1Chaꞌju an a-achangjan, chonglon ju hitay alloꞌ! Mun-okhab aju an kumila, ti umalin to hini punlikhatan ju. 2Ti niya an ma-id herpfin hana enachangjan an enhahaꞌpfa ju, ti napaꞌ-i cha. Ja hana pfuher an lopfong ju ja napfutan. 3Hana pfalituꞌ ja pelaꞌ an inamung ju ja nunlati, ja hitay lati chi mangpatikhaw an pfimmahor aju khapo ta na-amnagwan aju. Hotti hitay chi khapo na an dusaon chaꞌju ay Apo Jos, ja hinuy lati ja amat hi apoy an omman ay ni achor ju. Ja tayya an umalin to hini Panugijan Apo Jos an amin hi tatakhu, hot hay hana inamung ju an enachangjan ja ma-id inherpfi na. 4Nomnomon ju an agkhuy ju pay inchat hini pfinoꞌlan hay hana tatakhu an nuntamuwon ju an i ne-ebtoꞌ, hot khun cha kumila ay Apo Jos. Ja chengngor Apo Jos an achi malukud chi apfalinana hini aton cha an mumpakpaka-ahi. 5Pfuher hini niꞌtakhuwan ju heto lota ja enlamoꞌ ju hini enachangjan ju. Amat aju hi pfakah an khun mangamangan ta tomapfa, muti agkhuy cha anila an maparti cha. 6Enchalom ju ja empapatoy ju hana tatakhu an ma-id pfahor na ay chaꞌju, ja agkhuy pfimmuhur ay chaꞌju.

7A-akhi, an-anuhan ta-o hana umali an likhat ingkhana chin pumpfangngachan Hesu Kristo an Apo ta-o. Amat ta-o koma ay ni muntamu hi pajaw an an-anuhana an munhood ay ni penghan ja angonoh chi uchan ta pomhod hini intanum na ta gway pfot-ona. 8Hotti amat hina khu chi pun-an-anuhan ta-o! Papfi-ahon ta-o gwot hini nomnom ta-o, ti nehnot hini pumpfangngachan Apo ta-o an hi Hesu Kristo. 9A-akhi, achi ta-o manghinpipinnapfahor ta achi chita-o hugijon ay Apo Hesu Kristo. Hijay manumarja ay chita-o ja nehnot hini pumpfangngachana.

10Nomnomon ta-o akay niꞌ, a-akhi, hay hachi profeta an hennag Apo Jos an nangali ay ni hapit na. Chichay punchipatan ta-o ti anong un cho-or chi nunlikhatan cha ja inanuhan cha. 11Allon ta-o un hana amat ay chicha an nangedpor hi likhat ja apfuluton Apo Jos. Chengngor ta-o chin omaꞌ-atan chin anuh Job. Anong un munnaud an nalikhatan ja entoloy na an munhochor ay Apo Jos. Ja emmaꞌ-angonoh ja na-innila hini maphod an planon Apo Jos ay hija. Ti hi Apo Jos ja maꞌma-agkhohkhoh ja gway nignikha na.

12A-akhi, hay paꞌpa-alloꞌ ay chaꞌju ja achi ta-o koma ehapata hini hapiton hay hana napfagto an ngachan ad langit, ja heto lota, ja hana uchumna pay an ngachan. Nu allon ta-o hi, “Aa, atoꞌ,” ja aton. Ja nu allon ta-o khu hi, “Achiꞌ aton,” ja achi gwot aton. Amat heto chi aton ta achi ta-o madusa ay Apo Jos.

13Nu gwacha chi malikhatan ay chaꞌju ja hay atona ja mungkalalag. Ja nu gwacha chi oha an gway pun-an-anlaana ja hay atona ja mungkankanta an mundayaw ay Apo Jos. 14Ja nu gwachay munchokhoh ay chaꞌju ja epapfokha na hana pangpangulun chi namati ta ekalalakhan cha hija. I-apjut cha hay lanob ja nungkalalag cha khapo ay ni apfalinan Apo Hesu Kristo. 15Ja hini kalalag cha an nepognad ay ni pammati cha ay Apo Hesus, ja hijay mangpatenong ay hija ti akhahan Apo Jos. Ja nu gway numpfahulan ni munchokhoh ja midchum an mapakawan. 16Hotti manghinpupudnu ja manghinpepennakawan aju nu gway pfimmahulan chi oha-ohanna ay chaꞌju, ja mungkikinnalalag aju ta gway aton ju an tomenong. Ti hini kalalag ni magpong an takhu ja gway apfalinana ta otong chi ma-at na. 17Amat ay Elijah an un takhu an amat ay chita-o, ja impapati na an nungkalalag ta achi umud-uchan, ja agkhuy immud-uchan hi tolo ta han khaggwa hi tagwon. 18Ja unot khu mungkalalag ta umuchan ja immuchan tatagwa ja pfimmunga hachi nitanum.*

19A-akhi, nu gwachay oha hi immachawwi ay tay nahamad an tukhun Apo Jos ja tukhunon ju koma ta mumpfangngad an miꞌ-unud ay Apo Jos. Nu chuꞌkhona hinuy pfahor na, 20ja hay nomnomon ni nanukhun ay hija ja otong hitay tolong na ay ni pfimmahor, ti achi madusa hi ma-id chi pogpogna, ta unot miꞌtakhu ay Apo Jos. Ja midchum an mapakawan hana cho-or an pfahor na.