गुमसिना मुनेह येसुन निल्पिह कीस्तोर
(मत्याल 27:1-2,11-14; मार्कल 15:1-5; योहन 18:28-38)
1पया सबेटोर लोकुर पंचतग्डाह येसुन पिलाति इनवाल गुमसिनगा ओतोर. 2ओसि येसुना पोग़ोन इद्रम तप तोहता बोटटोर इतेके, “वेग़ मावा यहुदि लोकुरिन लेवाङ-मताङ काग़्हचि लेसिह कीस्तोग़. ओसो कय्सर राजाह्क सिद्वा एमाटु इनजोर लोकुरिन तेग़्हतह्तोग़. वेग़ तन्के ‘देवुळ लोहतोग़ पिसिह केवाल राजानन,’ इनजोर वेहतह्तोग़,” इतोर. 3पया पिलाति येसुन, “बह निमा यहुदिरा राजानिना?” इनजोर ताल्ह्कतोग़. पया येसु ओनु, “निमा इह्निन अहे” इतोग़. 4अस्के पिलाति पेर्मालोरिन ओसो लोकुरिन, “वेग़ मन्कनगा बाताले कसुर नाक दिसो,” इतोग़. 5मति मुडा लोकुर पका कैंगम आसोर कयर कींदुर, “वेग़ु गालिल पटटग्डाह इतेके मावा यहुदिर मनदनद सबे बूमतगा लोकुरिन तनाङ काग़्हच लेसिह कीसोर इगा एवनाह वातोग़,” इतोर.
एरोद अंतिपसनगा येसुन ओस्तोर
6पया पिलाति इदिन केंजिसि, “वेग़ मन्कल गालिल पटटोग़ा?” इनजोर ताल्ह्कतोग़. 7इंजेके गालिल पटटुन ताकिह केवाल एरोद अंतिपस राजाल अव दियाने येरुसलेम सहरतगान वास मतोग़. येसु गालिल पटटोग़ आंदोग़ इनजोर पिलाति पुतस्के, येसुन ओनगा ओयलाह वेहतोग़.
8एरोद अंतिपस येसुना लोप्पा मुनेन केंजिसि मतोग़. अदिनेनाह्क ओग़ वेल्लाङे दियानाहि येसुन ऊळलाह विचर कीस मतोग़. ओसो येसुना कयदे बेदाय बामिह कीयनद सीना ऊळलाह आसा कीसोर मतोग़. अदिह्क ओग़ येसुन ऊळिस पका गिर्दा आतोग़. 9पया ओग़ु येसुन वेल्लाङे पोल्लोङ ताल्ह्कतोग़, मति येसु तनेनाह ओन बाताले पोल्लो मल्होग़. 10पेर्मालोर ओसो सास्त्रमगूरुर अगा निचि, तम्क विचर वातप येसुना पोग़ोन कसुर्क वाटिंदुर. 11पया एरोद अंतिपस वने तनाङ सीपय्कना संगे येसुन पास्किस कवतोग़. ओन राजान कीतपु मिळ्स्कनद जगा केग़पिह कीसि, पिलाति गुमसिनेकेन मल्हच ओया वेहतोग़. 12अदे दिया कोनि एरोद अंतिपस ओसो पिलाति वेर इर्वुर गूनम आतोर, ताना मुने इतेके ओर ओर्विह्क-ओर्वोग़ विरुदतेन मंदुर.
पिलाति येसुन हव्कलाह उकुम ईस्तोग़
(मत्याल 27:15-26; मार्कल 15:6-15; योहन 18:39—19:16)
13पया पिलाति पेर्मालोरिन, यहुदिराङ मुक्यालोरिन ओसो लोकुरिन केयतोग़. 14केयिसि इद्रम इतोग़, “लोकुरिन लेवाङ-मताङ पोल्लोङ काग़्हचि, लेसिह केवाल आंदोग़ इनजोर मीट वेग़ येसुन इगा ततिर. इंजेक नना मीवा मुनेह वेन पर्ह्किस ऊळतन. मीट वेना पोग़ोन बेव पोल्लोना कसुर्क वाटटिर, अव पोल्लोनाङ कसुर्क इतेके वेना लोप्पा नाक बाताङे दिसोङ. 15ओसो एरोद अंतिपसिह्क वने वेना बाताले कसुर दिसो, अदिनेनाह्क ओग़ु वेन ओन मयगा मल्स लोहचीतोग़. वेन्क हामुरता सिक्सा दोर्कना इद्रम वेग़ बाताले कसुर केवोग़. 16अदिनेनाह्क वेन जेट्लाते नल्हता वेहचि विळ्सिस ईय्ह्नन,” इतोग़.
17 18अस्के सबेटोर लोकुर कलियिसि, “वेग़ येसुन हव्कलाह वेहा! मयेनाह्क बरबसिन विळ्सा,” इनजोर रोदा पोयतोर. 19(बरबसि इनवाल इतेके सहरता मन्कलोरिन सर्करता विरुदते ओङ तेग़्हच मतोग़ ओसो उय्तुरिन हव्किस वने मतोग़. अदिनेनाह्क ओन जेलते वाटिस मतोर.)
