1ओर अतस्‍के येसु जय्‍तुन मराना मेटातके अतोग़. 2पया पङ वीयतस्‍के, ओग़ ओसो मंदिरतगा वातोग़, अस्‍के वेल्‍लाटोर लोकुर ओनगा वातोर. अस्‍के येसु उदिसि ओरिन काग़्हता बोटटोग़. 3-4अस्‍के सास्‍त्रमगूरुर ओसो परुसिर सिंड्रि कबळ कीयह्‌पा दोर्किह कीतदु उंद आंचान ओनगा पोस ततोर. तान पया लोकुरा नडुम निल्‍पिह कीसि येसुन इतोर, “गूरु, इद आंचाळि ओर्विन कवयह्‌पा, माट तेन पोयतोम. 5इद्रमता आंचानु बंडाङ उकिस हव्‍कना इनजोरे मोसा मुय्‍तोग़ माकु अडोना सास्‍त्रमते वेहच मतोग़. इतेके इदिनलोप्पा माक निमा बाताल वेहतह्‌निन?” इनजोर येसुन ताल्ह्‌कतोर. 6येसुन कसुरते पोयतलाह माक अग़ दोर्कना इनजि ओन एग़्‍किह कीयलाह इद्रम इतोर.* मति येसु इतेके इळ्‍न ओलिसि, नेदगा वळ्‍न्‍जते बाताङो रासलाह आतोग़. 7-8मति ओर उंदि अट पोसि ओन ताल्ह्‌किंदुर अदिह्‌कु ओग़ तेदिसि ओरिन इतोग़, “अले, अह इतेके मियग्‍डाह बोग़ पापमलेवोग़ मन्ह्‌तोग़, ओग़े तेन बंडा मुने उकेग़,” इनजि ओग़ ओसो ओलिसि नेदगा रासलाह आतोग़. 9ओना पोल्‍लो केंजिसि, आंचान पोस ततोरु, वेर कतमतोरु, माट कतम पापिये, इनजि पुताह्‌कु, मुने मुय्‍तोर, पया लेयोर, इद्रम वग़ोग़-वग़ोग़ पेसिस अतोर. ओर अतस्‍के येसु अद आंचाळ बारा मुडा नडुम पिसतोर. 10पया येसु तेदिस ऊळतस्‍के, अद आंचान विळ्‍सिस अगा बोग़े इलोग़. अस्‍के तान इतोग़, “पेडि, नीक तप तोहवालोर बेक अतोर? नीक बोग़े सिक्‍सा ईयलाह तयर इलोग़ा?” 11“गूरु, नाक बोग़े बातय इनोग़,” इनजि इता. “ननावने नीकु सिक्‍सा ईयलाह तयर इलेन. अन, इंजेटाहि निमा नीवा पापमतुन विळ्‍सा,” इनजोर येसु तान इतोग़.)

12अस्‍के मंदिरते येसु ओसो ओरिन काग़्हता बोटटोग़. “ननाने दुनियाता वेह्‌चतन आंदन. बोर नावा संगे वास्‍तोर, ओर ईकळते बेस्‍केन ताकोर आयनुर, मति ओरगा देवुळ ईतद जीवातके ओसीयनद वेह्‌च मंदग़ा.” 13अस्‍के परुसिर येसुन इतोर, “निमा वग़ोनिन नीवाय लोप्पा साक्‍सि ईय्ह्‌निन इतेके नीवा साक्‍सि ताको,” इनजि इतोर. 14येसु पया ओरिन इतोग़, “नना वग़ोनन कुदि नावाय लोप्पा साक्‍सि ईतेकाय नावा साक्‍सि ताकिह्‌ता, बह इतेके नना बेग्‍डाह वातन, ओसो बेगा दाय्ह्‌नन, इद नाक एर्काय मन्ह्‌ता. मति नना बेग्‍डाह वातन ओसो बेगा दाय्ह्‌नन, इदिन मीट पुनविर. 15मीट इतेके मन्‍कना बुदते नेयम कीय्ह्‌निर; मति नना बोनाय नेयम केवोन. 16कीतेक तेला नावा नेयम सेतेमता मन्ह्‌ता, बाराह्‌क इतेके नना वग़ोनन आयोन, मति नाक लोहतोग़ बाबाल नाक तोळ मन्ह्‌तोग़. 17केंजाटु, कम्‍सेकम इर्वुरा साक्‍सि सेतेम ताकिह्‌ता इनजि मीवा अडोना सास्‍त्रमते रासतद मन्ह्‌ता. 18अद्रमे नना नावाय लोप्पा साक्‍सि वेहवनन, ओसो नाक लोहतोग़ बाबालवने नावा लोप्पा साक्‍सि ईस्‍तोग़,” इनजि येसु इतोग़. 19तेन केंजिस ओर ताल्ह्‌कतोर, “अह इतेक नीवा बाबाल बेगाडोग़?” “नना निटम इतेके बोनन, मीट पुनविर, ओसो नावा बाबान वने पुनविर. मीटु नाक पुतेके, नावा बाबान वने पुनेरिर,” इनजि येसु ओरिन इतोग़. 20मंदिरतगा पेदल्‍क उदना अराता बाजे, कोड वाटना जागातगा काग़्हनेके येसु इव गोटिङ वळ्ह्‌कतोग़. तेला मति ओन बोरे पोयोर, बाराह्‌क इतेके ओना हायना कगो एववाय मता.

