No Nanawo ni Pablo a Maynamot di Kristo
1Kakakteh, do dāmo kwaw a nakangay dyinyo a nangikasaba so inpakatoneng no Dyos a maynamot di Kristo, ki inosar kwabaw mararahem saw a chirin mana sīrib no tawotawo. 2Ta do kayan kwaw dyinyo, ki inranta kwaba polos a myan matarek a inanawo ko, an dyi lang a maynamot di Jeso-Kristo kan naten dana do nakadiman naw do kros. 3On, do nakangay kwaw dyinyo, ki akmay mapaw ako na, as kan myan kapamirpir ko do kāmo ko, ta angwan dyi kwa matongpal bilinaw ni Āpo dyaken. 4Asa pa, do nakapangnanawo kan kapangasaba kwaw dyinyo, ki inosar kwabaw makaawis saw a chirichirin a yapo do nainlobōngan a sīrib tan mapilit kamo a manganohed. Ay engga, basbāli a nangnanawo ako a pachirayayan bīleg kan panakabalin no Ispirito no Dyos. 5Ta an komwan, iyaw kapanganohed nyo, ki machinareng aba do kasīrib no tawo, an dya iyaw panakabalin no Dyos.
No Kasīrib no Dyos
6Ki aran komwan, ki alit na maychirin ako so nainsirīban dyirad natwan danaya do kapanganohed. Ki iyabaw kasīribaya no madamaya a chimpo mana iyaw sīribaw no mangitoray saya sichangori do lōbongaya a mawsewsep dana so panakabalin. 7No sīribaya a inanawo ko, ki iyaw malimedaya a plāno ni Āpo Dyos a nangirāman dyaten do makaskasdāaw a glorya na. On, inkeddeng ni Āpo Dyos nyaya a plāno na do sakbay pa pinarswa naw lōbongaya a aran dyi na inpakatoneng dyirad nanma saw a tawotawo. 8Aba dyirad magtotoray saya sichangoriw nakaāwat so nyaya a kinasīrib no Dyos. Ta an naawātan da sawen, inlansa daba do kros si Kristo a Āpo a katotohosan. 9On, maawātan daba polos a akmas naitolasaw do Masantawan a Tolas a kāna,
“Iyaw dyi pa naboya kan nadngey no tawo,
as kan iyaw dyi daw a hahawen a maparin,
ki nawriw insagāna no Dyos dyirad madawaw dya.”
10Ki aran komwan plāno no Dyos, ki alit na a inpakatoneng na dyaten nya palimed na a maynamot do panakabalin no Ispirito Santo. Ta no Ispiritwaya no Dyos, ki matokod na tabo aran siraw mararahem saw a plāno no Dyos. 11Ta aran yaten a tawo, ki abaw makapatak so myan do aktokto no katakatayisa, an dya iyaw bōkod ta lang a pangtoktwan. Komwan si Āpo Dyos, ta moyboh a iyaw Ispirito naw makapatak so pinangtoktwan na. 12Ki yaten a manganohed, no Ispirito a rinawat ta, ki yapo aba do lōbongaya, an dya yapo do Dyos tan maawātan ta tabo parābor na saya dyaten.
13As dawa, do kapangnanawo namenaw so maynamot di Āpo Dyos, ki inosar namen abaw sīribaw a yapo do tawotawo. Ta no inosar namen, ki siraw naispiritwan a minsāhi a innanawo no mismwaya a Ispirito no Dyos. 14Ki siraw tawo a kabwan Ispirito no Dyos, rawaten dabaw rigālo saya no Ispirito no Dyos, ta inbidang daw nyaya a abos sinpaspangan dyira. Maawātan dabaw kapateg daw, ta iya lang Ispirito no Dyos myan so panakabalin a mangipaāwat so nyaya. 15Ki iyaw tawowaw a myan so Ispirito no Dyos, maparin naw mangeddeng so kapateg no tabo an maganay sa mana engga. Ki iyaw tawo a abo dyaw no Ispirito no Dyos, ki maparin nabaw mangokom so tawowaw a yanan Ispirito no Dyos, ta abaw kapakaāwat na a maynamot do dawri. 16Ta myan naitolas do Masantwan a Tolas a kāna,
“Sino makapatak so aktokto no Dyos?
Sino makaparin a omnanawo sya?”
Ki aran komwan, yaten a manganohed, ki myan dana dyaten aktokto ni Kristo.