini,

shi l'eze mkpuma t'ẹphe ngụa;

teke mini gụru ẹphe.

Ị sụru ẹphe t'ẹphe tụgbua

je anata alị ono,

i riburu nte l'ịi-nụ ẹphe ono.

16Ọbule nna ayi phẹ ono;

bẹ palilahaaru onwẹphe eli;

kwefu íkè; jịka ome iphe,

ị sụru t'e meje.

17Ẹphe jịkaru ome iphe,

ị sụru t'ẹphe mee;

zahashịkota iphe ono, dụ

biribiri, i meshiru ẹphe l'ifu ono.

Ẹphe ekwefuru ngu íkè;

ngee ngu ẹka l'ishi;

fọta onye ishi, e-duphu

ẹphe azụ lẹ Íjiputu,

bụ ẹke ono, ẹphe shi bụru ohu ono.

Obenu l'ị bụ Nchileke, agụje nvụ;

onye emeje eze-iphe-ọma;

onye obu-imiko;

onye ẹ ta bụdu onye obu-ọku;

onye n-yemobu iya nyịberu anyịbe,

bụ iya meru; tị ha ẹphe;

18mbụ je akpaa lẹ teke

ẹphe kpụru onwẹphe nweswi; sụ:

‘L'ọ ọwaa bụ Nchileke ẹphe,

bụ onye dufutaru ẹphe lẹ Íjiputu;’

mẹ teke ono,

ẹphe kfubyishiru ngu k'ẹjo iya ono.

19Obenu l'i gude k'eze

obu-imiko ngu ono;

tị ha ẹphe l'echi-ẹgu.

Urukpu ono, kpụru

rogbodongu ono ta ha ẹphe.

Ooduje ẹphe l'eswe.

Ọku ono, kpụru rogbodongu

ono ta nyịhubua anyịhu.

Ọobujeru ẹphe iphoro l'ẹnyashi.

20Ị nụru ẹphe Ume ọma ngu ono

t'ọ kpọ-zijeru ẹphe ụzo.

Ẹ tị jịkadu ẹphe ọnu Mana

ono, shi ngu l'ẹka ono.

Ị nụru ẹphe mini t'ẹphe ngụa

gude gboo ẹgu mini.

21Ụkporo afa ẹbo

b'i heru ẹphe l'echi-ẹgu;

to nwe iphe, ụko iya dụjeru ẹphe.

Uwe ẹphe ta akahụbua akahụ;

ọphu ọkpa te kobua ẹphe ekoko.

22I meru; ẹphe alụta alị-eze,

dụ ichi l'iche;

lụta mbakeshi, dụ iche iche;

bya eworu alị ndu ono

keshiaru ẹphe t'ọ bụru ókè-alị ẹphe.

Ẹphe nataru alị Hẹ́shibonu,

bụ alị-eze Sihọnu;

mẹ alị Báshanu,

bụ alị-eze Ọgu.

23I meru t'ụnwu ẹphe ha igwe

l'ọ bụ mkpọ-kpodo, nọ l'igwe.

Nggu edua ẹphe

dubata l'alị ono, ị sụru nna ẹphe

t'ẹphe bahụ je anata ono.

24Ọ bụ ụnwu ẹphe bahụru

je anata alị ono.

Ị lụ-gburu ẹphe ndu alị ono,

bụ iya bụ ndu Kénanu.

I meru tẹ ndu Kénanu;

ndu eze ẹphe;

mẹ ndu alị ono l'ẹphe ha

lakọta ẹphe l'ẹka;

k'ọphu ẹphe e-me ẹphe ẹge dụ ẹphe mma.

25Ẹphe lụtakotaru mkpụkpu,

e gudetsua ụpho-mkpuma,

shihugbaaru ike kpụ-phee

mgburumgburu;

mẹ alị-ọtsu;

natakọta ụlo ngwa,

dụgbaa iche iche;

dụkota mma; ji ejiji.

Ẹphe nakwarụphu wẹlu,

a tụwaru atụtu;

mẹ mgbo vayịnu;

mẹ kẹ olivu;

mẹ oshi-ọmi, dụ iche iche.

Ẹphe eria; rijishia ẹpho;

dashịa okporokpo.

Ẹgiri iphe ono,

ị nụkotaru ẹphe ono;

bẹ ẹphe riru;

yọ tsọo ẹphe ẹna.

26Obenu l'ẹphe

kwefuru ngu íkè;

nwufu ekemu ngu dobe l'agụga.

Ẹphe gbushiru ndu

nkfuchiru ngu,

bụ ndu lọru ẹphe

ẹka lẹ nchị ẹge ee-shi tẹ

ẹphe ghaa ifu l'ẹke ị nọ.

Ẹphe kfubyishiru ẹpha ngu ẹji ẹji.

27Ọ bụ iya meru; nggu eworu

ẹphe ye ndu ọhogu ẹphe l'ẹka,

bụ ndu kpọberu ẹphe ishi l'ọku.

Ọ bụ teke ono, ẹphe nọ

l'iphe-ẹhuka ono;

bẹ ẹphe rakuru ngu.