21ओसो उंद देबा येसु ओरिन इतोग़, “नना पेसिस दाकन, अस्‍के मीट नाक पर्ह्‌ककिर, मीट मात्रम मीवा पापम मापि आयवाये हायकिर. बेगा नना दाकन, अगा मीट वाया पग़विर,” इतोग़. 22अस्‍के यहुदिराङ पेदल्‍कु तमतमाय वळ्ह्‌किंदुर, “ ‘बेगा नना दाकन, अगा मीट वाया पग़विर,’ इद्रम वेग़ बह इन्ह्‌तोग़? तना जीवातुन तनाय पोळागोटनोग़, बहे,” इद्रम इंदुर. 23ओग़ पया ओरिन इतोग़, “मीट इळ्‍ता बूमताहि, मति नना पोग़ोटा बूमताहि. मीट इद दुनियातोरिर, मति नना इद दुनियातोनन आयोन. 24अदिह्‌कु ‘पापम मापि आयवाये हायकिर,’ इनजि नना मीक वेहतन. बाराह्‌क इतेके नना देवुळता मग़नन आंदन इनजोर मीट विस्‍वस केवेके मीटु मीवा पापम मापि आयवाये हायकिर,” इनजि इतोग़. 25“अह इतेक निमा बोनिन?” इनजि ओर ओन ताल्ह्‌कतोर. येसु ओरिन वेहतोग़, “मीक मुनेताहि वेहचोर वातन, ओनन आयोया? 26मीवा लोप्पा वळ्ह्‌कलाह ओसो मीवा नेयम कीयलाह नयगा वेल्‍लाङे गोटिङ मन्ह्‌ताङ, मति नाक बोग़ लोहतोग़ ओग़े सेतेम वळ्ह्‌किह्‌तोग़, ओनग्‍डाहि केंजताङ गोटिने नना दुनियातोरिह्‌क वेहतह्‌नन,” इनजि इतोग़. 27“मावा संगे वेग़ु देवुळबाबानाये लोप्पा वळ्ह्‌किह्‌तोग़,” इनजोर ओरिह्‌क तेळियो आसि.

28अदिह्‌के येसु ओरिन इतोग़, “नना माने-मन्‍कना नडुम पुटटोनन आस तेला मीट नाक गुटातगा पोग़ोन वेळ्ह्‌तकिर अस्‍के ‘नना देवुळता मग़नन आंदन,’ इनजोर मीक तेळियग़ा. ओसो नना कुद आसि बातय केवोन, मति बाबाल नाक काग़्हतपु, नना इव पोल्‍लोङ वळ्‍ह्‌किह्‌नन. 29बोग़ नाक लोहतोग़, ओग़ नाक तोळ मन्ह्‌तोग़. बेव कबस्‍किह्‌क ओन्‍कु गिर्दा वास्‍ता, अवे कबस्‍क नना अमेसा कीसोर मह्‌नन, अदिह्‌के ओग़ नाक वग़ोने विळ्‍सिसेवोग़,” इनजोर इतोग़. 30इव गोटिङ ओग़ वळ्ह्‌किह्‌पा, वेल्‍लाटोरे ओग़ देवुळ लोहतोग़ राजाल आंदोग़ इनजि नमतोर.

