Titwalekerera obulokole obwʼamaanimaani
1Nʼolwekyo tusaaniire twekalangulire oku njegesya egitwasunire, kaisi awo tuleke okugizwaku. 2Nti kyazuukire ngʼobukwenda bwa Kibbumba abamalaika obubaleetere owebuli nʼobukakafu. Era, abo bonabona abanandi babwabiraku nʼabagaine okubukwata basunire ekibonerezo ekibasaanira. 3Kaisi tete oolwo iswe? Twalyezya tutya aale okulama okutubonereza ngʼowekitusaanire swena, singa titwateekeyo omwoyo oku bukwenda obukwata oku kulokoka obwʼamaanimaani obutyo? Obukwenda obwo, oMusengwa onyere niiye eyasookere okubumanyikisya abantu, era abo abawuliire ngʼabumanyikisya babukakasire egituli ngʼowebuli bwʼamazima. 4Era oKibbumba yeeyongeire okukakasa obukwenda bwabwe okubita omu bumanyiciryo, nʼebyewunyo, nʼebyamagero ebitali bimo, era nʼokugaba ebirabo bya Mwoyo oMweru, okusinzirira oku kutakakwe.
OYesu omu buntubwe
5Nti okufuga ekyalo ekyo ekiiza okubbaawo omu maiso, ekyo ekituli kutumulaku, oKibbumba tiyakukwatisirye bamalaika. 6Neye era, eeriyo awantu omu Biwandiike egikiijulira, nga waliwo akoba ati:
“Omuntu-obuntu niki-so ekyabbaire ekigira iwe,
Kibbumba nʼomufaaku, ekigira nʼomulumirwa?
7Wamukolere nʼabulaku katyayi kati, okwagaagana nʼabamalaika;
era nʼomutiikira engule eyʼekitiisya nʼokumugulumalya.
8Ebintu byonabyona wabiteekere ansi wʼobwezyebwe.”
Atyanu, omu kuteeka ebintu byonabyona ansi wʼobwezyebwe, oKibbumba mpaawo kintu kadi kimo ekyatamukwatisirye okufuga. Neye era wona nʼatyanu, titubona ngʼebintu byonabyona biri ansi wʼobwezyebwe. 9Wazira ogutubona Yesu, iye oyo ogubakolere nʼabba, okumala akaseera katyayi kati, ngʼabulwaku okwagaagana abamalaika. Era, atyanu niiye ogubatiikiire obugulumali nʼekitiisya olwakubba yabitire omu kufa kaisi, olwʼekisa kya Kibbumba, ayezye okufeererera abantu bonabona.
10OKibbumba, eyabbumbire era abbesyawo ebintu byonabyona okululwe, yaboine nga kisaaniire okutuukirirya oYesu kubita mu kugada atuuce abaanabe abangi oku kulokoka, batyo bagabane omu kitiisya. 11Nti abo abebasuuca abatukulye nʼoyo abasuuca abatukulye bonabona oitewaabwe niiye omoiza onyere oyo. Kagira oYesu tikimukwatisya nsoni okubeeta aboluganda. 12Akoba ati:
“Nalimanyikisya obukulu bwʼeriinalyo omu boluganda,
nalikuwuujira akati omu lukumbaana lwʼabo abakusinza.”
13Era akoba ati:
“Neesiganga Kibbumba.”
Era ayaba omu maiso nʼakoba ati:
“Ngonu ndi aanu aamo nʼabaana
oKibbumba abeyampaire.”
14Nʼolwekyo, ngʼowekiri kiti abo oYesu abaayeta abaana, bantu abali mu mubiri, yena yeezwalisirye omubiri nʼasuuka muntu nga ibo. Eyo niiyo engeri yonkani egiyeezyeryemu okufa. Era, okubita omu kufa niiyo engeri yonkani omu yeezyeirye okujigirica amaani ga Sitaani, iye aali nʼobwezye oku kufa. 15Nʼomu ngeri eyo, nʼataisulya abo bonabona ababbaire omu obwomi bwabwe bwonabwona omu bugalama obwʼokutya okufa. 16Nti omu butuuce obunyere tiyaiziriire kubbeera bamalaika wazira baizukulu ba Ibbulaimu. 17Nʼolwekyo yabbaire nʼokubbeera nakimo pulu ngʼabolugandabe mu buli ngeri, kaisi abbe kabona akira obukulu owʼekisa era omwesigwa omu kuweereryakwe omu maiso ga Kibbumba, okuwaayo esadaaka odenge eyasoniyisya abantu ebikole byabwe ebibbibibbi. 18Era atyanu ayezya okubbeera abo ababita omu bikemo, olwakubba yena onyere yabitireku omu bikemo aamo nʼokugada.