Nggu eshi l'imigwe

nụa ẹkwa ẹphe;

bya egude obu-imiko ngu

ono, ha nshinu ono;

nụ ẹphe ndu mgbafụta,

bụ ndu nafụtaru ẹphe l'ẹka

ndu ọhogu ẹphe ono.

28Nchị adụlephu ẹphe ndoo;

ẹphe awatakwa ome

ẹjo iphe l'ifu ngu ọdo.

Nggu ewokwaru ẹphe ye l'ẹka

ndu ọhogu ẹphe ọdo.

Ẹphe abyakwa bya araku ngu ọdo;

nggu eshi l'imigwe

nụa ẹkwa ẹphe.

Ugbo olemole b'i gudewa

obu-imiko ngu;

nafụta ẹphe.

29Ị lọru ẹphe ẹka lẹ nchị;

ẹge ee-shi t'ẹphe lata azụ; meje ekemu ngu.

Ọ bụ okfu l'ẹphe watalẹru-a

ọpa-li onwẹphe eli;

jịka ome iphe, i kfuru.

Ẹphe meru ẹjo iphe

gude mebyia ome-l'alị ngu;

mbụ ome-l'alị ngu ono, bụ:

madzụ -mee ya;

yọ nọdu ndzụ ono.

Ẹphe gude l'ẹphe bụ 'anụ-g'anụ;

gbakutaru ngu azụ;

kwefuru ngu íkè; jịka ngu

ọngaberu nchị.

30Ị taru ẹphe nshi afa olemole.

I gude Ume ngu

shi l'ọnu ndu nkfuchiru ngu

lọo ẹphe ẹka lẹ nchị.

Ọ bụ l'ẹphe te yeduru ngu ọnu.

Yọ bụru iya meru;

nggu eworu ẹphe ye

ndu alị ọdo,

ẹphe l'ẹphe bu obutobu l'ẹka.

31Obenu l'i gude

k'obu-imiko ngu ono,

paru apaa ono;

jịka t'ẹphe ba achịhu;

jịkakwaphu

l'ẹ tịi buhadu ẹphe ẹka;

kẹ l'ị bụ Nchileke,

emeje eze-iphe-ọma;

bụru onye aphụje imiko.

32Ọo ya bụ; nggụbe Nchileke ayi;

mbụ nggụbe Nchileke,

ha nshinu; bụru Ọkaribe;

bya abụru onye dụ egvu;

onye edobeje ndzụ, ọ gbaru;

ọphu n-yemobu iya

'agvụjedu agvụgvu.

Byiko tẹ iphe-ẹhuka-wa,

ayi eje-wa; ba dụkwa ngu

rụswa-rụswa l'ẹnya;

bụ iya bụ iphe-ẹhuka-wa,

dakfutaru ayi-a; dakfuta

ndu eze ayi;

ndu ishi ayi;

ndu achịjeru Nchileke ẹja;

mẹ ndu nkfuchiru Nchileke ayi;

mbụ iphe-ẹhuka ono,

dakfutaru nna ayi phẹ;

mẹ ndibe ngu l'ẹphe ha;

shita l'oge kẹ

ndu eze ndu Asiriya jeye ntanụ-a.

33Iphe ono, dakfutakotaru ayi

ono bẹ iswi dụkotakwa ngu mma.

I meru iphe, kfụru akfụru.

Obenu l'ayịbedua meru ẹji.

34Ndu eze ayi; ndu ishi ayi;

ndu achịjeru ayi Nchileke ẹja;

mẹ nna ayi phẹ te medu ekemu ngu.

Ọphu ẹphe 'angadu nchị l'iphe,

ị sụru t'e mee; mẹ l'ẹka,

ị lọru ẹphe lẹ nchị;

35je akpaa lẹ teke ẹphe nọ

l'alị-eze ẹphe l'eri ẹgiri iphe ono,

ị nụkotaru ẹphe l'eze alị ono;

mbụ alị-ọtsu ono, ị nụru ẹphe ono;

ẹphe ta abadụru ẹja;

ọphu ẹphe aghakọbedu;

haa ẹjo-ụzo, ẹphe etso.

36Lewaru ẹge ayi bụ ohu

ntanụ l'alị ono, ị nụru

nna ayi oche phẹ ono;

mbụ alị ono, ị nụru ẹphe

t'ẹphe ria iphe, shi iya nụ;

ria iphe-ọma ono,

nọ iya nụ ono.

Lewaru ẹge ayi bụ ohu ntanụ.

37Ọ kwa ndu eze ono,

i doberu t'ẹphe chịa ayi ono; bẹ iphe,

shi l'alị ono alakọtaru.

Ishi iya abụru ẹjo iphe,

ayi meshiru.

Ẹphe gude ayịbedua;

gude ẹku ayi

l'eme iphe, dụ ẹphe mma.

Ayi nọkwa l'oke iphe-ẹhuka!

Ndu byaru ẹka l'ẹkwo ọgba-ndzụ

38“Ọ kwa iphe ono meru iphe ayi abya ọgba ndzụ-a, ẹ-te etengadu etenga-wa. Ee-dekwa iya phụ edede l'ẹkwo tẹ ndu ishi ayi; ndu Lívayi; mẹ ndu agbajẹru ayi Nchileke ẹja; mee ya iphe-ọhubama.”