Chin pfakhu an neꞌtobpfalan Apo Jos hi tatakhu
1Hay podhoꞌ hi ma-awatan ju ay tay khun u allon ja gwacha hitay Natakhay an Pachi ta-o, an i inumpfun ay ni nun-appit hi agwan tay Napfagto an Jos ad langit. 2Hini nahamad an khuna punserbiyan ja ay ni agawwachaan Apo Jos an enephod na, an pfu-un chin ma-ali hi Na-assantuwan an Kwarto ay chuy tabernakulo an enephod chi takhu chin nahop. 3An amin chi Natakhay an Pachi ja chichay nehaad an mangdaton ay Apo Jos hana animar ja hana uchumna an midaton. Hotti hitay Natakhay an Pachi ta-o, ja mahapor an gwa khu chi idatona ay Apo Jos. 4Muti pfu-un heto lota chi pumpachiyana. Ti nu gwacha pay koma heto lota ja achi ma-ali an pachi, ti gawwacha hana papachi an khun mangdaton hana allon ni urchin Moses. 5Muti hini khun cha punserbiyan heto lota ja un talato ja ágwan ni umannung an omaꞌ-atana ad langit. Ja chin nunhakhanaan cha Moses an pamakhachan cha ay ni tabernakulo ja intuchun Apo Jos hini aton cha, an inali na ay Moses hi, “Tikham ta pakhachon ju ayya hini tabernakulo ja eꞌ-eꞌnong ju chin impatikhaw u ay he-a hichi pfuludna ad Sinai.” 6Muti hini tamu an impulang Apo Jos ay Hesus ja napfarpfalor mu hini tamun chin nahnahhun an papachi, ti napfarpfalor hitay pfakhu an neꞌtobpfalan Apo Jos hana tatakhu khapo ay Kristo, ti nepognad hichin napfarpfalor an karin Apo Jos. 7Ja nu ma-id nungkulangan chin nahhun an neꞌtobpfalana ja achi koma mahapor chi hay oha khu. 8Muti impa-innilan Apo Jos an ad-adchi chin nahhun an neꞌtobpfalana hi nangamujuwana hana tatakhu an nangarjana hi,
“Allon Apo Jos hi, ‘Umali han arkhaw an pangephochaꞌ han pfakhu an peꞌtobpfalaꞌ hana tatakhuꞌ an holag Israel ja holag Judah,
9an achi amat chin enat u an neꞌtobpfar chin a-ammod cha
hi nangekakaꞌ ay chicha ad Egypt.
Ti entello cha chin neꞌtobpfalaꞌ ay chicha,
hijaot un u tene-a-an chicha.
10Amat heto hini pfakhu an peꞌtobpfalaꞌ hana holag Israel.
Uchum chi arkhaw ja ichataꞌ chicha hi pfakhu an nomnom
ta ma-awatan cha hana urchin u,
ja lomanoꞌ hana puhu cha
ta marmuy pamhod cha an umunud.
Hot ha-in chi Jos cha
ja chicha hana tatakhuꞌ.
11Ay chuy an timpo ja achi mahapor an munhintitinnuchu ja munhintitinnukhun cha
ta gway aton cha an manginnila ay ha-in.
Ti annilaonaꞌ ay chichan amin,
anong un hana nabnababba ingkhana hana nun-atakhay an tatakhu.
12Nignikhaoꞌ chicha ja pakawanoꞌ hana pfahor cha,
ja alichuwaꞌ hana nun-apukhit an ena-enat cha.’ ”
13Ay tay nangarjan Apo Jos hi gway pfakhu hi peꞌtobpfalana ja impa-innila na an naparkhan chin nahhun. Ja anila ta-o an ma-upfah hana napfajag an ma-id mahpay herpfi na.