20येसुन विळ्सिस ईयलाह, पिलाति ओसो उंद मल्का मुडा लोकुरिन वेहच ऊळतोग़. 21मति ओरु, “ओन हव्कनागुटातगा मोलाङ कोटिस हव्काट, हव्कनागुटातगा हव्काट!” इनजोर पका रोदा पोयतोर.
22अस्के पिलाति मुचा केपा ओसोवने लोकुरिन इतोग़, “बाराह्कु? वेग़ बाताल कसुर कीतोग़? वेन्क हामुरता सिक्सा ईयना लेह्का वेनगा नाक बाताले कसुर दोर्को. अदिनेनाह्क वेन जट्लाते नल्हता वेहच विळ्सिस ईय्ह्नन,” इनजोर इतोग़. 23मति मुडा लोकुर, “येसुन हव्कनागुटातगा वेळ्हा,” इनजोर पका केयसोर रोदा पोयतोर. अद्रमे ओरा केयनद पका वीळता. 24अदिनेनाह्क पिलाति पया मुडा लोकुर ताल्ह्कतपे आयि इनजोर इतोग़. 25पया जेलते मतोग़ सर्करता विरुद मनवाल हव्के मन्कनु लोकुर ताल्ह्कताह्क ओन विळ्सिस ईया वेहतोग़. मति इंजेक तम्क विचर वातप बहे कीयिर इनजोर लोकुरा कयदे येसुन ईसीतोग़.
येसुन हव्कनागुटातगा वेळ्हतह्तोर
(मत्याल 27:32-44; मार्कल 15:21-32; योहन 19:17-19)
26अस्के पया सीपय्क येसुन तना हव्कनागुटा कांजिह कीसि, पिलातिना लोताहि मोलाङ कोटना जागातगा ओनेके, नडुम अग़दे येसुह्कु हव्कनागुटा कांजलाह लाव वावो. अचोटेने कुरेने सहरतोग़ सिमोन इनवाल पोलमतेनाह येरुसलेमतेके अनजोर मतोग़. अस्के सीपय्क ओन पोसि, हव्कनागुटा कांजिस येसुना पेग़्के-पेग़्के दायलाह बीगर पोग़सिह कीतोर.
27अस्के लोकुरा बेरा गोह्डि येसुना पेग़्के अनजोर मतोर. अद वेलाते अगा उचुक आस्कु ओनेनाह अर्युल पासोर अळ्न्दुङ. 28अस्के येसु अव आस्कनके मिळ्न्दिसि, “ए येरुसलेमताङ आस्कनिर! नयेनाह्क अळमाटु, मति मियेनाह्क ओसो मीवाङ पिलाङ-पेकोरेनाह्क अळ्म्ह्टु. 29बाराह्क इतेके इद्रमताङ तिपलताङ दियाङ वायना मन्ह्ताङ, अव दियाने ‘वंजो मनदनद आंचाळ देय्वाता, बस्केने नेलाङ हव्कवद आंचाळ देय्वाता, बेस्केन पाल ऊहवद आंचाळ देय्वाता,’ इनजोर लोकुर इनदनुर. 30ओसो ‘मावा पोग़ोन अर्ह्म्टु’ इनजोर मेटान इनदनुर, ‘माक मिसाटु’ इनजोर गुड्रान इनदनुर. 31वेरु नावा लेह्काडोग़ कसुरलेवोन्क इद्रम कीस्तोर, इतेके मीट कसुर मनवालोरिन बेद्रम केमुळ आयग़ा?” इनजोर येसु इतोग़.
32अद्रमे येसुना संगे इर्वुर कलेरिन वने हामुरता सिक्सा ईयलाह ओतोर. 33पया ओर, “तला टाप्रा” इनदनद जागातगा एवतोर. एवसि येसुन हव्कनागुटातगा मोलाङ कोटिसि वेळ्हतोर. ओनासंगे इर्वुर कलेरिन वने ओर्विन तिनळ बाजे, ओर्विन बार ओना दावळ बाजे वेळ्हतोर. 34अस्के “ए देवुळबाबा! वेर नाक हव्कवालोर लोकुर बाताल कीस्तोर अदिन पुनोर, वेरिन मापि कीमु!” इनजोर देवुळतुन येसु पार्तना कीतोग़.
पया सीपय्कु सीटिङ वाटिसि, येसुनाङ गेंदेङ तूसतोर. 35अगा मुडा लोकुर निचि मोलाङ कोटनदिन ऊळसोर मतोर. यहुदिराङ मुक्यालोर येसुन पास्कसोर इद्रम इतोर, “वेग़ दुस्रोरिन पिसिह कीतोग़, वेग़ देवुळ आचतोग़ पिसिह केवाल किर्स्तु आंदोग़ इतेके, तना जीवातुन तनाय पिसिह कीयेग़,” इतोर. 36-37सीपय्क वने वासि, ओयतद अंगुर जोमा ओन्क उहचि, “निमा यहुदिरा राजानिन आंदिन इतेके, नीवा जीवातुन निमान पिसिह कीम!” इनजोर पास्कतोर. 38ओसो “वेग़ यहुदिरा राजाल आंदोग़” इनजोर बलाते रासिसि, ओना तलापोग़ोन गुटातगा वेळ्हच मतोर.
