ጳዉሎሲ
ሮሜ ኣሳው
ፃፌዳ ኪታ
ጌሉዋ
ዬሱሲ ኪቴዳ ጳዉሎሲ ሮሜ ኣሳው ፃፌዳ ኪታይ፥ ጳዉሎሲ ሮሜን ዴዒያ ዎሳ ጎሊያ ፆሞሳናው ቆፔዳ ዲራው፥ ኢ ባናሲ ኡንቱንቱ ጊጊዴ ናጋናዳን ኦꬃናሳ። ጳዉሎሳ ቆፋይ ሮሜን ዴዒያ ኣማኒያዋንቱና ጉꬃ ዎዲያ ኦꬄዳዋፔ ጉዪያን፥ ኡንቱንቱ ማዲና ኢሲፔኔ ባናሳ። ኪሪስቲና ኣማኑዋባ ባሬ ኤሬዳዋኔ ሄዋ ቃሲ ኣማኒያ ኣሳይ ኦሱዋን ፔሻና ሃኖታ ቆንጪሲዴ ፃፌዳ። ጳዉሎሳ ቆፋይ ኩሜንꬃ ሃኖታን ቤቲያዌ ሃ ኪታና።
ጳዉሎሲ ሮሜን ዴዒያ ኣማኒያዋንቱሲ ሳሮታ ኣꬆዋፔኔ ኡንቱንቶ ዎሳናዋካ ሂዶታ ኢሞዋፔ ጉዪያን፥ ኪታሲ ጊዶ ቆፋይ «ሚሺራቹዋ ቃላይ ፆሳይ ኣሳ ፂሊሲያዌ፥ ኮይሩዋፔ ዉርሴꬃ ጋካናው ኣማኑዋና ጊዲያዋ ኦዴ» (1፡17)
ሄዋፔ ጉዪያን ጳዉሎሲ ሃ ቆፋ ኣሲዴ ፃፌ። ኣዪሁዳቱዋ ጊዲናካ ኣዪሁዳ ጊዴና ኣሳ ጊዲናካ ኡባይ ናጋራው ሞዴቲያዋንታ ጊዲያ ዲራው፥ ኡንቱንቱ ፆሳና ሲጌታናው ኮሼ። ኣሳይ ፆሳና ሲጌታናው ዳንዳዪያዌ ዬሱሲ ኪሪስቶሳን ኣማኒያዋና። ፆሳና ሜꬊያ ኦራꬃ ኢቲፔቴꬃ ኣይፊ ኦራꬃ ዴዑዋ ጊዲያዋ ጳዉሎሲ ኣሲዴ ኦዴዳ። ኣማኒያ ኣሳይ ፆሳና ሳሮ ዴዔ። ቃሲ ፆሳ ኣያና ባጋና ናጋራኔ ሃይቁዋ ዎልቃፔ ቢሌቴ። ጳዉሎሲ ፆሳ ቆፋይኔ ኣማኒያ ኣሳ ዴዑዋ ጊዶን ኦꬂያ ፆሳ ኣያና ዎልቃ ቆፋይ ኣዬንቶ ኦዴ (5-8)። ሄዋፔ ካሊዴ ቃሲ ጳዉሎሲ፥ «ፆሳይ ኣሳ ናናሲ ቆፔዳ ቆፋ ጊዶን ኣዪሁዳቱኔ ኣዪሁዳ ጊዴና ኣሳቱ ዋኒዴ ኢቲፔ ዋፄታናው ዳንዳያናዋንቴሻ?» ያጊያ ኦሻ ዛራናው ባፄቲዴ ዴዔ።
ቃሲካ ጳዉሎሲ፥ ኣዪሁዳቱ ዬሱሳ ኣኬናን ኣጌዳዌ ፆሳ ቆፋ ጊዲያዋ ኦዴ። ኣዪሲ ጎፔ፥ ሃዋ ማላ ሃኖታን ኣሳ ዜሬꬃይ ኡባይ ፆሳይ ዬሱሳ ባጋና ቆንጪሴዳ ኣꬎ ኬካቴꬃን ኢቲፔቴꬃ ኦꬃናሳ። ጊዶሺን፥ ኣዪሁዳቱ ዬሱሳ ኣካናው ዎዲ ያናዋ ጳዉሎሲ ኣማኔ። ዉርሴꬃን ጳዉሎሲ ኪሪስቲና ዴዑዋ ዋኒዴ ዴዓናው ቤሲንቶ ኦዴ። ፆሳሲ ኦꬃናባ፥ ኣማኒያ ኣሳቱ ባሬንቱ ጋዲያሲኔ ባሬንቱ ጊዶን ኢቱ ኢቱዋሲ ሲቁዋኒኔ ማታን ኦꬃናባኔ ቆፋ ጋሱዋን ዴንዲያ ኦሻቱዋባ ቆንጪሲዴ ኦዴ።