31बोर यहुदिर येसुन नमिह्‌नोम, इतोर, ओरिन ओग़ इतोग़, “मीट निटमे नावाङ कग़यवालोरिर आय्ह्‌निर इतेके मीट नावा पोल्‍लोते तिरियकिर. 32अस्‍के मीट सेतेमतुन पुनदकिर, अद सेतेम मीकु लेहतग़ा.” 33“माटु अब्रहम मुय्‍तोना कूळतोरोम आंदोम, बोनाय बेस्‍केने कय इळ्‍न दोहतप मनोम. इतेके निमा ‘अद सेतेम मीकु लेहतग़ा,’ इनजोर बह इह्‌निन?” इनजि वेर कोंटेतोर यहुदिर येसुन कट्ला कीतोर. 34येसु ओरिन इतोग़, “इह केंजाट, नना वेहतह्‌नन, बोर मन्‍कलोर पापम कीसोर मन्ह्‌तोर, पापमताङ विचर्क ओरिन आव्रे कीस्‍ताङ. 35केंजाटु, माल्‍काना लोते ओर्युदोन्‍क अमेसा मनदनद अदिकर इले, मति मग़िह्‌क इसि मन्ह्‌ता. 36अदिनेनाह्‌क नना, देवुळता मग़नन मीकु लेहचीतेके, मीट निटमे पापमताङ विचर्कनाह पिह्‌ट अरयकिर. 37मीटु अब्रहम मुय्‍तोना कुट्मळतोरिर, इनजोर नाक एर्काये. तेला मति मीवा जीवाते नावाङ पोल्‍लोङ गडोङ इनजोर मीटु नाकु हव्‍कलाह कोहतह्‌निर. 38बेव गोटिङ नना नावा बाबानगा मतस्‍के ऊळतन, अविने नना वेहतह्‌नन. अद्रमे मीटवने मीवा तपेनाहि केंजतव गोटिने मीट कीय्ह्‌निर.” 39“मावा बाबाल अब्रहमिये आंदोग़!” इनजोर वेर इतोर. अस्‍के पया येसु इतोग़, “मीट अब्रहम मुय्‍तोनाङ मग़्‍कनिर मतेके, अब्रहमिनलेह्‌का बेसताङ कबस्‍क केवेरिर. 40मति इंजेके नना देवुळताहि केंजतद सेतेमता पोल्‍लोतुन मीक वेहतन तेला मति नाके मीट हव्‍कलाह कोहतह्‌निर. अब्रहम इतेके इद्रमताङ कबस्‍क केवोग़. 41बोग़ मीवा तपे करले मन्ह्‌तोग़, ओनाङे कबस्‍क मीट कीय्ह्‌निर.” अस्‍के पया वेर इतोर, “माट पोर्का पेकोरलेह्‌का पुट वावोम! मति माक वग़ोग़े देवुळबाबाल मन्ह्‌तोग़!” 42अस्‍के येसु ओरिन इतोग़, “देवुळ मीवा बाबाल आस मतेके मीट नाक जीवा केवेरिर बाराह्‌क इतेके नना देवुळताहि पेसिस वातोनन आंदन. नना नावाय गिर्दाते इद बूमतगा वावोन, मति नावा बाबाल लोहताह्‌के नना वातन. 43नावाङ पोल्‍लोङ मीक बह केंज वसो. अदिह्‌के नना वेहतनव गोटिङ मीक तेळियोङ. 44मीट देयह्‌कना मुक्यानाङ, मग़्‍कनिर! अदिह्‌के तानाङे लाग्‍वाङ कबस्‍क मीट कीयलाह ऊळिह्‌‍निर. अद मुनेताहि मन्‍कन हव्‍के आंदु. ओसो तानगा बातय सेतेम इले, अदिह्‌क अद बेस्‍केन सेतेमतुन पोस मनो. ताना बुदिय जोल वळ्ह्‌कनद आंदु बाराह्‌क इतेके अद जोलहाल ओसो जोलतुन पुटिह कीयनद आंदु. 45मति नना मीक सेतेम वेहताह्‌कु मीट नाक नमविर. 46नना पापम कीतन इनजि मियग्‍डाहि बोग़ाय तोहता पग़यनोग़ा? नना सेतेम वेहतेकाय मीट नाक बाराह्‌कु नमविर? 47बोर देवुळता लोकुर मन्ह्‌तोर, ओरु देवुळताङ गोटिङ केंजिह्‌तोर. मीट मात्रमि देवुळता लोकुरिर आयविर, इनजोरेन मीट केंजविर,” इनजोर येसु इतोग़.

