1Ya intuluy Elihu an himmapit an inalinay,
“Pumagpapagpag di puhu' hi umalian di puo'
an mi'id di inila' hi ato'!
2Ihamadyun donglon nan hapit Apo Dios
an umat hinan idul an malpuh nan timidna,
3Ya wa ay ta ipa'ilatna ta mabnangan an amin ad abuniyan
ya mabnangan goh an amin tun luta
an mete"ah nan pingitna ta engganah nan pingitna goh hi pangngelna.
4Ya malpah ay hanan ilat
ya ma"adngol nan ay idul an hiyah ne alin Apo Dios,
5ya umipa'ogyat an ay idul di panapitna,
ya do'ol di nahamad hi ina'inatnan adi tu'u pa"innila.
6Ti alyonah nan dalalluy,
Mun'agah ayuh nan luta!
Ya umat goh hinan udan an alyonay,
Dumloh ayu!
7At an amin nan tatagun limmuna ya impadinongna didah na'amtang hinan tamuda
ta way atondan manginnilah aat di anidugah di abalinanah nan tamuna.
8Nan agguy na'amun animal hi bubulung
ya umuyda mihi'ug hinan liyang an abungda.
9Ipa'alinay puo' ya nan nidugah an tungnin,
10ya un anggay di hodohdan Apo Dios ya nalmuy dalallu,
ya an amin nan tu'yap di lobong ya mumpanga'odholda ta ay halmeng.
11Ya hayupona nan dulnuh nan ma'ugtul an bunut
ta hidiy alpuwan di gun umilat an Hiyay dumalat.
12Hi Apo Dios di mangituduh nan bunut hi punle'le'danda
ya ta unudonda nan pohdonah atondah tun luta.
13Ya ipa'alinay bunut an mangiyalih udan
ta pummoltanah nan tatagu unu panebnanah tun luta,
ya ta ipattigna goh di aat di pamhodna.
14At he"a, Job, ya duminong'a ta donglom,
ya ta hamadom an innilaon nan umipanoh'an aton Apo Dios.
15Inilam dan di aton Apo Dios an mummandal hinan ilat
ta bumuhu' hinan bunut ya mumbanigit?
16Ya inilam dan di inatnan nangipatapaw hinan bunut hi ad daya?
Hene ya tamun di nahamad di la'engna!
17Ya he"an munholtap hinan mun'ohab hi un umaliy tuyup an mangipadolnat hitun luta
18ya undan abalinam an mamadang ay Apo Dios an mangibe'lag ad daya
ta pumbalinom an umat hi daggal?
19Hay ninomnommu ya do'ol di inilam,
at itudtuduwan da'mih alyonmin Apo Dios
ti ten mi'id di inilamih hapitonmi!
20Undan mabalin an alyon ay Apo Dios di,
Pohdo' an mi'hapit ay He"a.
Undan udot way taguh mangedpol an mi'haggangan ay Hiya ya adi udot matoy?
21Adi pa"attig di taguh nan algaw an humilid daya
hi un pundondon di tuyup nan bunut ta ma'aanda.
22Ya hidih appit hi iggid hi un hagangon di buhu'an di algaw di alpuwan Apo Dios an nan mumbenang an humili,
ya maphod ahan di tigawna.
23Nan Nidugah an Na'abbagbagtun adi abalinan di tagun hegnon
ya nahamad di abalinana ya panumalyana,
at adi nonong ya pinaligat ditu'u.
24At hiyanan adi umipanoh'ah un an amin nan tatagu ya e'gonanda Hiya
ti nomnomona nan tatagun nanomnoman.”