ሼምፓቱዋ ኡባቱዋሲ ኢሜቴዳ ቃንꬃ ቆፋቱዋ
ሮሜ ኪታ ሁጴ ቆፋ ጌሉዋ (1፡1-17)
ኣቶቴꬃይ ኣሳው ኮሺያዋ ጊዲያዋ (1፡18-3፡20)
ፆሳ ኣሹዋ ኦጊያ (3፡21-4፡25)
ዬሱሳን ቤቲያ ኦራꬃ ዴዑዋ (5፡1-8፡39)
ኢስራዔሊያ ኣሳው ዴዒያ ፆሳ ቆፋ (9፡1-11፡36)
ኪሪስቲናሲ ቤሲያ ኦሱዋ (12፡1-15፡13)
ዉርሴꬃ ቆፋኔ ሳሮታ (15፡14-16፡27)
1ባሬ ሚሺራቹዋ ቃላ ኦዳናው ፆሳይ ዶሪዴ ፄሴዳ ኪሪስቶሳ ዬሱሳ ቆማይ፥ ዬሱሲ ኪሪስቶሲ ኪቴዳ ጳዉሎሲ፥ ታኒ ሃ ዳቢዳቢያ ፃፋይ።
2ፆሳይ ዳሮ ዎዴፔ ካሴ ባሬ ናባቱዋ ባጋና ሚሺራቹዋ ቃላ ኢማና ያጌዳዌ ፆሳ ጌሻ ማፃፋቱዋን ፃፌቴዳ፤ 3ሄ ሚሺራቹዋ ቃላይ ኣሳ ጊዲዴ ዳዊቴ ዛሪያፔ ዬሌቴዳ ፆሳ ናዓ፥ ኑ ጎዳ ዬሱሲ ኪሪስቶሳባ። 4ቃሲ ኢ ባሬ ጌሻ ኣያናን ሃይቁዋፔ ዴንዴዳዋን፥ ፆሳ ናዓ ጊዲያዋ ዎልቃማ ዎልቃን ቤሴዳ። 5ኣዪሁዳ ጊዴና ኣሳይ ኡባይ ኣማናናዳኒኔ ኣዛዜታናዳን፥ ኑኒ ኡንቱንታ ካሌꬃና ማላ፥ ፆሳይ ኪሪስቶሳ ሱንꬃ ዲራው፥ ኪሪስቶሳ ባጋና ኣꬎ ኬካቴꬃኔ ዬሱሲ ኪቴዳዋንታ ጊዲያ ማታ ኑሲ ኢሜዳ። 6ዬሱሲ ኪሪስቶሳዋ ጊዳናዳን፥ ፆሳይ ፄሴዳ ሂንቴንቱካ ሄዋንቱ ጊዶን ዴዒታ።
7ፆሳይ ሲቂያዋንቶኔ ጌሻባ ኦꬃናው ፄሴዳ ሮሜ ጋዲያን ዴዒያ ኡባቶ ፆሳ ኑ ኣዉዋፔኔ ጎዳ ዬሱሲ ኪሪስቶሳፔ ኣꬎ ኬካቴꬃይኔ ሳሮቴꬃይ ሂንቴንቶ ጊዶ።
ጋላታ ዎሳ
