Yaqobi
Xaafida Kiita
Giddo qofa
Hayssi Yaqoobe kiitazi asi hach hach daana duussa gish yootizaz gidishin izi xaafetiday dumma dumma deren laaletti diza tammanne nam7u Isra7eele zarketassa; hessa xaafidadey nuni nu erateth ooson peyshshana oge gish ammaniza asa mokko gishshinne amale lo7ethana oge bessiza yo7ota qoncisiza haasayata leemisora bessees. Manqotetha gish, paace gish, lo7o amale gish, qangetetha gish, ammano gishshinne lo7o ooso gish inxarsa iitatetha gishshinne lo7etetha gish, aadhdho eratetha gish issoy issara oosha gish, otoretetha gishshinne ashiketetha gish, hara asa bolla pirda gish, ceeqeteththa gish, dandaya gishshinne woossa gish, ammanizayti ooththanas bessiza miishata hu7en hu7en xaafides.
Ha kiitazi ammanoy ammano de7an ooththetana bessiza ogeta lo7ethi qoncisees.
Ha maxaafay oykkida kumeththa qofa
Geloso 1:1
Ammanonne aadhdho erateth 1:2-8
Manqotethinne dureteth 1:9-11
Paace 1:12-18
Xoossa qaala siydi ooson peysho 1:19-27
Ogey baynda maado maadonta mala imettida qofiso 2:1-13
Ammanonne ooso 2:14-26
Ammanizadenne iza haasaya 3:1-18
Ammanizadenne hayssa ha alameza 4:1-5:6
Dumma dumma hanota gish imettida zore 5:7-20
1Xoossa oosanchanne Yesus Kirstoosa oosancha gidida Yaqoobeppe biitta bolla laalettida tammanne nam7u kochchatas sarotethi intes gido.
Metonne paace
2Ta ishato! Inte bolla dumma dumma waayey gakkikko hessa wursi ufayssan qoodite. 3Gaasoyka inte ammano paacetethi intes dandaya immizayssa inte ereeta. 4Inte dandayan minni eqanayssi intes issi miishikka pacconta kumeththa asinne wosoy bayndayta gidana mala ooththo. 5Inte giddofe oonaska eratethi paccikko oonakka leqqonta ba kiyatethara ubbas immiza Xoossa woosso; izaadeska imettana. 6Gido attin sidhey baynda ammanon woosso. Gaasoyka sidhizadey abba qaathiza dambala carko mala. 7Hessadey Godappe aykkokka demmana giidi qoppofo. 8Hessadey nam7u qofan oykketidi ba biza oge bolla yaanne haanne giza asa mala.
9Kase ziqa duussan dizade Xoossi dhoqu histana gish ufayetto. 10Asa dureteth maata ciishsha mala qokana gish duussan dhoqu gidadey Xoossi iza ziqqi histikko ufayetto. 11Awa arshey xuugidi maata shullisees; maata ciishshaykka shullees; iza lo7etethikka dhayees; hessathoka durey hach hach daabursan dishin iza duretethi dhayees.
12Paacen minni eqidadey izi anjetidade. Gaasoyka izi paacera eqetishin Xoossi bana dosizaytas immida hidota de7o aklile izi ekkana. 13Oonikka paacetiza gidikko tana Xoossi paaces gooppo; gaasoyka Xoossi ase iitan paacenna; izi oonakka paaci erenna. 14Gido attin issi issi asi paacetizay barka ba iita amo kaallishenne balettishe paacetes. 15Amoy qanthatidi nagara yelees; Nagaraykka diccidappe guye hayqo yelees.
16Ta siiqo ishato! Inte balettofte. 17Lo7o imotethinne kumeththa anjoy wuri bolla salo poo7ota Aawappe wodhdhetes. Iza achchan heene ha yuuyiza eeshoykka deenna. 18Nu iza medhetethas koyro bayrata gidana mala ba sheneninne ba tuma qaalan nuna yelides.
Siyidayssa ooso
19Dosettida ta ishato! Hayssa yuushi qoppite; asi wurikka siyanas eesoto; haasayassinne hanqos eesotoppo. 20Asa hanqoy Xoossa xilloteth ooththenna. 21Hessa gish tunatethinne dalgida iitateth intefe kessi yeggidi inte shempo ashshanas dandayiza inte giddon tokketida qaala ashketethara ekkite.
22Qaalay gizayssa ooththite attin mela sisi xalala siyizadenta gididi interka intena baleththofte. 23Qaala siyishe siyida qaalay gizayssa ooththontadey ba ayfeso mastootera xeelliza asa mala. 24Bana xeelli beyidi bees; izi ay misatizakkone heerakka balettiches. 25Gido attin bana geeshshiza lo7o woga xeelli beyidi izan minnizadey ba siyidayssa ooththizadeynne balontaddey izi ba ooson anjettidade gidana.
26Ba duuna naagonta barka ba wozna baleththishe ta ammanays gizaddey barka bana baleththees. Iza ammanoyka mela hada ammano. 27Xoossa Aawa sinthan iitatethi baynda lo7o ammanoy; Aayanne aaway hayqqida nayta, ista azinati hayqqida macasata metotetishin maadonne hayssa alameza tunatethafe bana naago.