1Anakkayah an ul'ulidammuh di hu'im an nahapatusan an umat'ah nan imbaluy di ali!
Nan ulpum ya umat hinan nanginan gina'un hinibug nan nala'eng an munhibug,
2ya nan puhogmu ya nalu'angan an umat hinan malukung an adi mapmappuhan hi bayah!
Nan gitangmu ya umat hinan nabto' an dagamin lene'woh di ha'ha'lung,
3ya nan huhum ya umat hinan nunduppel an ulbun an ulha unu gasel.
4Nan bagangmu ya adu"oy an ma"aphod di tigawna,
ya nan matam ya umela'elat an umat hinan lobong,
ya nan olongmu ya ma'andong!
5Ya ma"aphod goh di tigaw nan ulum ti mahaha"ad,
ya ma"aphod nan maduyuh an buu'mu,
at hiyanan ta"on un nan ali ya ma'agay'ayan hinan inadu"oyna!
6Nidugah ahan an ma"apgohan'a,
at ma'amnawan'an ahawa'!
7Ya umat'ah nan ata'nang an palma,
ya nan huhum ya umat hinan bungana.
8Ya pohdo' ahan an ayaton nan ayiw an palma ta dapoo' nan bungana
ti nan huhum ya umat hinan nabungul an bungan di greyp!
Nan hodohdam ya nabanglu an umat hinan hunghung di mansanas,
9ya nan ungngum ya maphod an umat hi tamtam nan munlameeh an bayah.”
Hay Ingkantan nan Babai:
“Maphod ni' un umayuh nan bayah
ta mundapuh hinan ahawa' ta umuy hinan timidna!
10Nihakupa' ay ahawa',
ya ha"in di amnawana ahan.
11Umali'a an ahawa' ta umuyta munle'le'od hinan bababbabluy,
ya immiyantah di
12ta manelhelongtan umuy hinan nitamman di greyp
ta tigontah unda himmalepeng unu nabe'lag nan habungda,
ya tigonta goh hi unda himmabung nan ayiw an pomegranates
ta hidiy pangipa'annunga' hinan pamhod'un he"a.
13Ya ta umuyta akkay anu hunghungon nan maphod di hunghungna an habhabung hidi,
ya ta"on un hinan nunlene'woh an ihinanta ya do'ol di indadaan'un mun'aphod an bungbungaan an ene'ehhod'u.