8ካሴታዴ ታኒ ሂንቴንቱ ኣማኑ ሳዓ ኡባን ሲሴቴዳ ዲራው፥ ዬሱሲ ኪሪስቶሳ ባጋና ሂንቴንቶ ታኒ ፆሳ ጋላታይ። 9-10ኣዪሲ ጎፔ፥ ታኒ ኡባ ዎዴ ታ ዎሳን ሂንቴንታ ሃሳዪሲያዎ፥ ፆሳይ፥ ታኒ ኣ ናዓ ሚሺራቹዋ ቃላ ኦዲያዋን ታ ኣያናን ኣው ኦꬂያዌ ማርካ። ፆሳይ፥ ባሬ ሼኒያን፥ ታኒ ሃዒ ሂንቴንቱኮ ባናው ታ ኦጊያ ሚኮያናዳን፥ ኡባ ዎዴ ዎሳይ። 11ኣዪሲ ጎፔ፥ ታኒ ሂንቴንታ ሚኒሳናው፥ ሂንቴንቱና ኢቲፔ ኣያና ኢሞታ ሻካና ማላ፥ ሂንቴንታ ቤዓናው ላሞታይ። 12ታኒ ጊያዌ፥ ሂንቴንቱካ ታካ ኢቲ ዎዴ ሚኔታና። ሂንቴንቱ ታ ኣማኑዋን፥ ቃሲ ታኒካ ሂንቴ ኣማኑዋን ሚኔታና።
13ታናዳን ኣማኒያዋንቶ፥ ታኒ ኡባ ዎዴ ሂንቴንቱኮ ባናው ቆፓዲ። ሺን ታና ዲጊያባይ ዴዒያዋ ሂንቴ ኤራናው ቤሴ፤ ታኒ ሃራይ ኣቶ ኣዪሁዳ ጊዴና ሃራ ኣሳፔካ ኣይፊያ ዴሜዳዋዳን፥ ሂንቴንቱፔካ ኣይፊያ ዴማናው ኮያይ። 14ታኒ ኣሳ ኡባው፥ ጊሪኬ ኣሳዉኔ ታማሪቤና ኣሳው ቃሲ ኣꬎ ኤራንቻቶኔ ኤያቶ ቃንፃና ኣጩ ዴዔ።
15ሄዋ ዲራው፥ ታው ዳንዳዬቴዳ ኬናን ሮሜን ዴዒያ ሂንቴንቱሲካ ሚሺራቹዋ ቃላ ኦዳናው ኣሞታይ።
ሚሺራቹዋ ቃላይ ፆሳ ዎልቃ
16ሚሺራቹዋ ቃላይ ታና ዬላዬና፤ ኢ ኣማኒያ ኡባ፥ ካሴቲዴ ኣዪሁዳ ኣሳ ቃሲ ኣዪሁዳ ጊዴና ኣሳ ኣሻናው ፆሳፔ ዪያ ዎልቃ። 17ኣዪሲ ጎፔ፥ ፆሳ ማፃፋይ፥ «ፂሉ ፆሳን ኣማኔቲዴ ዴዓና» ያጊያዋዳን፥ ፆሳይ ኣሳ ኮይሮፔ ዉርሴꬃ ጋካናው፥ ኣማኑዋን ፂሊሲያዋ ሚሺራቹዋ ቃላይ ቆንጪሴ።
ኣሳ ኢታ ኦሱዋ
18ቱማቴꬃይ ኤሬታናዋ ባሬንቱ ኢታ ሃኖታን ዲጊያ ናጋራ ኦሱዋ ኡባ ቦላኒኔ ኣሳ ኢታ ኦሱዋ ኡባ ቦላን፥ ፆሳ ሃንቁ ሳሉዋፔ ዎꬊዴ ቆንጫና። 19ኡንቱንቱ ፆሳባ ኤራና ዳንዳዪያዌ ኡንቱንቶ ቆንጬ፤ ኣዪሲ ጎፔ፥ ፆሳይ ኡንቱንቶ ቆንጪሴዳ። 20ቤቴና ኣ ሃኖታይ፥ ሄዌካ ኣ ሜꬊና ዎልቃይኔ ኣ ፆሳቴꬃይ ኢቲፔ ፆሳይ ሃ ኣላሚያ ሜꬌዳዋፔ ዶሚዴ፥ ኡንቱንቶ ቆንጪዴ ቤቴዳ፤ ኡንቱንቱ ሄዋ ፆሳይ ሜꬌዳባፔ ቤዓናው ዳንዳዪያ ዲራው፥ ኡንቱንቶ ጋሶዪያባይ ባዋ።
