1Ẹpha ọma kakwa ọkpobe manụ-mbeleke; mbọku, madzụ nwụhuru aka mbọku, a mụru iya amụmu mma. 2Oje l'ụlo-ẹkwa kakwa mma mẹ l'oje l'ajị; kẹ l'anwụhu bụ iphe nọru madzụ kpaa gboo. Tẹ ndu ọphu nọ ndzụ nyatajẹkwa l'ọ bụ ẹge ono b'ọ dụ.

3Aphụ kakwa mma; karia ọchi ọchi; kẹ l'eeshije l'ọswinwu ifu; mee t'obu tụsahu madzụ atụsahu.

4Ẹke obu onye maru iphe anọje bụ l'ụlo-ẹkwa; obenu l'ẹke obu onye eswe anọje bụ l'ẹke eeri iphe.

5Ọngabe nchị lẹ mba, onye maru iphe aba kakwa mma; mẹ l'ọngabe nchị l'egvu, ndu eswe agụ.

6Ọ kwa ẹge nkụ-ogvu anọduje agba kpịngu kpịngu kpịngu l'ọku, eeshiberu ite bụ ẹge ọchi, onye eswe achị adụje. Ono bụkwaphu ori aphụ.

7Onye maru iphe l'eme madzụ mmegbu bụakwa onye eswe; yọ bụru ẹge ono; bẹ ẹka-azụ emebyije obu madzụ.

8Teke e megewaru iphe emege kakwa mma; mẹ lẹ teke aawata iya awata.

Ọta nshi aka mma; mẹ l'oku onwonye ekuku.

9Ba abụkwa onye obu-ọku; kẹ l'ọ kwa onye eswe edoje okfu l'ọkpoma.

10Ba asụkwa: “?Bụnua ngụnu meru iphe oge ndiche ka mma; karia nta-a?” Ishi iya abụru l'egbe ajị ono bụ ajị eswe.

11Ọ kwa ẹge ẹku, shi lẹ nna sweeru nwa dụ; bẹ mmamiphe dụkwaphu. Mmamiphe egbochitaje onye nweru iya nụ 12ẹge okpoga egbochitaje onye nweru iya nụ. Obekwanu l'ẹke mmamiphe gude ka bụ l'onye nweru iya nụ akajẹ nka.

13Lewaru ẹnya l'ọru Nchileke: ?Bụ onye a-dụ ike mee iphe Nchileke meru; yo gbee nggọ t'ọ bya evudo nhamụnha? 14Ụboku -dụru ngu lẹ mma; tejekwa ẹswa; ụboku -dụkwanuru ngu lẹ njọ; nyatakwa l'ọ bụ Nchileke, meru ụboku ọma; kwaphụ iya meru ẹjo ụboku. Ọo ya bụ l'ẹ to nwedu onye maru iphe a-mụru iya nụ l'ụzo ifu.

15Lẹ mkpọkoro ndzụ-wa, mu nọ-wa; bẹ mu tụkookwa iphe-a ẹphe ẹbo phụkota: Mu phụakwaru onye doberu ẹka ndoo; yọ laa l'odobe-ẹka-ndoo ya; bya aphụkwaaphu ẹjo madzụ; yọo ka nka; l'eme ẹjo iphe l'eje. 16Be edobenukakwa ẹka ndoo; ọphu ị manụkakwa iphe. Ono kwa oye onwongu ọru 17Ba abụnukakwa ẹjo madzụ; ọphu ị bụkwa onye eswe. ?Bụ ole bụ k'ogbu onwongu l'oge ngu ẹbe eru. 18Ọphu ka mma bụ t'i gudeshia ọphu iigude ike; ọphu ị hakwa ọphu; kẹ l'onye atsụ Nchileke egvu; bẹ iphe oome ekejekwaru iya.

19Mmamiphe emejekwa onye marụ iya nụ t'ọ ka ụmadzu iri, achị mkpụkpu ike.

20Ẹ tọ dụkwa madzụ nwigbaleke-ọma, nọ lẹ mgboko-a, a-sụ lẹ ya doberu ẹka ndoo; lẹ ya te mebua iphe dụ ẹji.

21Ba angabẹbejekwa nchị l'iphe bụ iphe ndiphe ekfu; ọdumeka; bẹ ii-mekochakwaa nụa l'ẹke nwozi ngu ekfuru ngu ẹjo okfu; 22kẹle nggụbedua l'onwongu makwaru-a l'i kfuwaru ndu ọdo ẹjo-okfu ugbo olemole.

23Iphemiphe ọbule-a; bẹ mu gudewa mmamiphe lelee; ribua lẹ mu a-maru iphe. Obenu lẹ mu jeru iya okobe ẹka; ike ta dụ mu. 24Mu amaru l'iphe ono, bụ mmamiphe ono nọru ote-ẹnya; bya adụ ogvu ogvu; k'ọphu bụ l'ẹ to nwedu onye adụ ike achọ-vu iya. 25Mu abya efuberu mmamiphe ifu; bya eyeru ẹhu l'ome tẹ mu maru: Mu a-chọ-vu mmamiphe; mẹ ẹge iphe shi eje lẹ mgboko-a; ọdo abụru tẹ mu maru ẹge ome akirishi; mẹ ome ririri; dụ-tabe eswe.

26Mu aphụa iphe ka anwụhu ọtso ile; mbụ nwanyi, obu iya bụ ọ́nyà; bụru ụgbu, eegude ahata ndiphe. Ẹka iya dụ l'ọbu mkpakọbe, oogudeje atụko onye, ọoburu yẹle iya. Ọ bụ onye eme iphe dụ Nchileke mma a-nahụ-ghe egbe nwanyi ono. Obenu l'onye iphe dụ ẹji; bẹ ọohataje l'ọnya iya. 27O-zi-iphe sụru: “Ngabeduduphu! Ọwaa bụ iphe mu phụwaru: Mu ewotaje iphe lanụ yekobe l'ọdo; chịko ẹphe tụgbabe; ẹge ee-me tẹ mu maru ẹge iphemiphe ọbule eje eje. 28Yọ bụru teke ono, mu achọ iya; tọ dụ iphe mu phụru ono; bẹ mu phụru ndu dụ ụnu labụ l'ụkporo iri; yọ bụru nwoke lanụ bụ iya onye obu gụru iphoro. Ẹ tọ dụdu m'ọo nwanyi lanụ, mu phụru, bụ onye obu gụru iphoro l'ime ẹphe. 29Iphe mu chọ-vuru nwẹnkinyi abụru lẹ Nchileke meru madzụ t'ọ bụru onye obu gụru iphoro. Obenu lẹ madzụ wataru ọcho ẹjo ụzo.”