EBBALUWA EYOKUBIRI OPAWULO EGIYAWANDIKIIRE
OTEMUSEEWO
Enyanjula
Eenu niiyo ebbaluwa eyokubiri, omutume oPawulo egiyawandikiire omwegiwe oTemuseewo. Yagiwandiikire kumpi ku nkomerero yʼobwomibwe era ngʼali mu mabbuusu. Omu kiseera oPawulo oweyawandikiire ebbaluwa eenu, babbaire bali kuyiigaania abaikirirya omu matwale gʼe Looma. Kyezyeka okubba kiti, eyo niiyo ensonga oPawulo okubba nga yabbaire mu mabbuusu.
Omutwe omukulu omu bbaluwa eenu gukwata ku buguminkiriza. Ngʼowekiri omu bbaluwa esooka eeri oTemuseewo, mwenu yona oPawulo awa okulabula kungi ino oku beegesi bʼobubbeyi (3:5-9). Era amukobera ati walibbaawo ebiseera ebigosi omu maiso (3:1). Nʼolwekyo oPawulo asisiitira oTemuseewo okugumira ebigosi ebyo.
Engeri egibyecaanamu
1. Obusugirye nʼokwiryamu oTemuseewo amaani 1:1-18.
2. OPawulo asisiitira oTemuseewo okuguma 2:1-13.
3. OPawulo awa oTemuseewo ebyokulungamya 2:14-26.
4. OPawulo amulabula oku byalibbaawo omu maiso 3:1–4:8.
5. Ebibono ebisembayo 4:9-24.
Okwemanyikisya
1Ninze oPawulo oKibbumba oguyasiimire okubba omutume wa Kurisito oYesu, nkobere abantu ebifa oku bwomi obutawaawo oKibbumba obuyatusuubizire, obutusuna okuzwa eeri Kurisito oYesu. 2Nkuwandiikira iwe omwana wange omu Kurisito, oTemuseewo oguntaka eino. OKibbumba oItewaiswe nʼoKurisito Yesu oMusengwa waiswe bakukwatire ekisa, bakusaasire, era bakuwe eidembe.
Okwebalya nʼokwiryamu amaani
3Neebalya oKibbumba ogumpeererya omu mwoyo omulongoole, ngʼabazeiza bange owebakolanga. Bulijo mmwebalya buli owenkwewukirya nga mmwegairira omusana ooba obwire. 4Nabuli owenjewukirya amaliga agewakungire nga tuseebulangana, neegomba okukubonaku, kaisi njizulire nakimo eisangaalo.
5Njewukirya kusani okwikirirya omu Yesu okwoli nakwo okwa mazima, era nʼokwa zeizawo oLooyi nʼomaawo Ewuniike okubabbaire nakwo, era atyanu nkakasa nti wena oli nakwo. 6Kagira nkwewukirya nti oyongerenge okukumamu omusyo omu kirabo kya bulabirizi ekiri mwiwe, oKibbumba ekiyakuwaire olunaku olunakuteekeireku engalo nga nkwabula okukola omulimo gwa Kibbumba. 7OMwoyo oMweru oKibbumba oguyatuwaire tatusuuca kubba bantu abati, wazira atwizulya maani, na kutaka, na kwefuga.
8Nʼolwekyo ensoni tigyakukwatanga okutumula oku Musengwa waiswe, ooba ku nze omusibewe; wazira wena oikirirye okudambira aamo na nze olwʼaMawuliro aMasa, nga twesiga maani ga Kibbumba. 9Iye yatulokoire, nʼatweta tubbe batuukirirye nga tasinzirira ku bintu ebisa ebyo ebitwakolere, wazira ngʼasinzirira ku kigendererwakye nʼoku kisaakye ekiyatukwatiire ngʼabita omu Kurisito Yesu okuzwera nakimo eira nʼeira. 10Atyanu ekisa ekyo nago kyabbutukiire mu kuboneka kwa Mulokoli waiswe oKurisito oYesu, eyatoirewo okufa, nʼaleeta obwomi obutawaawo, ngʼabita omu Mawuliro aMasa.
11OKibbumba yannondere nkobere abantu aMawuliro aMasa ngʼomutumewe era omwegesi. 12Era kagira ndamba nti ngʼabantu banjakanisya era nga bangadya. Neye era, ekyo tikinkwatisya nsoni naire, olwakubba mmaite ogunaikiriirye, era nkakasa nti ayezya okukuuma obwomi bwange obunamubisisirye paka oku lunaku ludi olwʼenkomerero. 13Okwatenge ebibono ebyʼamazima ebiwawuliranga nga ntumula nʼobisengererya, era okalangukirenge omu njikirirya nʼomu kutaka, ebituli nabyo olwakubba tuli omu Kurisito oYesu.
14Olabirirenge obuweererya obwʼebbeeyi obubakukwatisirye, ngʼoMwoyo oMweru oyo abba mwiswe akwezyesya okubukola.
15Omaite oti abʼomwAsiya bonabona bandekerewo. Mwabo niimwo omuli oFigeero nʼoKerumogeene. 16OMusengwa akwatiire abʼomu kisito kyʼOnesifoolo ekisa, olwakubba yandabiriire emirundi mingi, era ensoni tigyamukwaite okunnemanyikisya nga ndi musibe. 17Neye oweyaizire e Looma, yakalabaine ino okunnoonia, nʼantuukaku. 18Era iwe omaite kusani ino ebintu ebisa byonabyona ebiyankoleire omwEfeeso. Oweyalituuka omu maiso ga Musengwa okumusalira omusango, oku lunaku ludi olwʼenkomerero, oMusengwa amukwatire ekisa.