21ኣዪሲ ጎፔ፥ ኡንቱንቱ ፆሳ ኤሮፔካ፥ ኣው ቤሲያ ቦንቹዋ ኢሚቤይኪኖ፤ ቃሲ ኣ ጋላቲኪኖ። ሺን ኡንቱንቱ ኣላሌ ኬሴናባ ቆፒኖ፤ ቃሲ ኡንቱንቱ ኣኬኬና ዎዛናይ ꬉሜዳ። 22ኡንቱንቱ ባሬንታ ኣꬌዳ ኤራንቻ ጊኖ፤ ሺን ኡንቱንቱ ኤያ። 23ኡንቱንቱ ሃይቄና ፆሳሲ ጎዪኒያዋ ኢፂዴ፥ ሃይቂያ ኣሳ ሜꬌታ፥ ካፋቱዋ ሜꬌታ፥ ዶዓቱዋ ሜꬌታኔ ቲራን ጎሼቲያዋንቱ ሜꬌታ ሜꬌቴዳዋንቱሲ ጎዪኔዲኖ።
24ሄዋ ዲራው፥ ኡንቱንቱ ኢቱ ኢቱዋና ፖኮባ ኦꬃና ማላ፥ ፆሳይ ኡንቱንቱ ዎዛናይ ኣሞቲያ ቱናባ ኦꬃናዳን ኡንቱንታ ኣጌዳ። 25ኣዪሲ ጎፔ፥ ኡንቱንቱ ፆሳ ቱማቴꬃ ዎርዱዋን ላሜዲኖ፤ ቃሲ ሜꬌዳ ፆሳ ኣጊዴ፥ ኢ ሜꬌዳባው ጎዪኔዲኖኔ ኦꬄዲኖ። ፆሳይ ሜꬊናው ጋላቴቴዳዋ። ኣሜንዒ።
26ሄዋ ዲራው፥ ፆሳይ ኡንቱንቱ ፖኮባ ኣሞታና ማላ፥ ኡንቱንታ ኣጌዳ፤ ሃራይ ኣቶ ኡንቱንቱ ማጫዋንቱ ባሬንቶ ቤሲያዋ ኣጊዴ፥ ቤሴናዋ ሃኔዲኖ። 27ሃዋዳንካ፥ ኣቱማ ኣሳይ ቃሲ ባሬንቶ ቤሲያዋዳን ማጫዋንቱና ጋኬቲያዋ ኣጊዴ፥ ኢቱ ኢቱዋና ጋኬታናው ኮዬዲኖ፤ ኣቱማ ኣሳይ ኢቱ ኢቱዋና ፖኮባ ኦꬂዴ፥ ባሬንቱ ኦꬄዳ ባላን ባሬንቶ ቤሲያ ፒርዳ ኣኬዲኖ።
28ኡንቱንቱ ፆሳ ኤራናው ዶሴናን ኢፄዳዋ ኬና ፆሳይ ኡንቱንቱ ቤሴናዋ ኦꬃና ማላ፥ ኡንቱንቶ ፓꬄና ቆፋ ኢሜዳ። 29ኡንቱንቱን ቱናቴꬃይ፥ ኢታቴꬃይ፥ ዮራቴꬃይኔ ኢታ ሃኖታይ ኩሜዳ፤ ቃሲ ኡንቱንቱን ቃናቲ፥ ሼምፑዋ ዎꬊያ ቆፋይ፥ ፓሉማይ፥ ጪሙሳይኔ ኢታ ቆፋይ ኩሜዳ፤ ቃሲ ኡንቱንቱ ሶቂያዋንታ፥ 30ዚጊሪያዋንታ፥ ፆሳ ኢፂያዋንታ፥ ቦሪያዋንታ፥ ኦቶሬቲያዋንታ፥ ጬቄቲያዋንታ፥ ኢታባ ኦꬃናው ኮዪያዋንታኔ ባሬንቱ ኣዎኔ ኣቲው ኣዛዜቴናዋንታ፥ 31ቆፋይ ባይናዋንታ፥ ኣማኑ ባይናዋንታ፥ ሃራንቶ ቃሬቴናዋንታኔ ማሬናዋንታ። 32ኡንቱንቱ ሃዋንቱ ማላ ኦꬂያዋንቱሲ ሃይቁ ቤሴ ጊያ ፆሳ ሂጊያ ኤሪዴ፥ ሃዋንታ ኦꬂኖ፤ ሄዋ ፃላላ ጊዴናን፥ ሃዋንታ ኦꬂያዋንታካ ኦꬂቴ ጊዴ ሚኒሲኖ።