1MAHOPE iho o keia, pane ae la ko Ioba waha, a hoino aku la ia i kona la.

2Olelo mai la o Ioba, i mai la,

3E poho wale iho ka la a'u i hanau ai,

A me ka po i oleloia, ua hapaiia he keikikane.

4E lilo ua la la i pouli;

Mai manao ke Akua ia mai luna mai,

Aole hoi e alohi mai ka malamalama maluna ona.

5E haukae ka pouli a me ka malu make ia la;

E kau ka naulu maluna ona;

E hooweliweli na wela o ka la ia ia.

6A o ua po la, e lawe aku ka pouli ia ia;

Aole e hui pu ia oia me na la o ka makahiki;

Mai hookomoia oia iloko o ka helu ana o na malama.

7Aia hoi, o ua po la, e hooneoneoia oia;

Aole e hookomoia ka leo olioli iloko ona.

8Na lakou ia e hoino, na ka poe e hoino ana i ua la la,

Ka poe makaukau no ke kanikau ana.

9E hoopouliia na hoku o kona wa molehulehu:

E kali aku ia i ka malamalama, a loaa ole;

Aole hoi ia e ike i ka wehe ana o ke alaula.

10No ka mea, aole ia i hoopaa i na puka o ka opu o kuu makuwahine,

Aole hoi ia i huna i ka popilikia mai ko'u maka aku.

11No ke aha la i make ole ai au mai ka opu mai?

No ke aha la i kaili ole ia kuu ea i kuu puka ana mai ka opu mai?

12No ke aha la i kokua ai na kuli ia'u?

No ke aha hoi na u, i omo aku ai au?

13Alaila, ua moe iho au ano, a ua maluhia iho,

Ua hiamoe iho la au, alaila ua maha iho la au,

14Me na'lii, a me na kuhina o ka honua,

Ka poe i kukulu i na wahi neoneo no lakou:

15Me na keiki alii paha, ka poe mea gula,

Me ka poe i hoopiha i ko lakou mau hale i ke kala:

16A, me he mea la i hanau i ka wa, ua ole au;

Me na keiki ike ole i ka malamalama.

17Malaila e hooki ai ka poe hewa i ka hana kolohe ana;

Malaila hoi e hoomahaia'i ka poe i luhi o ka ikaika.

18A e hoomaha pu ia'i hoi ka poe pio;

Aole lakou i lohe i ka leo o ka mea hooluhi.

19O ka mea uuku, a me ka mea nui, aia no malaila;

A o ke kauwa, ua kaawale ia mai kona haku aku.

20No ke aha la i haawiia mai ai ka malamalama i ka mea popilikia,

A me ke ola i ka mea eha ma ka naau?

21Ka poe e kali ana i ka make, aole i hiki mai,

A ua oi ko lakou eli ana ia mea, mamua o na waiwai i hunaia;

22I ka poe hauoli nui me ka olioli,

I ka wa i loaa'i ia lakou ka luakupapau?

23I ke kanaka i hunaia kona aoao,

I ka mea a ke Akua i hoopuni ai?

24No ka mea, ua hiki pu mai ko'u kaniuhu ana me kuu ai ana,

A ua nininiia'ku ko'u uwe ana e like me na wai.

25No ka mea, ua makau au i ka mea makau, a ua hiki mai ia maluna o'u,

A o ka mea a'u i weliweli ai ua hele mai ia io'u nei.

26Aole au i pomaikai, aole hoi i oluolu,

Aole hoi i maha; aka, hiki mai ka popilikia.