1Nakatayokan nakadiman naw ni Abimelek, no somnarono a mangisalākan siras Israelitaw, ki si Tola a pōtot ni Powah kan apoko ni Dodo. Iya, ki yapo do trībo ni Issakar, kan minyan do Samir do katokotokonan no Epraim. 2Inpangōlo na saw Israelitaw so dadwa poho kan tatdo a katawen. Do nakadiman naw, iya, ki naitābon do Samir.

3Do nakadiman naw ni Tola, si Jair a taga tana a Gilead iyaw mintādi sya. Inpangōlo na saw Israelitaw so dadwa poho kan dadwa a katawen. 4Myan saw tatdo a poho a pōtot na a mahahakay, as kāda asa dyira, ki nakasakay do bōkod na asno. Nangitoray sa so tatdo a poho a idi do Gilead. Mandas changori, matawagan sa pa so Habbot-jair. 5Do nakadiman naw ni Jair, naitābon do Kamon.

6Siraw Israelita, ki minirwa dana sa mamarin so marahet do salapen ni ĀPO do kapagdāyaw da siras dyosaw a Baal kan Astarot, as kan siraw dyos dan taga Sirya, Sidon, Moab, Ammon kan Pilistiya. Tomnadyichokod sa di ĀPO, as nagsardeng sa a magsīrbi dya. 7Dawa, taywara a nakasoli si ĀPO dyirad Israelitaw, kan inpalōbos na saw Pilisteowaw kan Ammonita a mangsākop sira, 8kan rinanggasan kan indadanes da saw kapotōtan Israel do dāwri a tawen. Do asa poho kan wawaho a katawen, indadanes da sa tabo Israelita a omyan do dayāen no Oksong Jordan do tana a Gilead a tana dan Amoreo. 9Siraw Ammonita, namtang sa pad Oksong Jordan a nanggobat siras taga trībo no Joda, Benhamin, kan Epraim. Taywara a natōok saw Israelitaw. 10Do dāwri, nakatanyis dan Israelitaw di ĀPO, kan binata da dya a kon da, “Naygatos kami dyimo, ta tomnadyichokod kami dyimo a Dyos namen, as kan nagdāyaw kami dyirad Baal.”

11Inatbay sa ni ĀPO dyirad Israelita a kāna, “Siraw taga Egipto, siraw Amoreo, Ammonita, Pilisteo, 12Sidonyo, Amalekita, kan siraw Maonita, do nakaidadanes daw dyinyo, kan tomnayis kamo dyaken, insalākan ko abawri inyo dyira? 13Ki aran komwan, tomnadyichokod kamo dyaken, kan nagdāyaw kamo do kadwan saw a dyos. Dawa, isalākan ko paba inyo. 14Ngay, may kamo a tomanyis dyirad dyos nyo saw a pinidi nyo. Sira pakono mangisalākan dyinyo ah do kaidadanes nyo!”

15Ki binata dan Israelitaw di ĀPO a kon da, “Naygatos kami. Parinen mo aran āngo a ibidang mo a maitotop dyimo, ki tod mo lang yamen a isalākan sichangori.” 16Dawa, inpoha da saw dyos a gan-ganaet a myan dyira, as kan dinaydāyaw da si ĀPO. Do dāwri, maibtoran paba ni ĀPO iyaw nakaidadanes daw no Israelita.

17Sinpangan na, nagsagāna sa machigobat Ammonitaw, as nagkampo sa do Gilead. Siraw Israelitaw, nakpeh sa do kampo daw do Mispa. 18Siraw pangpangōlo dan Israelita do Gilead, naysiniiyahes sa a kon da, “Sino paro mangidaōlo a machigobat dyirad Ammonita? Iyaw makey, ki iyanchiw pangōlo dan tabo a omyan do Gilead.”