EBBALUWA ESOOKA
OPEETERO
EGIYAWANDIIKIRE
Enyanjula
Ebbaluwa ya Peetero esooka, omutume oPeetero niiye eyagiwandiikire. Era yagiwandikiire baikirirya bonabona abaayeta ati “balondemu ba Kibbumba” era “abageni oku kyalo kunu” (1:1,17; 2:11). Yabeetere atyo olwakubba babbaire basalaanikiire omu byalo ebyʼenjabulo egibabbaire abageni. OPeetero yawandikiire ebbaluwa eenu mu Looma ekiyayetere ati Bbabbulooni (5:13). Kyezyeka okubba kiti, ebbaluwa eenu bagiwandiikire omu mwanka gwa 65 nga bamalire okubyala oKurisito.
OPeetero yawandiikire ebbaluwa eenu nʼekigendererwa kyʼokwiryamu Bakurisitaayo maani, olwakubba abantu babbaire bali kubayiigaania olwʼokwikirirya kwabwe. Kwekyo yagaitireku nʼokubakubiriza okwebitya omu mpisa egiraga giti baikirirya ba Kurisito (5:12).
Engeri egibyecaanamu
1. Okweyanjula era nʼobusugirye 1:1-2.
2. Okwebalya oKibbumba olwʼobulokole 1:3–2:10.
3. Ekiiririraku asisiitira abaikirirya okwebitya kusani 2:11–4:11.
4. OPeetero agumya abasomibe 4:12–5:11.
5. Ebibono ebisembayo 5:12-14.
Obusugirye
1Ninze oPeetero omutume wa Yesu Kurisito. Mpandiikira niinywe abalondemu ba Kibbumba, nago abageni oku kyalo kunu era abasalaanikiire omu Ponto, nʼomu Galatiya, nʼomu Kapadookiya, nʼomwAsiya, nʼomu Bbisiiniya. 2Inywe oKibbumba oItewaiswe abeyalondere okusinzirira oku kusalawokwe iye onyere okuyabbaire nakwo eira. Era mpandiikira niinywe oMwoyowe abeyaabwire kaisi mwezye okugondera oYesu Kurisito, nʼeisaayerye okubatukulya. OKibbumba abakwatire ino ekisa, era abawe ino eidembe.
Eisuubi lyʼobwomi obutawaawo
3Kale oKibbumba oIteeye wa Musengwa waiswe oYesu Kurisito bamuwuujenge! Olwʼekisaakye ekinene, atuwaire obubyale obuyaaka omu bwomi obutawaawo, okubita omu kuzuukiza oYesu Kurisito. 4Atyo era nʼatuwa obusika obutajigirika, ooba obutabebenyeka, ooba obutacucuka, ekikoba kiti, nga babutubisiire omwigulu. 5Enkabi egyʼamaani egyo gyanywe. Era olwʼokwikirirya kwanywe, amaani ga Kibbumba gabakuuma kusani okubatuuca oku kununula kwʼebintu byonabyona, ikwo okutegeke okweragira nakimo oku lunaku oKibbumba oluyalisaliraku abantu emisango. 6Ikyo ekyo kibasangaalyenge ino, newankubbaire ngʼamo esaawa eenu mubbaire nʼokubba nʼenima olwʼokubagezesya okwʼengeri gyonagyona okumalaku akaseera.
7Okubagezya okwo, kwizire kaisi oolwo okwikirirya kwanywe kubbe kwa mazima, era kaisi oomwo muzwemu inywe okusuna okubawuuja, nʼokubagulumalya nʼekitiisya, oYesu Kurisito ngʼabonekere. Ekikoba kiti, okwikirirya kwanywe nago ikwo kwʼebbeeyi eyʼamaani okukiraku eyo eya zaabbu iyo ejigirika, waire nga bagisaanucirye nʼomusyo kaisi bagikenena. 8Waire oYesu Kurisito nago timumubonangaku neye mumutaka; era waire wona timuli kumubonaku omu kiseera kinu, mumwikiririryamu era mwizwire eisangaalo eribitiriri era eritakobeka. 9Ekyo kityo olwakubba muli kusunanga ekigendererwa kyʼokwikirirya kwanywe, nga niikyo obulokole bwʼobwomi bwanywe.