48अस्‍के यहुदिराङ पेदल्‍क येसुन इतोर, “निमा सामरितोनिन पर्गेनिन, नीक देयम पोयता, इनजोर माट इह्‌नोम, अद बह जोले?” 49येसु ओरिन इतोग़, “आयो, नाक देयम पोयो. मति नना नावा बाबाना कदर कीय्ह्‌नन, मीट इतेक नावा कदर रेहतह्‌निर. 50नना नावा मानतुन ऊळोन. नावा मान ऊळवाल ओर्वोग़ मन्ह्‌तोग़, नावा बाबाल, बोग़ सेतेम, बोग़ जोल, ओन्‍के नेयम कीयलाह अदिकर मन्ह्‌ता. 51इह केंजाट, नना वेहतह्‌नन, बोर नावाङ पोल्‍लोङ केंजिस अहलेह्‌का तिरियनुर, ओर बेस्‍केन हायोर आयनुर.” 52ओग़ु मेंदुदा हामुरता लोप्पा वळ्ह्‌किह्‌तोग़ बहे, इनजोर यहुदिर ओन इतोर, “नीक देयम पोयता, ऊळा, इंजेक माट पुतोम. अब्रहमवन डोलतोग़, देवुळता कबुरतोरवने डोलतोर, निमा मात्रम इह्‌निन, ‘बोर नावाङ पोल्‍लोङ केंजिस अहलेह्‌का तिरियनुर, ओर बेस्‍केन हायोर आयनुर,’ इह्‌निन. 53मावा मुनेतोग़ पेदामुय्‍तोग़ अब्रहमि डोलतोग़, ओन्‍काय निमा बेरोनिना? देवुळता कबुरतोरवने डोलतोर. इतेक निमा बोनिन आंदिन, बाताङ वेहतह्‌निन?” इनजि वेर ओन पळ्मिङ आतोर.

54येसु ओरिन इतोग़, “नना नाके कदर ईतेके, अद कदरता बातय पाय्‍दा इले. मति बोन मीट ‘मावा देवुळबाबाल आंदोग़,’ इनजोर इह्‌निर, ओग़े नावा बाबाल नाक कदर ईस्‍तोग़. 55मीट ओन पुनविर, मति नना ओन पुह्‌नन. ओसो ‘नना ओन पुनोन,’ इनजोर इंदकन इतेक नना मीवा लेह्‌का जोलतोनन आयकन. मति नना इतेक ओन पुह्‌नन ओसो ओनाङ पोल्‍लोङ केंजिस अह तिरियिह्‌नन. 56मीवा मुनेतोग़ पेदामुय्‍तोग़ अब्रहमि नावा वायनद वेलातुन ऊळसोर पका गिर्दा आतोग़. ऊळ्‍न्‍दोग़ वने ओसो गिर्दा आंदोग़ वने.†” 57“नीक इंका वळ्गा वय्‍सतेला आयोये, इतेके निमा अब्रहम मुय्‍तोन बह ऊळतिन?” इनजोर यहुदिर येसुन इतोर. 58येसु ओरिन इतोग़, “इह केंजाट, नना वेहतह्‌नन, अब्रहम मुय्‍तोह्‌काय सुरुमुनेतोनन नना मतन, इंजेक ओसो मह्‌नन!” 59तेन केंजिस येसु ननान देवुळतन, इतप वळ्ह्‌किह्‌तोग़ इनजि वेर पुतोर. पया ओङ आसि येसुन उकलाहि बंडाङ पेह्‌कतोर. मति येसु ओरग्‍डाहि कुस्‍क्‍ने मंदिरताहि पेसिस अतोग़.