1Aboluganda, titwetaaga okubawandiikira oku bifa oku mwanka nʼebiseera bya kwira kwa Musengwa waiswe. 2Inywe abanyere mukimaite kusani muti olunaku lwa kwira kwa Musengwa lwaliiza mantamanyaku ngʼomwibbi owaiza obwire.* 3Abantu owebalibba nga bakoba bati, “Tuli mwidembe nʼobukuumi bubitiriri era mpaawo kabbikabbi,” awo kaisi okugada niiwo owekwalibaizira, ngʼentuuko gyʼokubyala owegiizira omukali aali ekida. Tibalibunuka okujigirika kadi katyayi kati. 4Neye inywe, baganda bange, timuli mu bwomi bwʼendikiirya yʼekibbikibbi, kaisi olunaku oolwo lubagwerenkerere-obugwerenkereri ngʼomwibbi. 5Ekyo kityo olwakubba nywenanywena muli bantu bʼomu kitangaala kyʼobwomi obukengeize era obwʼebikole ebisa, era muli ba musana. Tituli ba bwire obwʼokutaikirirya, naabba abʼomu ndikiirya eiza olwʼekibbikibbi.

6Kale tuleke okubba omu bwomi bwa kugona, nga titufaayo oku bintu oKibbumba ebyataka, ngʼabantu abataikirirya oYesu owebakola. Neye tubbe nga tubonia omu kwetegekera okwira kwa Musengwa, era nga tuli bantu abeegendereza. 7Abagona, bagona bwire, nʼabateemeera ni beebitya obundi, bateemeera bwire. 8Neye iswe ngʼowetuli abamusana, tubbe bantu abeegendereza. Okwikirirya nʼokutakangana bitukuumenge ooti kizwalo kya mwisulukale ekyʼekyoma ekikuuma ekifubba. Era nʼosuubi wʼokulokoka atukuumenge ooti nkofiira yʼekyoma oku mutwe.* 9Ekyo kityo olwakubba oKibbumba tiyatutegekeire kutubonereza omu busungubwe, wazira yatutegekeire kulokoka nga tubita omu Musengwa waiswe oYesu Kurisito. 10Iye yatufeereire, kaisi awo nga tukaali tuli omu bwomi, waire nga tumalire okufa, twezye okubba boomi aamo naye. 11Kale mwiryanganengemu amaani, era mubbeeranganenge, era ngʼowemubbaire mukola.

12Aboluganda, tubeegairira muwenge ekitiisya abo abakola eino omu kuweererya egimuli, era oMusengwa oKibbumba abeyalondere okubeekubbembera nʼokubeegesyanga. 13Mubawenge ino ekitiisya, era mubatakenge olwʼomulimo gwabwe. Mubbenge nʼeidembe omu bantu buli moiza nʼomwinaye. 14Aboluganda, tubegairiire mulabulenge abagayaali, mwiryengemu amaani abalebera, mubberenge abanafu, muguminkirizenge bonabona. 15Mubone muti mwinywe tiwaabbaawo anyaaŋa, wazira buliijo mwegumyenge kukola bintu ebisa mwinywe, nʼomu bantu bonabona.

16Mubbenge basangaali buliijo. 17Musabenge oKibbumba buli kiseera. 18Mu buli mbeera mumwebalyenge, olwakubba ekyo inywe ngʼabantu ba Kurisito Yesu, oKibbumba kyataka mukolenge.

19Timwamalangamu amaani okukola kwa Mwoyo oMweru. 20Timwatalanga obunaabbi. 21Mwekalisisyenge buli kintu, mugumirenge oku kisa, 22mwewalenge buli kibbikibbi.

23OKibbumba onyere atuwa eidembe, abatukulye. Era emyoyo gyanywe, nʼobwomi bwanywe, nʼemibiri gyanywe, mubikuumenge nga biteereri kusani ino, oMusengwa waiswe oYesu Kurisito oweyaliizira, mubbe nga mubulaku ekyokubanenya. 24Eyabeetere mwesigwa, era ekyo yalikituukirirya.

25Boluganda, mutusabirenge. 26Mutusugirirye aboluganda bonabona omu nsugirya eya batuukirirye. 27Mbalagira nti, omu liina Iya Musengwa waiswe, ebbaluwa eenu mugisomere aboluganda bonabona.

28OMusengwa waiswe oYesu Kurisito abakwatirenge inywe ekisa.