10Oku byʼobulokole obwo, ibo abanaabbi omu kiseera ekyo abalagwire oku kisa ekyo ekimwabbaire mwaba okusuna, bakinonenkereirye ino nʼokwekeenenya okwʼamaani. 11Babbaire bali kugezyangaku okuvumbula ebiseera nʼembeera, ibyo oMwoyo wa Kurisito eyababbairemu, ebiyabbaire ali kudoodanga oweyalaguliire oku kugada kwa Kurisito oYesu, nʼokumugulumalya okwabbaire kuli nʼokusenjaaku. 12Cooka oKibbumba yababiikuliire ati, ebintu ebyo byabbaire tibyakubbaawo mu mulembe gwabwe neye mu gwanywe. Ekyo kyabbairewo owebatumwire oku bintu ebyo abalaabbi bʼaMawuliro aMasa ebibabakobeire omu biseera binu, nga bakolesya oMwoyo oMweru oyo ogubatumire okuzwa omwigulu. Era okubbaawo kwʼebintu ebyo nʼabamalaika bona bajunjumiriire okubibonaku.
Mubbe beeru
13Kale mubbenge nʼebiseego ebitegeke olwʼokubbaaku nʼekimukola. Era mubbenge bantu abeegendereza, nʼokuteeka eisuubi lyanywe lyonalyona ku kisa ekibalibakwatira inywe ngʼoYesu Kurisito abonekere. 14Inywe ngʼabaana abagondi, timwafaananianga empisa gyanywe nʼokwegomba ebikole ebibbibibbi ebimwabbaire nabyo owemwabbaire nga muli omu butamanya. 15Neye ngʼoyo eyabeetere owaali oMweru, nywena mubbenge beeru mwebyo ebimukola byonabyona, 16olwakubba bakiwandiikire bati, “Mubbenge beeru, olwakubba nze ndi Mweru.”
17Era ooba ngʼoKibbumba mumweta Itewaanywe iye etiyekubbira ngʼasalira abantu emisango, neye iye ngʼowaasinzirira ku mirimo egibakola, aale mumutyenge nga niiye owemuli aanu oku kyalo ngʼabageni. 18Ekyo kityo olwakubba mukimaite muti, ikwo okubanunula okuzwa omu bwomi obunambulamu obwo, ibwo obumwasunire okuzwa oku bazeiza baanywe, tikwabbaire nʼebintu ebijigirika ooti feeza ooba zaabbu. 19Neye babanunwire nʼeisaaye eryʼebbeeyi eino eeryo erya Kurisito Yesu, iye aali ooti ntaama omutomuto abulaku ekyokumunenya waire kamogo. 20Era iye babbaire bamulondere ira nga bakaali nʼokubbumba ekyalo, neye yamanyikanire kulwanywe, omunaku ginu egisembayo. 21Okubita mwiye nago, inywe mwikiririrya omu Kibbumba, iye oyo eyazuukizire oYesu kaisi oKibbumba nago nʼamugulumalya, era ekyo ni kibazweramu inywe okubba nʼokwikiririrya omu Kibbumba era nʼokumusuubiriramu.
22Aale atyanu ngʼowemumalire okutukulya obwomi bwanywe olwʼokugondera amazima kaisi mubbe nʼokutaka aboluganda okwʼamazima, kale mutakanganenge ino nʼomwoyo gumo. 23Ekyo kityo olwakubba, okubita omu kibono kya Kibbumba ekyomi era ekyʼemirembe nʼemirembe, mumalire okubba babyale omulundi gwokubiri, nga timuzwa munsigo avunda, neye nga muzwa munsigo oodi iye atavunda. 24Era ekyo kityo olwakubba eKiwandiike kikoba kiti:
“Abantu bonabona bali ooti isubi,
nʼekitiisya kyabwe kiri ooti bimuli byʼomwigona.
Eisubi likala era ebimuli bikunkumuka.
25Neye ekibono kya Musengwa oKibbumba kibbeererawo emirembe nʼemirembe.”
Era ekibono ekyo nago ekyʼaMawuliro aMasa niikyo ekyo e nyumaku ekibalaabbire egimuli.