39येसुना संगे मोलाङ कोटिस वेळ्हच मतोरग्डाह ओर्वोग़ कले वने, “निमा देवुळ लोहतोग़ पिसिह केवाल किर्स्तुनिन इतेके, नीक ओसो माक पिसिह कीम,” इनजोर येसुन पास्कतोग़. 40मति दुस्रोग़ कले बार अद्रम इतोन दगा ईसि, “वेन्क दोर्कतद सिक्सा नीक वने दोर्कता. मति निमा देवुळतुह्क वने बह रेयविन रा? 41माट इतेक कले कबळ कीताह्कु, माक काय्दा मतपु बराबर सिक्सा दोर्कता. मति वेग़ इतेके बाताले कसुर केवोग़,” इनजोर इतोग़. 42ओसो येसुन इतोग़, “ए येसु! निमा राजाल आतस्के नाक सीता कीमु.” 43इतस्के येसु ओनु, “नना नीक सेतेम वेहतह्नन, नेंडे निमा नावा संगे सिंगर्दीपतगा मनदकिन,” इनजोर इतोग़.
येसुना हामुरि
(मत्याल 27:45-56; मार्कल 15:33-41; योहन 19:28-30)
44अस्के पियलि नेक नितग्डाह इतेके, मूंड एगनाह्जोम पूरा बूममेंड ईकळ आता. 45पोळ्दता वेह्च वने दिसो. अस्के येरुसलेमतग्डा मंदिरता लोप्पा मतद सबेट्क पवित्र गूडटा अग़दगा, अडह कीस मतद गेंदे रेंड तुक्ळेङ आनाह पग़्क वितता. 46अस्के येसु, “ए देवुळबाबा! नावा जीवातुन नीवा कयदे ईय्ह्नन,” इनजोर जोरते केयिसि हातोग़. 47पया सीपय्कना मुक्याल अगा बह आता, तान ऊळिसि, “वेग़ मन्कल निटमे सेतेमतोग़ मतोग़!” इनजोर देवुळतुन जोहर कीतोग़. 48ओसो अगा ऊळलाह वातोर लोकुर बाताल-बाताल आता, अदिन पूरा ऊळिसि, अर्युल पासोर मल्स अतोर. 49मति येसुन पुतोरु ओसो ओना संगे गालिल पटटाह वातव आस्कु जेक निचि, अगा बह आंदु अदिन सबे ऊळसोर मतोर.
येसुन गुमयातगा तासिह्तोर
(मत्याल 27:57-61; मार्कल 15:42-47; योहन 19:38-42)
50-51पया अगा यहुदा पटटा अरिमतेया नाटेनोग़ योसेप इनवाल ओर्वोग़ मन्कल मतोग़; ओग़ु यहुदिराङ तग्वाङ केवालोरग्डाह ओर्वोग़ मतोग़. ओसो तग्वाङ केवालोर येसुना नेयम कीतस्के, अगा तोळ आयोग़. बह इतेके ओग़ बेसतोग़ सेतेम मन्कल मतोग़. देवुळि बेस्के मावा इस्रयेल देसेमते तना राजेम निल्पिह कीयग़ा इनजोर केपिन्दोग़. 52ओग़े योसेप पिलातिनगा अनजि येसुना सेत्तातुन गति कीय्ह्नन इनजोर ताल्ह्कतोग़. 53ताल्ह्किस सेत्तातुन हव्कनागुटातग्डाह रेहतोर. पया वेल्ला दाराता हामुर-गेंदेते सेत्तातुन ऊर्हतोर. अह कीसि बेरा आद बंडातगा तर्विस मतदु, मुने बोने पोहवद पूना गुमयातगा येसुना सेत्तातुन तासतोर. 54अद दिया वारमता पोल्वादियातेनाह्क (इतेके सनारमतेनाह्क) तयर आयनद दिया मता. ओसो गय्क इतेके पोळ्द अनजोरे, पोल्वादिया सुरु आयना मता. 55पया गालिल पटटाहि येसुना संगे वातव आस्कु, योसेप सेत्तातुन ओयह्पा गुमयातुन ऊळलाह अताङ. ओसो सेत्तातुन बेद्रम तासतोर, अदिन वने ऊळताङ. 56पया अव आस्कु अग्डाह मल्स अनजि, बेस गब एग़्स्कनव मराना पिंडि ओसो अतर्नेय सेत्तातगा वाटलाह पर्ह्किस तयर कीताङ.
पया पोळ्द अताह्कु वारमता पोल्वादिया इनजोरे, मोसानाङ अडोङ वेहतपु लोने रोमताङ.